१७.१२°C काठमाडौं
पोखरा — गण्डकी प्रदेशसभा सांसदहरुले बिहीबार पद तथा गोपनीयताको शपथ ग्रहण गरेका छन् । प्रदेशसभा हलमा उनीहरूलाई ज्येष्ठ सदस्य मित्रलाल बस्यालले शपथ गराएका हुन् । बस्यालले बुधबारमात्रै प्रदेशप्रमुख पृथ्वीमान गुरुङसँग शपथ लिएका थिए ।
६० सदस्यीय प्रदेशसभा सदस्यमध्ये बिहीबार बस्यालले ५९ जनालाई शपथ गराएका हुन् । कांग्रेसकी सरस्वती गुरुङ, राप्रपाका पञ्चराम गुरुङले गुरुङ भाषा र कांग्रेसकै पार्वती तामाङले तामाङ भाषामा शपथ लिएका थिए भने अरुले नेपाली भाषामै शपथ लिएका थिए । केही सांसदहरू आफ्नै मौलिक पोशाक लगाएर शपथ ग्रहणका लागि प्रदेशसभा प्रवेश गरेका थिए ।
गण्डकी प्रदेशसभामा २७ सिटसहित कांग्रेस पहिलो दल बनेको छ । यसैगरी २२ सिटसहित एमाले दोस्रो, ८ सिटसहित माओवादी केन्द्र तेस्रो पार्टी बनेका छन् । राप्रपा २ र एकीकृत समाजवादीको एक सिट छ । गण्डकी प्रदेशप्रमुख पृथ्वीमान गुरुङले आगामी सोमबार प्रदेशसभा अधिवेशनको आह्वान गरिसकेका छन् ।
पछिल्लो समीकरणअनुसार गण्डकीमा एमाले, माओवादी र राप्रपाको सरकार गठन हुने निश्चित छ । मुख्यमन्त्री को बन्नेबारे टुंगो भने लागेको छैन । तर‚ एमालेका खगराज अधिकारीको बलियो सम्भावना बलियो भएको नेताहरूको दाबी छ । माओवादीले पनि गण्डकीमा मुख्यमन्त्रीको दाबी गरेको छ ।
