प्रदेश लोकसेवाले खोल्यो कर्मचारी भर्ना- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

प्रदेश लोकसेवाले खोल्यो कर्मचारी भर्ना

जनशक्ति अभावले विभिन्न भौतिक संरचना निर्माणले गति लिन सकेको छैन
चाँदनी कठायत

वीरेन्द्रनगर — कर्णाली प्रदेश लोकसेवा आयोगले ३ सय ७२ पदपूर्तिका लागि विज्ञापन आहृवान गरेको छ । गठन भएपछि पहिलोपटक आयोगले मंगलबार खुला तथा समावेशी प्रतियोगितात्मकतर्फ लिखित परीक्षाको विज्ञापन गरेको हो ।

आयोगले प्रदेश निजामति सेवा र स्थानीय सरकारी सेवा पाँचौं तहका विभिन्न सेवा समुहका प्राविधिक र अप्राविधिक तर्फका विज्ञापन प्रकाशित गरेको छ । अप्राविधिक पाँचौं तहको खुला तर्फ ६८, महिलातर्फ १८ र आदिवासी जनजातीतर्फ ६ जनाका लागि विज्ञापन गरिएको छ । यस्तै, प्राविधिकतर्फ सव–ईन्जिनियर ५७, कृषि प्राविधिक ६२, पशु प्राविधिक ३७, हेल्थ असिस्टेन्ट ३०, स्टाफ नर्स २३ जनाका लागि विज्ञापन गरिएको हो ।

डेढ सय स्वास्थ्यकर्मी करारमा माग

कर्णाली प्रदेशको सामाजिक विकास मन्त्रालयले १ सय ५० चिकित्सक तथा स्वास्थ्यकर्मीका लागि विज्ञापन खुलाएको छ । प्रदेश सरकारको गत बुधबार बसेको मन्त्रिपरिषद् वैठकले सेवा करारमा कर्मचारी थप गर्ने निर्णयसहित मन्त्रालयले चिकित्सक तथा स्वास्थ्यकर्मी सेवा करारमा लिन सूचना प्रकाशित गरेको हो । मन्त्रालयका प्रवक्ता विष्णुप्रसाद अधिकारीले मन्त्रालय मातहतका अस्पताल र स्वास्थ्य सेवा कार्यालयमा रिक्त दरबन्दीमा पदपूर्ति गर्न विज्ञापन गरिएको जानकारी दिए । उनका अनुसार मन्त्रालयले नवौं तहको चिकित्सकका लागि ५४, मेडिकल अधिकृत २० सहित आठौं तहका लागि २१, सातौँ तहका लागि १६, स्टाफ नर्स ३८ सहित पाँचौं तहको ५० र चौथो तहका नौ जना गरी १ सय ५० चिकित्सक तथा स्वास्थ्यकर्मी माग गरेको हो ।

कर्णाली प्रदेशको भौतिक पूर्वाधार तथा सहरी विकास मन्त्रालयमा ३ सय ५३ कर्मचारीको दरबन्दी छ । तीमध्ये १ सय २६ पद रिक्त छन् । स्वीकृत दरबन्दीमध्ये २ सय २७ पद मात्रै पूर्ति भएको छ । भौतिक पूर्वाधारतर्फ छुट्टिएको बजेट कार्यान्वयन गर्न मन्त्रालयले जनशक्ति अभाव झेलिरहेको छ । जनशक्ति अभाव हुँदा मन्त्रालयले विभिन्न भौतिक संरचना निर्माणमा गति लिन सकेको छैन । चालू आर्थिक वर्षदेखि थप भएको जलस्रोत तथा उर्जा विकास मन्त्रालयको जिम्मेवारीसमेत भौतिकका कर्मचारीले सम्हाल्नुपर्दा थप अभाव सिर्जना भएको छ ।

प्रदेशको भूमि व्यवस्था, कृषि तथा सहकारी मन्त्रालयमा ३ सय ६२ कर्मचारीको दरबन्दी छ । मन्त्रालयमा २ सय १० जना कर्मचारीको पद रिक्त छ । मन्त्रालयमा हाल १ सय ५२ कर्मचारी कार्यरत छन् । कृषि, पशु, भूमी र सहकारीतर्फका ठूला ठूला आयोजना कार्यान्वयन गर्नुपर्ने मन्त्रालयमा जनशक्ति नहुँदा बजेट कार्यान्वयनमा समस्या हुने गरेको छ ।

मुख्यमन्त्री तथा मन्त्रिपरिषद् कार्यालय र आन्तरिक मामिला तथा कानून मन्त्रालय मातहतका कार्यालयहरू जिल्लामा छैनन् । भर्खरै स्थापना भएको ऊर्जा विकास तथा सिँचाइ मन्त्रालयले पनि मातहत कुनै कार्यालय राखेको छैन । बाँकी रहेका मन्त्रालय मातहतका ८० कार्यालय दरबन्दी अनुसारका कर्मचारी नहुँदा निमित्तका भरमा सञ्चालनमा छन् ।

सामाजिक विकास मन्त्रालयमा १ हजार ८३ कर्मचारीको दरबन्दी स्वीकृत भएको छ । तर त्यसमध्ये ४ सय ९ जना कर्मचारी मात्रै कार्यरत छन् । ६ सय ७४ कर्मचारीको पद खाली छ । स्वास्थ्यतर्फ कोरोना भाइरसको महामारीका कारण सिर्जना भएको समस्या समाधानमा कर्मचारी संकटले बाधा पुर्‍यायो । प्रदेशसभा सचिवालयले पनि कर्मचारी अभाव झेलिरहेको छ । सचिवालयमा स्वीकृत दरबन्दी ३४ रहे पनि १६ जनाको मात्र पदपूर्ति भएको छ । अझै १८ कर्मचारी अपूग छन् ।

