खानेबानीमा सुधार ल्याउन खाद्यले सप्ताहव्यापी दिवस मनाउने- अन्य - कान्तिपुर समाचार

खानेबानीमा सुधार ल्याउन खाद्यले सप्ताहव्यापी दिवस मनाउने

कान्तिपुर संवाददाता

काठमाडौँ — ‘स्वच्छ सन्तुलित आहार, स्वस्थ जीवनको आधार’ भन्ने नारासहित खाद्य प्रविधि तथा गुण नियन्त्रण विभागले सप्ताहव्यापी विश्व खाद्य दिवस मनाउने भएको छ ।  खाद्य पदार्थमा स्वच्छता र गुणस्तर कायम राख्न विभिन्न प्रवर्द्धनात्मक कार्यक्रम गरिने विभागले जनाएको छ ।

‘संविधानले हरेक नेपालीका लागि खाद्य सम्बन्धी हकको सुनिश्चितता गरेको छ । नागरिकको खाद्य सम्बन्धी हकलाई परिपूर्ण बनाउँदै कोही भोकै पर्दैन, कोही भोकले मर्दैन’ भन्ने नाराअनुसार जेठ १८ देखि २४ गतेसम्म सप्ताहव्यापी रुपमा दिवस मनाउँदैछौं,’ बुधबार आयोजित पत्रकार सम्मेलनमा विभागका प्रबक्ता मोहनकृष्ण महर्जनले भने, ‘यस अवधिमा स्ट्रिट फुड स्वच्छता अभिवृद्धि कार्यक्रम गर्नेछौं ।’

त्यस्तै, दिवसका अवसरमा विभाग र मातहतका कार्यालयहरुबाट होटल, रेष्टुरेन्ट अनुगमन निरीक्षण एवम् स्तरीकरण गरी स्टिकर वितरण कार्यक्रम, खाद्य उद्यमी व्यवसायीहरुसँग खाद्य स्वच्छता एवम् अन्तर्क्रिया कार्यक्रम, खाद्य स्वच्छता तथा पोषणसम्बन्धी स्कुल शिक्षा लगायततका कार्यक्रम गर्ने जनाइएको छ । विभागका महानिर्देशक मतिना जोशी बैद्यले उपभोक्ताको खानेबानीमा सुधार, सुरक्षित खाद्य वस्तुको उपभोग र खाद्य सुरक्षाका निम्ति विश्व खाद्य दिवशको महत्वपूर्ण भूमिका रहेको बताइन् । दिवसकै अवसर पारेर खाद्य श्रृंखला, खाद्य स्वच्छता ल्याउन अभियान चलाइने उनले बताइन् ।

प्रकाशित : जेष्ठ १८, २०७९ १८:०७
प्रतिक्रिया
पठाउनुहोस्

प्रतिपक्षीलाई अर्थमन्त्रीको जवाफ : बजेटमा अनुदान छैन, प्रोत्साहन छ

कान्तिपुर संवाददाता

काठमाडौँ — अर्थमन्त्री जनार्दन शर्माले आगामी आर्थिक वर्षको बजेट अनुदानलक्षित नभएको बताएका छन् । बरु यो बजेटले किसानहरूलाई प्रोत्साहन गरेको उनले बताए । प्रतिपक्षी दलका सांसदहरूलाई लक्षित गर्दै उनले बजेटमा अनुदानको कुरा नभएर प्रोत्साहनको कुरा रहेको उनको भनाइ थियो ।

बुधबार राष्ट्रिय सभामा सरकारले प्रस्तुत गरेको आगामी आर्थिक वर्ष २०७९/०८० को बजेटमाथिको सामान्य छलफलमा सांसदहरुले उठाएका प्रश्नको जवाफ दिँदै उनले यस्तो बताएका हुन् ।

यसअघि प्रतिपक्षी दल नेकपा एमालेसहित दलका सांसदहरूले बजेटले चुनाव लक्षित भएर 'कार्यकर्तालाई पैसा बाँड्ने' काम गरेको टिप्पणी गरेका थिए । अर्थमन्त्री शर्माले भने आगामी आर्थिक वर्षको बजेट चुनावलाई लक्षित गरेर नल्याइएको भन्दै बजेटमा पैसा बाँड्ने कुरा कतै नगरेको दाबी गरेका छन् । मन्त्री शर्माले प्रमुख प्रतिपक्ष दल नेकपा एमालेका सांसदहरुप्रति लक्षित गर्दै विगतमा अनुदान बाँडिएको अभ्यासको झझल्को अहिले पनि आइरहेको व्यंग्य गरे ।

