हिमाली क्षेत्रमा तोतङरी ल्होसार मनाइँदै
हुम्ला — हिमाली क्षेत्रका लामा समुदायको तोतङरी ल्होसार अर्थात् नयाँ वर्ष २१५० शनिबारबाट सुरु भएको छ । पुष कृष्ण चतुर्दशीका दिनदेखि मनाउने गरिए पनि तोतङरी ल्होसार अर्थात् नयाँ वर्ष पर्व भने पुष शुक्ल प्रतिपदाबाट विविध कार्यक्रम आयोजना गरी मनाउने गरिन्छ ।
तोतङरी ल्होसार पर्व पुरानो वर्षको बिदाइ र नयाँ वर्षको स्वागतको रुपमा मनाउने गरिन्छ । ल्होतर पात्रो (लामा समुदायको पात्रो) अनुसार पुष शुक्ल प्रतिपदा शनिबारदेखि बाघ वर्ष पूरा गरी खरायो वर्ष प्रवेश हुन्छ । पूर्वको सोलुखुम्बुदेखि चीनको स्वशासित तिब्बतको डिघर्चीसम्म हिमाली क्षेत्रमा बसोबास गर्ने लामा भोटे र ब्यासी समुदायमा यो पर्व प्रचलित रहेको लामा सांस्कृतिक मञ्च हुम्लाका अध्यक्ष धर्मानन्द लामाले बताए । हरेक वर्ष पुष शुक्ल प्रतिपदाका दिनदेखि मनाइने चाड लामा र ब्यासी जातिको मुख्य पर्व हो । यो पर्व वसन्त पञ्चमिसम्म मनाइने उनले जानकारी दिए ।
ल्होसारका १२ वट वर्ष मुसा, हात्ती, बाघ, खरायो, मेघ, सर्प, घोडा, बाँदर, चरा, कुकुर, सुँगुर र भेडा गरी १२ वर्गमा तोतङरी ल्होसारलाई विभाजन गरिएको छ । ल्होसारका १२ वटै वर्ष पशुपंक्षीको नामबाट गणना गरिएकाले लामा र ब्यासी समुदाय प्रकृतिपूजक रहेको पनि बताइन्छ ।
सोनाम, तमु र ग्याल्बु ल्होसारमा नेपाल सरकारले सार्वजनिक बिदा दिने गरेको भए पनि तोतङरी ल्होसारमा सरकारले सार्वजनिक बिदा दिने गरेको छैन । तोतङरी ल्होसार तथा लामा र ब्यासी समुदायको नव वर्ष २१५० को अवसरमा कर्णाली प्रदेशका मुख्यमन्त्री जीवनबहादुर शाहीले शुभकामना सन्देश दिँदै कर्णालीवासीसँगै सम्पूर्ण नेपालीहरुबीच एकता, सदभाव र सहिष्णु कायम गरी समृद्ध कर्णाली निर्माणमा सबैलाई प्रेरणा मिलोस् भनी कामना गरेका छन् ।
