भत्कियो निर्माणाधीन बेलिब्रिज- कर्णाली - कान्तिपुर समाचार

भत्कियो निर्माणाधीन बेलिब्रिज

५५ मिटर लामो पुल निर्माणको अन्तिम चरणमा थियो‚ प्राविधिक जाँचपछि क्षतिको यकिन विवरण आउने
राजबहादुर शाही

मुगु — मुगु–हुम्ला लिंकरोडअन्तर्गत भट्टेचौर रुघाघाटमा मुगु कर्णाली नदीमा निर्माणाधीन बेलिब्रिज शुक्रबार भत्किएको छ । निर्माण सामग्री जडान गर्ने क्रममा पुल भत्किएको हो ।

५५ मिटर लामो उक्त पुलको ९ मिटर खण्ड मात्रै बनाउन बाँकी थियो । पुल छायानाथ–रारा नगरपालिकाको ५ करोड ३० लाख रुपैयाँ लागतमा निर्माण भइरहेको थियो । ‘डोजरको बकेटले सपोर्ट गर्न खोज्दा धान्न नसकेर पुल नै भत्कियो,’ पुल निर्माणको जिम्मा लिएको जलन–रवि–चक्र जेभीका प्रोप्राइटर बखतबहादुर मल्लले भने, ‘झन्डै बनिसकेको पुल भत्किएपछि अब फेरि निर्माण गर्नुपर्ने भयो ।’

बेलिब्रिज भत्किएपछि केही समय स्थानीयले थप सास्ती भोग्नुपर्ने अवस्था आएको नगर प्रमुख हरिजंग शाहीले बताए । ‘अरू पुलजस्तो धेरै क्षति त भएको छैन,’ उनले भने, ‘बेलिब्रिज भएकाले फेरि पार्टपुर्जा खोलेर निर्माण गर्नुपर्ने हुन्छ ।’ उनले प्राविधिक जाँचपछि पुल भत्किएको बारे विस्तृत विवरण आउने बताए ।

ग्रामीण पहुँच कार्यक्रमले मुगु–हुम्ला लिंकरोड निर्माणको काम पूरा गरिसकेको छ । संस्थाले ३७ किलोमिटर सडक निर्माणको काम पूरा गरेपछि प्रदेश सरकारलाई हस्तान्तरण गरेको थियो भने मुगुको चंखेलीदेखि हुम्ला दार्मसम्मको ३० किलोमिटरको झन्डै ९० प्रतिशत काम पूरा भइसकेको छ । मुगुतर्फको काम पूरा भएर एक वर्षअघि हस्तान्तरण भएपछि नगरपालिकाले पुल बनाउन थालेको थियो । भट्टेचौरमा पुल नहुँदा मुगु हुँदै हुम्ला जाने यात्रु बीचमा गाडीबाट झरेर नदी पार गर्नुपर्ने र खाद्यान्न, दैनिक उपभोग्य सामग्री तथा निर्माण सामग्रीसमेत पल्टी गरेर ढुवानी गर्नुपर्ने बाध्यता छ ।

साविक जिल्ला प्राविधिक कार्यालयले ९ करोड रुपैयाँ बजेटबाट भट्टेचौरमै निर्माणाधीन बेलिब्रिजको काम पनि झन्डै एक दशकदेखि अलपत्र छ । उक्त पुल अलपत्र बनेपछि नगरपालिकाले बजेट छुट्याएर सोही स्थान नजिकै बेलिब्रिज निर्माणको काम थालेको हो । ठेकेदार राजु कार्कीले आयोजनास्थलमा कडा चट्टान भेटिएपछि पुल बनाउन नसकिएको भन्दै काम बीचैमा छाडेका थिए । प्राविधिक कार्यालयको बजेटमा निर्माण गर्न लागिएको पुलको विषयमा ठेकेदार र सरोकारवाला निकायसँग छलफल चलिरहेको जिल्ला समन्वय समिति प्रमुख पूर्णबहादुर रोकायाले बताए ।

प्रकाशित : माघ ११, २०७८ १२:४१
प्रतिक्रिया
पठाउनुहोस्

महिलालाई समान ज्याला

भरत जर्घा मगर

सिरहा — सिरहा कल्याणपुर नगरपालिका–३ का महिलाले संगठित भएर आवाज उठाएपछि पुरुषसरह ज्याला पाउन थालेका छन् । सँगै काम गरेका पुरुषले ५ सय पाउने तर महिलाले भने ३ सय रुपैयाँमै चित्त बुझाउनुपर्थ्यो । समान ज्याला दिनुपर्ने मागसहित ‘काम बन्द’ आन्दोलन गरेपछि आफूहरूको माग पूरा भएको उनीहरूले बताए ।

