सल्यानमा प्रत्यक्षमा ७ र समानुपातिकमा ८ प्रतिशत मत बदर - कर्णाली - कान्तिपुर समाचार

सल्यानमा प्रत्यक्षमा ७ र समानुपातिकमा ८ प्रतिशत मत बदर 

विप्लव महर्जन

सल्यान — एक प्रतिनिधिसभा र दुई प्रदेशसभा रहेको सल्यानमा यही मंसिर ४ गते सम्पन्न भएको निर्वाचनमा प्रत्यक्षतर्फ सात र समानुपातिकमा आठ प्रतिशत मत बदर भएको छ । सम्बन्धित निकायले मतदाता शिक्षालाई प्रभावकारी बनाउन नसक्दा मतदातामा भएको अन्योलताका कारण प्रत्यक्ष र समानुपातिकमा धेरै मत बदर भएको हो । 

कुल खसेको मत अनुसार प्रत्यक्षमा ११ हजार ६ सय १५ र समानुपातिकमा १२ हजार ४ सय ४६ मत बदर भएको मुख्य निर्वाचन कार्यालय सल्यानले जनाएको छ । मुख्य निर्वाचन अधिकृत गिरिराज गौतमका अनुसार प्रत्यक्षतर्फ प्रतिनिधिसभाको लागि खसेको कुल मत ७६ हजार ३ सय ५ मा ७ हजार ३ सय ५९ , प्रदेशसभा अन्तर्गत सल्यान १ मा खसेको ४१ हजार १ सय ७६ मतमा २ हजार ३ सय ४८ र २ मा ४१ हजार ९ सय ६७ मत खसेकोमा १ हजार ८ सय ९८ मत बदर भएका छन् ।

यसैगरी समानुपातिकमा प्रतिनिधिसभाको लागि ८४ हजार ७ सय ८९ मत खसेकोमा ६ हजार २ सय १५ र प्रदेशसभामा ८२ हजार ९ सय ९८ मत खसेकोमा ६ हजार २ सय ३१ मत बदर भएको छ ।

मतदाता शिक्षा प्रभावकारी बनाउन सरोकारवाला सबैको जिम्मेवारी रहेपनि प्रभावकारी नभएकै कारण खसेको मत बढी बदर भएको निर्वाचन कार्यालय सल्यानका प्रमुख निमराज भटराईले बताए । प्रत्यक्षमा थोरै चिह्न र समानुपातिकमा धेरै चिह्न भएकाले मतदाता अलमलमा परेका कारण समानुपातिकमा बढी मत बदर भएको उनले जानकारी दिए । उनका अनुसार निर्वाचनमा कार्यालयले स्वयंसेवक भर्ना गरेर जिल्लाका सबै पालिकामा मतदाता शिक्षा दिए पनि एकै मतदाताले एक चिह्नमा मात्र नभइ धेरैमा छाप लगाएको पाइएको हो ।

सल्यानमा १ लाख ५७ हजार ७ सय १ मतदाता रहेकोमा जिल्लाभरिका २ सय ५ मतदान केन्द्रबाट कुल मतदाताको ८४ हजारले तथा ५३.२७ प्रतिशतले मतदान गरेका थिए ।


प्रकाशित : मंसिर १२, २०७९ १३:२१
प्रतिक्रिया
पठाउनुहोस्

चीनको यी वुमा नेपाली उत्पादनको प्रवर्द्धन

लक्ष्मी लम्साल

बेइजिङ — चीनको चच्याङ प्रान्तको व्यापारिक सहर यी वुमा आयोजित २८औं यी वु मेला तथा तेस्रो चच्याङ अन्तर्राष्ट्रिय मितेरी सहर आदानप्रदान प्रदर्शनीमा नेपालले पहिलो पटक आफ्नो उत्पादनको प्रवर्द्धन गर्ने मौका पाएको छ। साझा विकास विस्तारका लागि विश्वसँगै हातेमालो भन्ने नाराका साथ चार दिवसीय प्रदर्शनी आयोजना गरिएको थियो। 

पहिलो पटक नेपाली पेभेलियन बनाइएको र नेपालबाटै आएका ब्यापारीहरूले नेपाली थाङ्का, मूर्तिकला, सांस्कृतिक आदानप्रदान लगायतको प्रदर्शन गरेको नेपाली दूतावासका इकोनोमिक मिनिस्टर छबिन्द्र पराजुलीले बताए। कोभिडका कारण बेइजिङबाट राजदूतावासका प्रतिनिधिहरू उपस्थित हुन सकेनन्। अन्य देशका कतिपय उच्च अधिकारीहरुले पनि भिडियोमार्फत् आ आफ्नो देशको उत्पादनको प्रवर्द्धन गरेका थिए।

