हुम्लाका २४ हजार बालबालिकालाई टाइफाइडविरुद्धको खोप लगाइने- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

हुम्लाका २४ हजार बालबालिकालाई टाइफाइडविरुद्धको खोप लगाइने

जनकबहादुर शाही

हुम्ला — हुम्लाका २४ हजार बालबालिकालाई टाइफाइडविरुद्धको खोप लगाइने भएको छ । सातवटा स्थानीय तहका १५ महिनादेखि १५ वर्षमुनिका २४ हजार १ सय ४९ जना बालबालिकालाई टाइफाइड खोप लगाइने स्वास्थ्य सेवा कार्यालय हुम्लाका प्रमुख प्रेमबहादुर सिंहले बताए ।

स्वास्थ्य सेवा कार्यालय हुम्लाद्वारा सोमबार सदरमुकाम सिमकोटमा आयोजित एक दिने गोष्ठीमा चैत २५ गतेदेखि वैशाख पाँच गतेसम्म सबै पालिकाका बालबालिकालाई टाइफाइड रोगविरुद्धको खोप लगाउन अभियान सञ्चालन गरिने भएको हो । कार्यालयका प्रमुख सिंहका अनुसार देशैभरि एक चरणमा यही चैत २५ गतेदेखि आगामी वैशाख १८ गतेभित्र सम्पन्न गर्ने गरी तय भएको मितिअनुसार खोप लगाइने भए पनि हुम्ला भौगोलिक आधारमा विकट भएका कारण चैत २५ देखि वैशाख पाँच गतेसम्म खोप लगाएर सम्पन्न गरिने भएको हो ।

जिल्लाको उत्तरी नाम्खा गाउँपालिकाको लिमीमा रहेका बालबालिकाका लागि स्वास्थ्यकर्मी खटाइएका स्वास्थ्यकर्मी यदि हिमपातले र विविध समस्याले त्यहाँ जान नसके दोस्रो पटकको अभियानमा पुनः पठाइने भएको कार्यालयका प्रमुख सिंहले बताए ।

हुम्लाका सातवटा गाउँपालिकामा नाम्खामा १८, सिमकोटमा २५, खार्पुनाथमा १८, सर्केगाडमा २५, चंखेलीमा २५, अदानचुलीमा १९ र ताजकोटमा २० गरेर १५० वटा खोप केन्द्रबाट यहाँका बालबालिकालाई टाइफाइड रोगविरुद्धको खोप लगाइने भएको हो । खोप पाउने बालबालिकाको संख्या नाम्खा गाउँपालिकामा एक हजार ९१, सिमकोट ५ हजार २ सय ८३, खार्पुनाथ २ हजार ९सय ३०, सर्केगाड ४ हजार ९ सय ९०, चंखेली २ हजार ८ सय ५५, अदानचुली ३ हजार ९ सय २२ र ताँजकोटमा ३ हजार ७८ गरि २४ हजार बालबालिकालाई खोप लगाइने भएको छ ।

हुम्ला भौगोलिक रुपमा विकट जिल्ला भएर चैत २५ देखि वैशाख ५ सम्म नेपाल सरकारको यो अभियान सम्पन्न गर्ने लक्ष्य रहेको छ । टाइफाइड रोगविरुद्धको खोप अभियान सफल पार्न जिल्ला खोप समन्वय समिति र सञ्चार क्षेत्रको अभिमुखीकरण कार्यक्रम सञ्चालन गरिएको छ । उक्त कार्यक्रममा प्रमुख जिल्ला अधिकारी सीता परियार जिल्लास्थित सुरक्षा निकायका प्रमुख लगायत सञ्चारकर्मीको सहभागिता थियो ।

प्रकाशित : चैत्र २२, २०७८ ०८:४५
प्रतिक्रिया
पठाउनुहोस्

राष्ट्रिय प्रसारण लाइन अध्ययन गर्न विज्ञ टोली हुम्लामा

जनकबहादुर शाही

हुम्ला — दिनहुँ लोडसेडिङको मार खेपिरहेको हुम्लामा राष्ट्रिय प्रसारण लाइनको अध्ययन गर्न विज्ञ टोली आइपुगेको छ । हालसम्म विद्युत् प्राधिकरणको राष्ट्रिय प्रसारण लाइन नजोडिएका हिमाली जिल्ला हुम्ला र मुगुका लागि अध्ययन गर्न नेपाल विद्युत् प्राधिकरणको समन्वयमा परामर्शदाता विज्ञ टोली जिल्लामा आइपुगेको हिल्दुम वितरण केन्द्रका प्रमुख ईन्जिनियर साजन ऐडीले बताए ।

हुम्लाका सिमकोट, खार्पुनाथ, सर्केगाड, चंखेली, अदानचुलीको दोमुख हुँदै मुगुको गमगढीसम्म राष्ट्रिय प्रसारण लाइनको वातावरणीय प्रभाव मूल्यांकन गर्न नेपाल विद्युत् प्राधिकरण इन्जिनियरिङ कम्पनीका समाजशास्त्री सुवर्ण चन्दको नेतृत्वमा चार सदस्यीय टोली हुम्ला आइपुगेको हो । कम्पनीले पहिले गुगलबाट अध्ययन गरेको र अब स्थलगतरुपमै अध्ययन गर्ने प्रमुख ईन्जिनियर ऐडीले बताए ।

टोलीले हुम्ला र मुगुका ६ वटा स्थानीय तहका ३६ वटा वडासँग छलफल गर्ने कार्यक्रम छ । टोलीले शनिबारदेखि सिमकोटबाट जनप्रतिनिधि र स्थानीयहरुसँग छलफल सुरु गरेको छ । टोलीले हुम्ला सदरमुकाम सिमकोटदेखि मुगु सदरमुकाम गमगढीसम्म ३५ दिन लगाएर स्थलगतरुपमा अध्ययन गर्न समय तालिका बनाएको टोली नेता चन्दले बताए । आफूले गरेको वातावरणीय प्रभाव मूल्यांकनको अन्तिम प्रतिवेदन आउँदो असारसम्म प्राधिकरणलाई बुझाउने र आगामी आर्थिक वर्षबाट राष्ट्रिय प्रसारण लाइनको जडान सुरु हुने उनले बताए ।

प्रकाशित : चैत्र २०, २०७८ १६:१५
पूरा पढ्नुहोस्
प्रतिक्रिया
पठाउनुहोस्
×