मुक्ति नेपाल गोलबजारले कल्याणपुर–३ पर्साहीका दलित महिलाहरूको सामाजिक, आर्थिक तथा सांस्कृतिक रूपान्तरणका लागि ‘नागरिक सक्रियता’ परियोजनाअन्तर्गत महिलाहरूलाई संगठित गर्न सामुदायिक संवाद केन्द्र गठन गरेको थियो । केन्द्रमार्फत जनचेतनाका विषयमा छलफल चलाएपछि ज्यालाको विषयमा कुरा उठेको केन्द्रका अध्यक्ष पानो देवी सदा बताउँछिन् ।

‘केन्द्रमा महिला हिंसा, अपांगता भएकाहरूको समस्या, नागरिकता समस्या, विभिन्न सरकारी निकायले प्रवाह गर्ने सेवा सुविधा र त्यसमा पहुँच, शिक्षा, स्वास्थ्यमा पहुँचको विषयमा छलफल चल्यो,’ उनले भनिन् ‘छलफल चलिरहेकै बेला एक दिन ज्यालाको विषयमा पनि कुरा उठ्यो, ज्यालामा विभेद भएको जानकारी पायौं, त्यसपछि हामी महिला संघर्षमा उत्रियौं ।’

संघर्ष घोषणा गरे पनि आन्दोलन लम्बिए कसरी छाक टार्ने भन्ने पिरलो उनीहरूलाई थियो । ‘त्यही दिनदेखि हामीले २० महिला एकताबद्ध भई मुठी संकलन गरी आन्दोलन तयारी कोष खडा गर्‍यौं,’ आशा सदाले भनिन्, ‘त्यसपछि मात्र ज्याला वृद्धिको मागसहित संघर्षमा उत्रियौं ।’ महिलाले ज्याला वृद्धि नगरेसम्म काममा नजाने जनाएपछि ज्याला वृद्धि गर्न गिरहत (साहु) तयार भए । आशाका अनुसार अहिले घर निर्माण, माटो बोक्ने, लिपपोत गर्ने र खेतीपातीका काममा पुरुषसरह ज्याला पाउने गरेका छन् ।

कामको चटारो हुने बेला धान रोप्ने समय छानेर गत असारमा एक सातासम्म महिलाहरूले काम बन्द संघर्ष चलाएका थिए । ‘किसानहरूलाई पनि खेतमा काम गर्न जान दिएनौं र छिमेकका गाउँहरूमा पनि हाम्रो योजनाबारे सुनाएर काममा आउन दिएनौं । एक साताकै अवधिमा गिरहत ज्याला समान गर्न सहमत भए,’ आशाले भनिन्, ‘अब बराबर ज्याला पाउँछौं ।’ ज्याला वृद्धि संघर्षको प्रभाव छिमेकी गाउँहरूमा समेत पर्‍यो । त्यही प्रभावले वरपरका वडा तथा गाउँहरूमा पनि ज्याला वृद्धि भएको छ ।

महिला संगठित हुन थालेपछि सुरुमा पीपलको रूखमुनि बैठक गर्ने गरेका दिनाभद्री डिहीबार संवाद केन्द्रका महिलाहरू अहिले आफ्नै भवनमा बैठक गर्छन् । उनीहरूले नगरपालिकासँग बजेट माग गरी बैठक, छलफल र बिहेबटुलमा आउने पाहुना राख्ने घर बनाएका छन् । नगरपालिकाको आर्थिक सहयोग र संवाद केन्द्रको सक्रियतामा भवन निर्माण भएको संवाद केन्द्रकी सदस्य जहरी सदाय बताउँछिन् । यसमा उनीहरूलाई गाउँका पुरुषहरूले पनि साथ दिएका छन् ।

केन्द्रमा उनीहरूले शिक्षा र स्वास्थ्यका विषयमा पनि सुधार ल्याउने प्रयास गरेका छन् । आफ्नै छोराछोरी पढ्ने विद्यालय कहिल्यै नजाने यहाँका अभिभावकहरू बेलाबेला विद्यालय पुग्न थालेका छन् । संवाद केन्द्रमा आबद्ध महिलाहरूले नियमित एक रुपैयाँ बचत गर्छन् ।

संवाद केन्द्रले विभिन्न समस्याका कारण जन्मदर्ता गराउन नसकेका बालबालिकाको जन्मदर्ता, नागरिकता बन्न नसकेकाहरूलाई वडा कार्यालयसम्म पुगेर नागरिकता बनाउन सहयोग पुर्‍याउँदै आएको बताउँछन् मुक्ति नेपालका कार्यक्रम निर्देशक अशोककुमार कामती । उनका अनुसार केन्द्रमा आबद्ध भएपछि महिलाहरू सबैसँग सहजै आफ्ना कुरा राख्न सक्ने भएका छन् ।

प्रकाशित : माघ ११, २०७८ १२:३८
पूरा पढ्नुहोस्
प्रतिक्रिया
पठाउनुहोस्
×