मुगुमा स्थानीय तहका ७०८ उम्मेदवारलाई जरिवाना
मुगु — जिल्लामा स्थानीय तहका उम्मेदवारहरुले निर्वाचन खर्च विवरण नबुझाएको भन्दै निर्वाचन कार्यालयले ७०८ जना उम्मेदवारलाई जरिवाना तोकेको छ ।
चार वटा स्थानीय तहका ७०९ जना उम्मेदवारमध्ये एक जना मुगुम कार्मारोङ गाउँपालिकाका उपाध्यक्ष पदका उम्मेदवार गुरुस्याङग्याप लामाले मात्र निर्वाचन खर्च बुझाएका छन् । चुनावमा जित्ने र हार्ने दुबै तर्फका उम्मेदवार जरिवानामा परेका छन् ।
गत वैशाख ३० गते स्थानीय तहको निर्वाचन भई जेठ ७ गते परिणाम घोषणा भएको थियो । परिणाम सार्वजनिक भएको करिब सात महिनासम्म पनि नगर प्रमुख, उपप्रमुख, पालिका अध्यक्ष, उपाध्यक्ष वडाध्यक्ष, सदस्य, दलित महिला सदस्य, जनजाति सदस्यहरुले हालसम्म निर्वाचन खर्च विवरण निर्वाचन कार्यालयमा नबुझाएपछि कारबाहीमा परेका छन् ।
जिल्ला निर्वाचन कार्यालयको नियमबमोजिम उम्मेदवारले असारमै आफ्नो निर्वाचन खर्च बुझाई सक्नु पर्ने भए पनि उम्मेदवारहरुले अटेर गरेपछि जरिवाना भोग्नु पर्ने भएको हो । निर्वाचन कार्यालयले नगर प्रमु, उपप्रमुख पदका उम्मेदवारलाई ४ लाख ५० हजार, नगरका वडाध्यक्ष, सदस्यका उम्मेदवारलाई २ लाख जरिवाना तोकिएको जिल्ला निर्वाचन कार्यालयका सूचना अधिकारी धनकृष्ण बडुवालले बताए । उनका अनुसार पालिका अध्यक्ष र उपाध्यक्षका उम्मेदवारलाई ३ लाख ५० हजार र पालिका अध्यक्ष र सदस्य पदका उम्मेदवारलाई १ लाख ५० हजार जरिवाना तोकिएको छ ।
निर्वाचन कार्यालयले गत भदौमा छायानाथरारा नगरपालिका, सोरु खत्याड र मुगुम कार्मारोङ गाउँपालिकामा लड्ने सम्पूर्ण उम्मेदवारलाई पत्राचार गरी तुरुन्त निर्वाचन खर्च विवरण पेस गर्नु भने पनि बेवास्ता गरेको उनको भनाइ छ । जिल्ला निर्वाचन कार्यालयले उम्मेदवारलाई जरिवानाको अवधि ६ महिना तोकिएको र उक्त समयसम्म पनि नबुझाए आयोगको निर्देशनबमोजिम थप कारबाही हुने सूचना अधिकारी बडुवालले बताए ।
प्रकाशित : आश्विन ८, २०७९ १६:२१
