२७.१२°C काठमाडौं
मुगुका १७ हजार विद्यार्थी पाठ्यपुस्तकबाट वञ्चित
मुगु — जिल्लाको चारवटा स्थानीय तहका १ सय ४१ वटा सामुदायिक विद्यालयमा अध्ययनरत करिब १७ हजार विद्यार्थीहरू नयाँ पाठ्यपुस्तकबाट वञ्चित भएका छन् । विद्यालय खुलेको करिब एक महिना भइसक्दा पनि मुगुमा नयाँ पाठ्यपुस्तक उपलब्ध नहुँदा १७ हजार विद्यार्थीलाई पढ्नै मुश्किल परिरहेको छ ।
कोरोना महामारीले गर्दा विगत तीन वर्षसम्म राम्रोसँग पढ्न नपाएका विद्यार्थी अहिले पढ्ने आशा बोकेर विद्यालय जान थालेपछि उल्टै पुस्तकको समस्याले गर्दा विद्यार्थीहरू चिन्तित भएका छन ।
‘स्कुल खुलेको एक महिना भइसक्यो; अझै नयाँ पुस्तक हातमा परेको छैन‚’ महाकाली माध्यमिक विद्यालय कक्षा ८ मा अध्ययनरत दुर्गादेवी शाहीले भनिन् ।
गत जेठ २ गतेबाट शैक्षिकसत्र सुरु भई विद्यार्थी भर्ना अभियान सकेर सामुदायिक विद्यालयमा पठनपाठन सुरु भए पनि सरकारले पाठ्यपुस्तक उपलब्ध गराउन सकेको छैन ।
नयाँ पाठयपुस्तक नआउँदा विद्यार्थीको पठनपाठन प्रभावित हुन थालेको बुद्ध माध्यमिक विद्यालयका प्रधानध्यापक टिकाप्रसाद उपाध्यायको भनाइ छ ।
नयाँ शैक्षिकसत्र प्रारम्भ हुनुभन्दा एक महिनाअघि हिमाली जिल्लामा पाठ्यपुस्तक ढुवानी गरिसक्नु पर्ने नियम भए पनि निर्वाचनले गर्दा असर परेको शिक्षा विकास समन्वय इकाई कार्यालयले जनाएको छ ।
इकाई प्रमुख सूर्य खत्रीका अनुसार स्थानीय निर्वाचनले गर्दा मुगुमा पाठ्यपुस्तक ढुवानी हुन नसक्दा विद्यार्थीको पढाइमा असर परेको छ । छायाँनाथ रारा नगरपालिकाभित्रका विद्यालयका लागि जयलक्ष्मी पुस्तक भण्डारले ढुवानीको जिम्मा लिएको छ भने मुगुम कार्मारोङ गाउँपालिकाअन्तर्गतका विद्यालयको निम्ति यूके जनरल स्टोरले लिएको छ ।
चुनावले गर्दा समयमै नयाँ पुस्तक ढुवानी गर्न नसकेको जयलक्ष्मी पुस्तक भण्डारका प्रोप्राइटर जयलक्ष्मी भामले जनाए । उनी भन्छन्‚ ‘अबको एक हप्ताभित्र पुस्तक जिल्लामा पुग्छ ।’
प्रकाशित : जेष्ठ २०, २०७९ १३:०५
