गरिबीले बढ्दै आत्महत्या

छोराछोरी र श्रीमतीसहित घर व्यवहार धान्न समस्या भएपछि उनले आत्महत्या गरेको प्रहरीको अनुसन्धानमा खुलेको छ । वीरेन्द्रनगरकै ७ वर्षीय सम्पूर्ण सुनारले चैत ११ मा अभिभावकले मोबाइल नकिनिदिएको भन्दै घरभित्रै आत्महत्या गरे । पछिल्लो समय गरिबीका कारण आत्महत्या बढेको प्रहरीको निष्कर्ष छ ।

कर्णाली प्रदेश प्रहरी कार्यालयको त्रिवर्षीय तथ्यांक केलाउँदा पनि यस्तो तथ्य देखिन्छ । कार्यालयका अनुसार ३ आर्थिक वर्षमा कर्णालीका ८ सय ८८ जनाले आत्महत्या गरेका छन् । त्यसमध्ये ८ सय ४३ जनाले विष सेवन गरेर र झुन्डिएर आत्महत्या गरेका छन् । प्रदेश प्रहरी कार्यालयका प्रहरी निरीक्षक सुरेन्द्र केसीले गरिबीका कारण पछिल्लो समय आत्महत्या बढ्दै गएको बताए । उनका अनुसार घरेलु हिंसा र बहुविवाहका कारण पनि आत्महत्याको दर बढिरहेको छ ।

एक वर्षअघि सल्यानको कालीमाटी गाउँपालिका–७ का २७ वर्षीय पूर्णबहादुर पुनले २६ वर्षकी रोशनी पुनसँग विवाह गरे । विवाहको १ महिना नबित्दै उनीहरू दुवैले आत्महत्या गरे । उनीहरूले आत्महत्या गर्नुको कारण पनि गरिबी रहेको प्रहरीले निष्कर्ष निकालेको छ । मजदुरी गरेर पेट पाल्दै गरेका पुन परिवारले आर्थिक अभाव बढेपछि २०७७ कात्तिक ४ गते आफ्नै घरमा झुन्डिएर आत्महत्या गरेका थिए । प्रहरीका अनुसार पछिल्लो समय आत्महत्या गर्नेमा बेरोजगार युवायुवती धेरै छन् ।

अधिकारकर्मी चेतन गिरीले कर्णालीमा गरिबी र बेरोजगारी आत्महत्याको पहिलो कारण बनेको बताए । यसको समाधानका लागि रोजगारी सिर्जना गर्नु उपयुक्त विकल्प रहेको उनी बताउँछन् ।