सुर्खेतमा गुडिरहेको बसमा ढुंगा खस्दा युवतीको मृत्यु- कर्णाली - कान्तिपुर समाचार

सुर्खेतमा गुडिरहेको बसमा ढुंगा खस्दा युवतीको मृत्यु

चाँदनी कठायत

वीरेन्द्रनगर — सुर्खेतमा गुडिरहेको बसमा खसेको ढुंगाले चोट लागेर एक जनाको मृत्यु भएको छ । रत्न राजमार्गअन्तर्गत छिन्चु–धुलियाविट खण्डको भेरीगंगा नगरपालिका–२ पैँसठ्ठीमा सडकमाथिबाट खसेको ढुंगा लागेर दैलेखको भगवतीमाई गाउँपालिका २ का १७ वर्षीया पार्वती शाहीको मृत्यु भएको जिल्ला प्रहरी कार्यालय सुर्खेतले जनाएको छ ।

डिएसपी रामप्रसाद घर्तीका अनुसार काठमाडौंबाट सुर्खेतको वीरेन्द्रनगरतर्फ आउँदै गरेको ना ७ ख ५८–११ नम्बरको रात्रीकालीन बसमा दिउँसो करिब १ बजे ढुंगा खसेको थियो । ढुंगा खस्दा सवारी चालकभन्दा पछाडीको सिटमा बसेका दैलेखकी शाही र वीरेन्द्रनगर–६ का ४५ वर्षीया राजकुमारी सुनार घाइते भएका थिए ।

टाउकोमा गम्भीर चोट लागेकी शाहीलाई प्रदेश अस्पताल पुर्‍याउँदा दिउँसो साढे १ बजेतिर स्वास्थ्यकर्मीले मृत घोषणा गरेको प्रहरीको भनाइ छ । घाइते सुनारको दाहिने कानमा चोट लागेको र अवस्था सामान्य रहेको प्रहरीले जनाएको छ । उनको प्रदेश अस्पतालमा उपचार भइरहेको छ । बसमा ३१ जना सवार थिए । अहिले उक्त बस र चालक वीरेन्द्रनगर नगरपालिका–३ का २९ वर्षीय नमबहादुर रोकायालाई प्रहरीले नियन्त्रणमा लिएको छ ।

प्रकाशित : श्रावण ११, २०७९ १७:१९
प्रतिक्रिया
पठाउनुहोस्

नारायणगढ - बुटवल सडकको दुर्गतिबारे छानबिन गर्न सरकारलाई निर्देशन 

आयोजनाको समयावधि सकिँदा जम्मा १८ प्रतिशत प्रगति 
कान्तिपुर संवाददाता

काठमाडौँ — नारायणगढ–बुटवल सडक स्तरोन्नतिको समयावधि सकिनै लाग्दा भौतिक प्रगति भने १८.४४ प्रतिशत मात्र छ । ठेक्का भएको चार वर्षसम्म पनि दुर्गति अवस्थामै रहेको यस सडकका सम्बन्धमा सबैतिर प्रश्न उठ्न थालेको छ । जनगुनासो बढेपछि प्रतिनिधिसभाको विकास तथा प्रविधि समितिले बुधबार यसबारे छलफल गरेको छ । समितिले भौतिक पूर्वाधार तथा यातायात मन्त्रालय, सडक आयोजना र सम्बद्ध पदाधिकारीसँग यसबारे छलफल गरेको हो । 

आयोजना नै सम्पन्न हुनुपर्ने समयावधिमा पनि निराशाजनक काम हुनुले आयोजनाको ठेक्का नै रद्द गर्नुपर्ने अवस्था सिर्जना भएको भन्दै समितिले गम्भीरतापूर्वक छानबिन गर्न र आवश्यक कारबाहीको प्रक्रिया अगाडि बढाउन प्रधानमन्त्री तथा मन्त्रिपरिषद् कार्यालय र भौतिक पूर्वाधार तथा यातायात मन्त्रालयलाई निर्देशन दिएको छ । समितिले आगामी दिनमा आयोजनाको लागत नबढ्नेगरी निर्धारित समयमा गुणस्तरीय रुपमा काम सम्पन्न गर्न तत्काल समीक्षा गरी उपयुक्त निर्णय लिन निर्देशन दिएको हो ।

एसियन हाइवेका रुपमा स्तरोन्नतिको कार्य अगाडि बढाइएको उक्त सडकमा समितिले गम्भीरतापूर्वक चासो लिई स्थलगत अनुगमनमा देखिएका समस्याहरु समाधानका लागि २०७८ माघ २८ गतेको बैठकबाट निर्देशन दिइसकेको छ । उक्त सडकलाई दुई खण्डमा गरेर ठेक्का गरिएको छ । आर्थिक वर्ष २०७५/७६ मा निर्माण थालिएको आयोजनाको प्रगति सन्तोषजनक नभएको भन्दै समिति सदस्यहरुले चाँडो सक्ने गरी काम गराउनुपर्नेमा जोड दिए । १ सय १३ किलोमिटर दूरी रहेको उक्त सडकको ठेक्का रकम ११६ अर्ब ९९ करोड रुपैयाँ छ । दुबै खण्डको ठेक्का चाइना स्टेट कन्स्ट्रक्सन इन्जिनियरिङ कर्पोरेसनले लिएको हो ।

प्रकाशित : श्रावण ११, २०७९ १७:१८
पूरा पढ्नुहोस्
प्रतिक्रिया
पठाउनुहोस्
x
×