ज्येष्ठ नागरिकलाई निःशुल्क खाजा
रुकुम पश्चिम — मुसीकोट नगरपालिका–५ का मनबहादुर खत्रीलाई समय बिताउन मुस्किल छैन । साँझ–बिहान परिवारका सदस्यसित रमाउने खत्री दिउँसो साथीभाइसँग भेटिन्छन् । मुसीकोट–१ का प्रियराज शर्माको दैनिकी पनि खत्रीको जस्तै गरी बितिरहेको छ । घरमा एक्लै बस्नुपर्दा उनी साथीभाइ भएको ठाउँमा गाइहाल्छन् । दिनभर गफिन्छन्, पुराना कुरा गर्छन् र बेलुका घर फर्कन्छन् ।
मुसीकोट–१ स्थित जेष्ठ नागरिक संघले सञ्चालन गरेको जेष्ठ नागरिक दिवा सेवा कार्यक्रमले उनीहरूलाई सजिलो बनाइदिएको छ । जेष्ठ नागरिकलाई लक्षित गरी जिल्ला समन्वय समितिको कार्यालयनजिकैको जनविकास पुस्तकालयमा दिवा सेवा कार्यक्रम सञ्चालन गरिएको छ । एक्लै बस्नुपर्ने, समय बिताउन समस्या हुने ज्येष्ठ नागरिकलाई लक्षित गर्दै यो कार्यक्रम सुरु गरिएको हो ।
यहाँ ज्येष्ठ नागरिक भेटघाट गर्ने, छलफल गर्ने, चिया, खाजा खाने, नाचगान गर्नेसम्मको व्यवस्था छ । ज्येष्ठ नागरिकका लागि चिया, खाजा निःशुल्क पाइन्छ । ‘दिनभर घरमा कोही नहुने बेला कुरा गर्ने थलो पाइएको छ,’ खत्रीले भने, ‘बिस्तारै हिँड्दै संघको कार्यालय पुग्छु कुराकानी हुन्छन्, अरू साथीभाइ भेटिन्छन्, दिन गएको पत्तै हुन्न ।’
पुराना साथीभाइ भेटिने, कुराकानी हुने भएपछि खुसी पनि लाग्ने उनले बताए । ज्येष्ठ नागरिकलाई प्राथमिकतामा राखेर थालिएको कार्यक्रमले आफूहरूलाई सहयोग पुगेको शर्माले बताए । उनी जेष्ठ नागरिक संघका सदस्य पनि हुन् । सबैको मागअनुसार यो कार्यक्रम सुरु गरिएको र कार्यक्रमले जेष्ठ नागकिरलाई सहयोग नै पुगेको उनको भनाइ छ ।
मुसीकोट नगरपालिका र सामाजिक विकास कार्यालयले यो कार्यक्रमका लागि बजेट दिएका छन् । जेष्ठ नागरिक संघका उपाध्यक्ष गोविन्द केसीले ज्येष्ठ नागरिकहरू आउने, भेटघाट गर्ने, नाचगान गर्ने र चिया, खाजा पुग्नेगरी बजेट आएको बताए । प्राप्त बजेटमध्ये केही बजेट भ्रमणमा पनि खर्च गर्ने गरिएको छ ।
नगरपालिका र सामाजिक विकास कार्यालयले गरी ५ लाख रुपैयाँभन्दा बढी बजेट दिएको उनले बताए । ज्येष्ठ नागरिकका लागि टिभी हेर्न, बाजागाजा बजाउने व्यवस्था पनि गरिएको छ । जिल्लाभरका लागि यो कार्यक्रम सुरु भए पनि हाल मुसीकोटमा मात्रै केन्द्रीत रहेको उपाध्यक्ष केसीले बताए ।
जिल्लाका बाँकी ५ पालिकामा पनि जेष्ठ नागरिक पालिका संघ गठन गरी यस्तै खाले कार्यक्रम सञ्चालन गर्ने योजनामा रहेको उनले सुनाए । ‘केही समय भए पनि ज्येष्ठ नागरिकलाई भुल्ने, रमाउने, भेटघाट होस् भन्ने उद्देश्यले जिल्लाका सबै पालिकामा यो कार्यक्रम सञ्चालनको योजना बनाएका छौं,’ उनले भने ।
प्रकाशित : भाद्र ६, २०७९ ०७:४१
