ट्र्याक खुलेको ४६ वर्षसम्म पनि सुध्रिएन सडक

सडक नबनेको भन्दै चौतर्फी आलोचना भएपछि सरकारले गत असार २८ मा सडक स्तरोन्नति गर्ने भन्दै ठेक्का खोल्यो । सडक कालोपत्र गर्न १ अर्ब ३ करोड २३ लाख रुपैयाँमा कालिका–केएस– भेरासी जेभीसँग सम्झौता गरिए पनि अझै काम सुरु भएको छैन । ३० महिनामा काम सम्पन्न गर्ने भन्दै ठेकेदारले सडक निर्माणको जिम्मा लिए पनि अहिलेसम्म सामान्य कामसमेत हुन नसकेको स्थानीय रामबहादुृर बुढाले बताए । उनका अनुसार ३५ किलोमिटर दूरीको सडकमा रुख कटानमा ढिलाइ भएको भन्दै कम्पनीले काम सुरु नगरेको हो । ‘हामीले कहिलेसम्म धुलाम्मे र हिलाम्मे यात्रा गर्नुपर्ने हो ?,’ उनले भने, ‘ठेक्का भएको ९ महिना बित्यो, अहिलेसम्म केही काम भएको छैन ।’

अहिले डिभिजन वन कार्यालयले वन विभागको आदेशबिना रुख कटान गर्न नहुने भन्दै सडकको काम रोकेको छ । ‘रुख कटानको अनुमति मन्त्रिपरिषद्बाट मात्र मिल्छ,’ डिभिजन प्रमुख मुनबहादुर रावतले भने, ‘निर्णय भएर विभागले हामीलाई पत्र लेखेपछि मात्र सडक निर्माण गर्न दिइनेछ ।’

मदन भण्डारी राजमार्ग योजना कार्यालयका प्रमुख मुकुन्दप्रसाद लामिछानेले अहिले ठेकेदार कम्पनीले सडक चौडा बनाउने, नाला, ग्याबिन बिछ्याउनेलगायत काम थाले पनि गति नलिएको बताए । ‘रुख कटान नभए र निर्माण व्यवसायी नतातिँदासम्म बाँकी रहेको २१ महिना पनि यत्तिकै जाला जस्तो छ,’ उनले भने, ‘ठेकेदार पक्षलाई ताकेता गरिहेका छौं, रुख कटान नभए पनि अरु कामलाई त तीव्रता दिन सकिन्थ्यो नि !’

यो सडकले पूर्वमा लेकबेसी, गुर्भाकोट, वीरेन्द्रनगर, बराहताल, पञ्चपुरी र चौकुनेलाई जोड्छ । सडकमा १२ पुल निर्माणका लागि विभिन्न ठेकेदार कम्पनीसँग सम्झौता गरिसकिएको छ ।