लमजुङ — नेपाली ख्यातिप्राप्त कलाकार, पाइटल, डाक्टर, पत्रकार, लेखक, प्राध्यापक, इन्जिनियर, वकिल, खेलाडी, सुरक्षा अधिकारी, व्यापारीलगायत करिब २ सय जनाको टोली बिहीबार लमजुङ आएको छ ।
टोली क्व्होलासोंथार–४ भुजुङ गाउँ आइपुगेको हो । पर्यटकीय गाउँ भुजुङ उनीहरूको गन्तव्य रहेको आयोजक स्पार्क एड्भेन्चर प्रालिले जनाएको छ ।
स्पार्कका म्यानेजर प्रमोद अधिकारीका अनुसार ‘स्पार्क एडभेन्चर’ मा अभिनेता राजेश हमाल, गायक रामकृष्ण ढकाल, कलाकारहरू सुनिल पोखरेल, विपिन कार्की, वर्षा शिवाकोटी, मधुसूदन पाठक (सिते बा), तेक्वान्दो खेलाडी दीपक विष्ट, डा. लोचन कार्कीसहित चर्चित व्यक्तित्व सहभागी छन् ।
स्पार्क ग्रुपका टुर म्यानेजर अमरदीप भट्टराईले पर्यटकीय गन्तव्यमा सेलिब्रेटीलाई पुर्याउने र यसलाई विदेशसम्म प्रचारका लागि यो यात्राको तय गरिएको बताए । ‘सेलिब्रेटीले नेपालका ग्रामीण भेगमा गर्ने यात्राले यहाँको अर्थतन्त्रलाई सघाओस् भन्ने चाहन्छौं’ उनले भने ।
टोलीले भुजुङमा स्थानीय संस्कृति र भीर मह काढ्ने स्थलमा पुगेर अवलोकन गर्ने कार्यक्रम छ । त्यसपछि होमस्टेमा खाना खाएर घलेगाउँ अवलोकन गर्दै बेंसीसहर फर्किने कार्यक्रम रहेको छ । शुक्रबार साँझ सदरमुकाम बेंसीसहर फर्किने र त्यहाँ गायक रामकृष्ण ढकाल साँझ हुनेछ ।
टोली शनिबार काठमाडौं फर्कने कार्यक्रम रहेको भट्टराईले बताए । पर्यटन व्यवस्थापन समिति भुजुङका अध्यक्ष तुलबहादुर गुरुङले गाउँका ३२ घरमा सञ्चालिन होमस्टेमा राखिने बताए । ‘हामीले पाहुनाका लागि सबै व्यवस्थापन गरेका छौं । सबै तयारी पूरा भएको छ । होमस्टेबाहेक अन्य घरहरू पनि तयारी अवस्थामा राखेका छौं,’ उनले भने ।