प्रदेश सरकार मातहत अहिले ८ मन्त्रालय र मन्त्रालय मातहत १ सय ११ कार्यालय छन् । सामजिक विकास मन्त्रालयअन्तर्गतका ९ जिल्ला आयुर्वेद स्वास्थ्य केन्द्र र सुर्खेतमा प्रदेश जनस्वास्थ्य प्रयोगशाला स्थापनाको क्रममा छन् । यी कार्यालय स्थापना भएपछि प्रदेशमा १ सय ३४ वटा कार्यालय हुनेछन् ।

अहिले प्रदेशभरि २ हजार ७ सय ५१ स्वीकृत दरबन्दी रहेकोमा १ हजार ५ सय ९३ पदपूर्ति भएको छ ।

प्रदेश मातहतका कार्यालयमा मात्र अझै १ हजार १ सय ५८ कर्मचारीको पद रिक्त रहेको मुख्यमन्त्री तथा मन्त्रिपरिषद् कार्यालयका सचिव भरतकुमार शर्माले बताए । उनका अनुसार प्रदेश सरकारले नयाँ कार्यालय र कर्मचारीको संगठन तथा व्यवस्थापन तयार गर्दैछ । ‘प्रदेशमा कति कर्मचारीको पद रिक्त छ भन्ने पुस मसान्तसम्म तयार हुन्छ,’ उनले भने, ‘त्यसपछि अहिले कर्मचारीको दरबन्दी र रिक्त दरबन्दीको विषयमा रिपोर्ट तयार भएपछि कति थपघट गर्ने भनेर नयाँ व्यवस्थापन गर्दैछौँ ।’

प्रकाशित : माघ ३, २०७८ ११:३५
प्रतिक्रिया
पठाउनुहोस्

चिसोले जनजीवन कष्टकर

भवानी भट्ट

कञ्चनपुर — लगातारको शीतलहर र हस्सुसँगै चिसो बढेपछि जनजीवन कष्टकर हुन पुगेको छ । पश्चिम तराईको कैलाली र कञ्चनपुरमा दिन प्रतिदिन चिसो बढ्दै गएको हो । चिसो बढ्पछि दैनिक ज्यालादारी गर्ने र सुकुम्बासी परिवार निकै समस्यामा परेका छन् ।

चिसोका कारण काममा जान नसक्दा भोकै बस्नुपर्ने अवस्था आएको उनीहरू बताउँछन् । ‘काममा जान चिसो धेरै छ, नजाउँ कति दिन यस्तै रहने हो थाहा छैन,’ भीमदत्त नगरपालिका—१८ सालघारीका करन लुहारले भने, ‘दिनभरि आगो तापेर बस्नुपरेको छ ।’ उनी महेन्द्रनगर क्षेत्रमै ज्याला मजदुरीको काम गरेर परिवारको गुजारा चलाउँदै आएका छन् ।

बाढी तथा विभिन्न कारणले विस्थापित भएकाहरू चिसोले झनै प्रभावित भएका छन् । जिल्लाका विभिन्न क्षेत्रका शिविरमा बसोबास गरिरहेका उनीहरूलाई चिसोले रात कटाउन समेत मुस्किल हुन थालेको हो । ओढ्ने ओछ्याउने समेत पर्याप्त मात्रामा नभएका कारण आगो तापेर रात काट्नुपर्ने उनीहरू बताउँछन् । कञ्चनपुरको शुक्लाफाँटा नगरपालिका–१० बनहरा विशिर, कृष्णपुरका वैलकुण्डी शिविर र शुक्लाफाँटा राष्ट्रिय निकुञ्जभित्रको ढक्का शिविरलगायत जिल्लाका आधा दर्जन बढी स्थानमा सुकुम्बासीका शिविरहरू छन् । ती शिविरमा बसोबास गर्नेहरू दिनभरि ज्याला मजदुरी गरेर गुजारा चलाउँदै आएका छन् । चिसोका कारण मजदुरी गर्न नसकेपछि झनै समस्या भएको उनीहरू बताउँछन् । ‘जहाँ मजदुरी पायो त्यहीँ जान्थ्यौं, दिनभरि काम गरेर साँझ पिठो चामल ल्याउँथ्यौं,’ शुक्लाफाँटा नगरपालिका—१० बनहरा शिविरका गगन ताम्राकारले भने, ‘चिसो बढेपछि सबै ठप्प भएको छ, खान मात्रै होइन ओढ्ने ओछ्याउने लुगासमेत छैनन् ।’ आगो ताप्न दाउरासमेत नभएको उनले बताए ।

कैलाली कञ्चनपुरमा केही दिनयता घाम लागेको छैन । दिनभरि हुस्सु मात्रै लाग्ने गरेको छ । पुस अन्तिमसम्म दिउँसोको समयमा केहीबेर घाम लाग्ने गरे पनि तीन दिनयता घाम लागेको छैन । गत साता तीन दिनसम्म परेको लगातारको वर्षाले समेत चिसो बढेको हो । जलवायु तथा मौसम विज्ञान विभागको फिल्ड कार्यालयका अनुसार न्यूनतम तापक्रम १० डिग्री सेल्सियसका आसपास भए पनि दिनभरि घाम नलाग्दा चिसो बढी भएको हो ।

प्रकाशित : माघ ३, २०७८ ११:३३
पूरा पढ्नुहोस्
प्रतिक्रिया
पठाउनुहोस्
×