विद्युतीय प्रणालीबाट भुक्तानी गर्दा सेवाग्राहीलाई सामाजिक सुरक्षा भत्ता लिन सकस
हुम्ला — विद्युतीय प्रणालीबाट भुक्तानी गर्दा सेवाग्राहीलाई सामाजिक सुरक्षा भत्ता लिन सकस भएको छ । चीनको सिमानासँग जोडिएको हिमालपारीको गाउँ हुम्लाको उत्तरी नाम्खा गाउँपालिका–६ लिमीका तिल, हाल्जी र जाङ्ग तीनवटा गाउँका सेवाग्राहीले अघिल्लो आर्थिक वर्षको सामाजिक सुरक्षा भत्ता १७ महिना बित्न लाग्दा समेत पाउन सकेका छैनन् ।
सामाजिक सुरक्षा भत्तामै अनियमितता हुन थालेपछि सरकारले विद्युतीय भुक्तानी प्रणालीबाट सामाजिक सुरक्षा भत्ता सिधै सेवाग्राहीको बैंक खातामा जम्मा गर्ने नीति ल्याउँदा सेवाग्राहीले समयमा केवाईसी अपडेट नगरेका कारण भत्ता पाउन नसकेको नाम्खा गाउँपालिकाका लेखा अधिकृत अश्विनीकुमार देवकोटाले बताए ।
मौसमी जटिलताका कारण वर्षको २ पटक असार र असोजमा सामाजिक सुरक्षा भत्ता पाउने गरेका लिमिका सेवाग्राहीले अघिल्लो आर्थिक वर्षको भत्ता १७ महिना बित्दासम्म नपाएको तिल गाउँका सेवाग्राही कुन्ज्योक लामाले बताए ।
सामाजिक सुरक्षा भत्ता वितरणमा अनियमितता नहोस् भनेर सकारले ल्याएको नयाँ नियमका कारण लिमीका सेवाग्राहीहरू सामाजिक सुरक्षा भत्ता पाउनबाट वञ्चित भएको नाम्खा-६ लिमीका वडाध्यक्ष पाल्जोर तामाङले बताए । सेवाग्राही लिमीबाट खाता सञ्चालन गरेको बैंक रहेको स्थान पालिका केन्द्र याल्वाङ पुग्न तीन दिन लाग्ने र पालिका केन्द्रमा आई सेवाग्राहीको नाममा खोलिएको खाताको केवाईसी अपडेट गर्न सेवाग्राहीहरुलाई आउजाउमा सहज नभएको कारण भत्ता पाउन नसकेको उनले बताए । पहिला कर्मचारी सेवाग्राहीको घरघरमा गएर सामाजिक सुरक्षा भत्ता वितरण गर्थे तर अहिले पालिकाले सिधै सेवाग्राहीको खातामा जम्मा गर्ने गरेकाले हिमाल पारिको गाउँबाट आफ्नो खाताको केवाईसी अपडेट गर्न आउन नसक्ने भएकाले भत्ता निकाल्न नसकेको अध्यक्ष तामाङले बताए ।
कतिपय ज्येष्ठ नागरिक, अपाङ्गता भएका व्यक्ति र बालबालिका सामाजिक सुरक्षा भत्ता बैंकबाट निकाल्न आउन नसक्ने, आउन सक्नेले पनि पाउने सेवा सुविधा सबै आउजाउमै खर्च गर्नुपर्ने भएका कारण पनि आउन नमानेका हुन् । लिमीको विकटता र दुर्गमतालाई मध्यनजर गरेर सेवाग्राहीले सहज रुपमा सामाजिक सुरक्षा भत्ता पाउने व्यवस्थाका लागि बैंक र गाउँपालिकाले वैकल्पिक व्यवस्था गर्नुपर्ने स्थानीयको भनाइ छ ।
सरकारले ल्याएको नयाँ व्यवस्थाका कारण लिमीका २ सय २४ जना सेवाग्राहीले अघिल्लो आर्थिक वर्षको सामाजिक सुरक्षा भत्ता अहिलेसम्म पाउन नसकेको नाम्खा गाउँपालिकाका निमित्त प्रमुख प्रशासकीय अधिकृत मोहनबहादुर शाहीले बताए । अहिलेको विद्युतीय भुक्तानी प्रणालीको व्यवस्थाले कोष तथा लेखा नियन्त्रण कार्यालयबाट सिधै रकम सिटिजन्स बैंकको खातामा गएको तर लिमीका सेवाग्राही बैंक खाता सञ्चालनका लागि केवाईसी अपडेट गर्न आउन नसकेकाले हालसम्म भत्ताको रकम बैंकको खाता रहेको उनको भनाइ छ ।
लिमीका सेवाग्राहीको सामाजिक सुरक्षा भत्ताका लागि ९० लाख रकम बैंकमा जम्मा भएको र सेवाग्राही केवाईसी अपडेटका लागि गाउँपालिका केन्द्र याल्वाङमा स्थापना भएको सिटिजन्स बैंकको शाखा वा सिमकोटको शाखामा आउन नमान्ने भएका कारण रकम बैंकमै रोकिएको अधिकृत शाहीले बताए ।
प्रकाशित : मंसिर २८, २०७९ ०९:३७
