सेतो 'कार्पेट'मा रारा [फोटोफिचर]

घाम लागेको दिन हिउँले गर्दा रारा चाँदी झैं टल्किने गरेको छ । रारा क्षेत्र वरिपरि जमेको हिउँ फागुन महिनासम्म रहने भएकाले यो समयमा आउने पर्यटकहरूले राराको यो अनुपम सौन्दर्यको अवलोकन गर्न पाउने अधिकृत दाहालले बताए ।

ताल वारिपारिबाट बगेर आउने मझौला खोलाहरू पनि हिउँले पुरिएका छन् । माथिबाट हिउँले ढाकेको र भित्र सलल गरेर पानी बगेको आवाज सुनिने गरेको छ ।

सल्लेरीदेखि रारा तालको छेउसम्मको बाटोमा हिउँले गर्दा खुट्टा डुब्ने गरेका छन् ।

घुम्ने पर्यटक शून्य
पर्यटकीय गन्तव्य रारा डेढ महिनादेखि पर्यटकविहीन भएको छ । एकातिर कोभिड महामारी‚ अर्कोतिर हिमपातलले गर्दा रारा घुम्न आन्तरिक तथा बाह्य पर्यटक नआँउदा रारा सुनसान देखिने गरेको छ ।

मंसिर महिनासम्म काठमाडौं‚ पोखरा, बुटवल, पाल्पा, नेपालगन्ज लगायत सहरबाट आन्तरिक पर्यटक रारा घुम्न आए पनि पुस लागेपछि यो क्रम रोकिएको छ । पर्यटक नआउँदा रारा क्षेत्र वरपरका एक दर्जन साना र मझौला होटलसमेत बन्द छन् ।