यि वु अन्तर्राष्ट्रिय एक्स्पो सेन्टरमा २४ देखि २७ तारिखसम्म आयोजित प्रदर्शनीका दौरान नेपालले पर्यटन लगानी संभाव्यता लगायतबारेमा प्रचार गरेका थिए। विधिवत रुपमा २ वर्षदेखि क्रियाशील नेपाल यी वु चेम्बर अफ कमर्सका अध्यक्ष विष्णु दुमरूले भने ‘यी वु ट्रेड फेयर बेल्ट एण्ड सिटिजमा भाग लिएर नेपालले पर्यटन र लगानी संभाव्यताका अलावा भगिनी सम्बन्ध स्थापनाका विषयमा अवधारणा राखेका छौं। चिनियाँ लगानीकर्ताहरू नेपाल जान इच्छुक भए पनि चीनको कोभिड पोलिसीका कारण फर्किन गाह्रो हुने भएकाले पर्खिरहेका छन्।’

४० जना विदेशीद्वारा लिखित पुस्तकको विमोचन ।

विश्वका विभिन्न देशका २ सय ३३ भन्दा बढी कम्पनीको आउजाउ हुने संसारको सबैभन्दा ठूलो यी वु होलसेल मार्केट सञ्चालनमा आएको ४० वर्ष पुगेको छ। यस अवधिमा यी वुसँग जोडिएका विश्वका ४० जना विदेशीले लेखेका कथाहरूको सँगालो पनि विमोचन गरिएको छ। नेपालीका कथाहरू पनि समेटिएको छ । पुस्तकमा नेपाली लेखकद्वारा नेपाली उत्पादनको निर्यात सम्भावना तथा यी वु सहर पनि काठमाडौंसँग मिल्दोजुल्दो भएकाले भगिनी सहर सम्बन्ध स्थापना गर्न सकिने विषय उठाइएको दुमरूले बताए ।

कार्यक्रमका क्रममा सन् २०१६ मा बेइजिङमा पूर्व प्रधानमन्त्री केपी ओलीसँग प्रोेफेसर वान च्याउ श ले बेल्ट एण्ड रोडको बारेमा जानकारी गराउँदाका तस्बिरहरू देखाइएको थियो।


नेपाली मण्डप

प्रदर्शनीलाई महत्व दिँदै जापान, फिनल्याण्ड, रुस सहित ६ देशका १५ भगिनी सहरहरूले भिडियो मार्फत् भाग लिए। भगिनी सम्बन्धलाई चीनले विदेश र जनस्तरीय आदानप्रदानका लागि महत्वपूर्ण माध्यमको रुपमा लिएको जनाएको छ। चीन–विदेश सम्बन्धका लागि महत्वपूर्ण आधार र बलियो समर्थनका रुपमा यसलाई लिइएको चाइनिज पिपुल्स एसोसिएसन फर फ्रेन्डसिप विथ फरेन कन्ट्रिजका महासचिव युआन मिन्ताओले भिडियोमार्फत् भने। उनले भने, 'सन् १९७३ देखि चीन–विदेशी मैत्री शहरहरूको भगिनी सम्बन्ध तीव्र भएको छ र अहिले चीनले पाँच महादेशलाई समेट्ने गरी मित्र र साझेदार सञ्जालको अन्तर्राष्ट्रिय सर्कल स्थापना गरेको छ।’

चच्याङ प्रान्तीय शाओ सिङ सहर चीनको पहिलो राष्ट्रिय ऐतिहासिक र सांस्कृतिक शहरहरू मध्ये एक भएकाले पूर्वी एशियाको सांस्कृतिक राजधानी मानिन्छ। २७ देशहरूमा ५४ शहरहरूसँग भगिनी शहर सम्बन्ध र ३४ विदेशी शहरहरूसँग मैत्रीपूर्ण विनिमय सम्बन्धको विकासको लागि समझदारीपत्रमा हस्ताक्षर गरेको छ।

प्रकाशित : मंसिर १२, २०७९ १३:२१
पूरा पढ्नुहोस्
प्रतिक्रिया
पठाउनुहोस्
×