ऋण लिएर हेलिकप्टरबाट सुत्केरीको उद्धार- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

ऋण लिएर हेलिकप्टरबाट सुत्केरीको उद्धार

छपाल लामा

हुम्ला — हुम्लाको दक्षिणी भेगमा रहेको चङखेली गाउँपालिकाको नेप्का गाउँमा सुत्केरी भएको तीन दिनदेखि नै रक्तश्राव भइरहेकी एक महिलाको हेलिकप्टरमा उद्धार गरिएको छ ।

तस्बिर सौजन्य  : बिरबल घले

ज्यान जाने जोखिम देखिएपछि बचाउनका लागि आफन्त र स्थानीय बासिन्दासँग ऋण लिएर हेलिकप्टरबाट उद्धार गरिएको हो । चङखेली गाउँपालिका ५ की सुत्केरी महिला ३५ वर्षीया तुला तामाङको उद्धार गरिएको हो ।

सुत्केरी महिलाका देवर जशिलाल तामाङले तुलाको सुत्केरी भएको तीन दिनसम्म लगातार रक्तश्राव नरोकिएपछि ऋण गरी उद्धार गरिएको बताएका छन् । जिल्ला अस्पतालकी वरिष्ठ अनमी सरिता बोहराले सुत्केरी भएदेखि रक्तश्राव नरोकिएका कारण उनलाई जिल्ला अस्पतालमा ल्याउनु परेको बताइन् ।

उनको शरीर सुनिनुका साथै श्वासप्रश्वासमा समेत समस्या देखिएको बोहराले बताइन् । वरिष्ठ अनमी बोहरा सिमकोटबाट हेलिकप्टरमा आफैं सुत्केरी लिन नेक्पा पुगेकी थिइन् । अस्पतालमा सुत्केरी तामाङको अहिले उपचार सुरु भएको छ ।

महिलाका देवर तामाङका अनुसार हेलिकप्टर भाडा व्यक्तिगत रूपमा तिरिएको हो । वरिष्ठ अनमी बोहराले राष्ट्रपति महिला उत्थान कार्यक्रमले सुत्केरी वा गर्भवतीका लागि जिल्ला बाहिर उद्धार गर्नुपर्दा मात्र हेलिकप्टर भाडा तिर्ने गरेको र जिल्लाभित्रै उद्धार गर्दा नदिने गरेको बताइन् ।

दुर्गम जिल्लाभित्रै हेलिकप्टरबाट उद्धार गर्दा सरकारले लगानी नगर्नु विभेद भएको सुत्केरीका आफन्तले गुनासो गरेका छन् । नेक्पा पुग्न सदरमुकाम सिमकोटबाट तीन दिन पैदल लाग्छ ।

नेप्पा गाउँमा राम्रो स्वास्थ्यचौकी नहुँदा यस्तो समस्या परेको उनले बताइन् । 'ज्यान त बचायौं तर आफन्तको ऋण तिर्न गाह्रो छ,' तुल तामाङले बताइन् । यसरी आपतका बेला महंगोमा हेलिकप्टरको प्रयोग गर्नुपर्ने तुलाको मात्रै नभएर नेक्पा गउँका बासिन्दाहरूको नै बाध्यता छ ।

नेप्काका महिलाहरु सुत्केरी हुँदा ज्यन गुमाउनु परेको र पैसा नभए आफ्नो ज्यान पनि जाने तामाङले बताइन् । हुम्लामा हरेक महिना ४ जनासम्म यस्तो समस्याबाट गुज्रने गरेको अनमी बोहोराले बताइन् । एक हप्ताअघि पनि खापुनार्थ गाउँपालिकाबाट एक महिलालाई सुर्खेत अस्पतालमा हेलिकप्टरबाट उद्धार गरिएको थियो।

प्रकाशित : जेष्ठ ७, २०७९ २०:११
प्रतिक्रिया
पठाउनुहोस्

भारतमा पेट्रोल र डिजेलको मूल्य समायोजन

कान्तिपुर संवाददाता

नयाँदिल्ली — भारत सरकारले पेट्रोल र डिजेलको मूल्य घटाएको छ । पेट्रोल र डिजेलको मूल्यमा लगातार बढोत्तरीपछि आलोचना खेपिरहेको सरकारले इन्धनमाथि लगाइएको कर (एक्साइज ड्यूटी) लाई कम गरेर मूल्य घटाएको हो ।

अब भारतमा पेट्रेल हालभन्दा प्रति लिटर ९ रुपैयाँ ५० पैसा र डिजेल ७ रुपैयाँले सस्तो भएको छ । वित्तमन्त्री निर्मला सीतारमणले पेट्रोलमा ८ र डिजेलमा ६ रुपैयाँ प्रति लिटर एक्साइज ड्यूटी घाटाउने निर्णय गरेको जानकारी सार्वजनिक गरेकी छन् ।

जसकारण आम उपभोक्तालाई राहत हुने अपेक्षा गरिएको छ । प्रधानमन्त्री उज्जवला योजना अन्तर्गत खाना पकाउने ग्यासमा पनि प्रति सिलिन्डिर २ सय रुपैयाँ छुट दिएर आम मानिसले खरीद गर्ने सिलिन्डरलाई सस्तो बनाइएको छ ।

२२ मार्चपछि भारतमा लगातार इन्धनको मूल्यवृद्धि हुँदै आएको थियो। भारतमा सबैभन्दा महँगो महाराष्ट्रमा प्रति लिटर पेट्रोलको मूल्य १ सय २३ रुपैयाँ ४६ पैसा पुगेको थियो । आन्ध्र प्रदेशमा प्रति लिटर डिजेलको मूल्य १०७ रुपैयाँ ६१ पैसा थियो । नयाँदिल्लीमा पेट्रोल मूल्य १ सय ५ रुपैयाँ ४१ पैसा र डिजेल ९६ रुपैयाँ ६७ पैसा छ । शनिबार मध्यरातिबाट उक्त मूल्यमा कमी आउनेछ ।

प्रकाशित : जेष्ठ ७, २०७९ २०:०४
पूरा पढ्नुहोस्
प्रतिक्रिया
पठाउनुहोस्
×