‘बजेटमा चुनावलाई ध्यानमा राखेर पैसा बाँड्ने कार्यक्रम मात्रै बनाइयो भन्ने छ तर यहाँ कतै पैसा बाँड्ने काम छैन । अनुदान भन्ने कतै पनि छैन । अनुदान भनेर हिजो बाँडिएको अभ्यासको स्मरण होला । तर यसमा बिल्कुल अनुदान छैन । प्रोत्साहन छ । किसानले दुध दुह्यो, त्यसले प्रोत्साहन पायो । प्रोत्साहन छ, अनुदान छैन । त्यसकारण यहाँ कतै बाँडिदैन । दुध दुहेको बेला सरकारले भोट कसलाई दियो सोध्दैन, दुध दुह्यो कि दुहेन यति सोध्छ, त्यसकारण यसमा ढुक्क हुन आग्रह गर्दछु,’ अर्थमन्त्री शर्माले भने ।

मन्त्री शर्माले प्रतिपक्षले इन्डक्सन चुलो बाँडेर भोट साट्न खोजेको आरोप लगाइएको भन्दै प्रतिपक्षीलाई पनि साथमा लिएर चुलो बाँड्ने कार्यक्रम बनाउने बताएका थिए । उनले इन्डक्सन चुलो निर्वाचनसँग केन्द्रित नभएको भन्दै चुलोमा राजनीति नगरेको पनि बताए । मन्त्री शर्माले नेपालको विद्युतीय संयन्त्रले २५ प्रतिशत मात्रै विद्युतीय उपकरणको प्रयोग धान्न सक्ने भएकोले त्यसै अनुसारका संरचनामा बजेटले जोड दिएको बताए ।

मन्त्री शर्माले भने, ‘विद्युतको कुरा, विद्युतीय चुलोको कुरा गर्दा इन्डक्सन चुलो बाँड्न लाग्यो, निर्वाचनमा जान थाल्यो, निर्वाचनको बारेमा सोचेको होइन । इन्डक्सन चुलो निर्वाचनसँग सम्बन्धित छैन । यो बाँड्नेमा प्रतिपक्ष दललाई पनि सँगै लगेर बाँड्ने कार्यक्रम बनाउन सकिन्छ । सँगै लैजाउँला । चिन्ता गर्नु पर्दैन । यो कुनै राजनीति गरेको होइन । यो देशको आजको आवश्यकता हो । तर आवश्यक्ता आज नै सबै पूर्ति हुँदैन । आज कति धान्छ तपाइँको संयन्त्रले भनेर विद्युत प्राधिकरणको एमडीलाई बोलाएर सोधेँ । उहाँले २५ प्रतिशत मात्रै भन्नुभयो । यो वर्ष २५ प्रतिशत मात्रै दिन सकिने संरचनाको लागि थप बजेटको व्यवस्था गरिएको छ । संरचना वृद्धि गर्दै जाँदा त्यसलाई सय प्रतिशत पुर्‍याउने कुरा हो । त्यसलाई सिंहदरबारबाट सुरु गर्ने भनिएको छ, बिस्तारै जनतामा जान्छ । योसँग भोट साट्ने कुरा बिल्कुल छैन । ढुक्क हुनुभए हुन्छ ।’

यस्तै अर्थमन्त्री शर्माले देश ठूलो संकटमा गइरहेको कुरा उठिरहेको भन्दै देशको आर्थिक संकटलाई सरकारले हालै प्रस्तुत बजेटले समाधान गर्ने बताएका थिए । उनले सरकारले देशभरबाट जनताले दिएका गुनासोका आधारमा नै बजेट निर्माण गरेको बताए ।

प्रकाशित : जेष्ठ १८, २०७९ १७:५३
पूरा पढ्नुहोस्
प्रतिक्रिया
पठाउनुहोस्
×