कालीगण्डकीमा ७ वर्षदेखि पुल निर्माण अलपत्र
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
पूर्वी नवलपरासी — दुर्गम पहाडी क्षेत्रको कालीगण्डकी नदीमा निर्माण सुरु गरिएको पक्की पुल ७ वर्षदेखि अलपत्र छ । पूर्वी नवलपरासीको बुलिङटार र तनहुँ जोड्ने पक्की पुल निर्माण थालेको ७ वर्ष पूरा भइसक्दा पनि सम्पन्न हुन नसकेको हो ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![कालीगण्डकीमा ७ वर्षदेखि पुल निर्माण अलपत्र](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2022/third-party/bridgee-05122022035325-1000x0.gif&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
बुलिङटार गाउँपालिकाका अध्यक्ष दिपेन्द्र सुनारीका अनुसार पुल निर्माणका लागि खम्बा ठड्याएर अलपत्र पारेर ठेकेदार बेपत्ता भएका छन् । खम्बामा प्रयोग भएका फलामे डण्डीमा खिया लागेर कामै नलाग्ने भइसकेको सुनारीले बताए ।
तीनवटा खम्बा ठड्याएर अलपत्र पारेर ठेकेदारले छोडेका छन् । पुल बनाउन ल्याइएका फलाम खिया लागेर बगरमा लथालिंग छोडिएको छ । कालिगण्डकी नदीमा निर्माणाधीन यो पुलले बुलिङटार गाउँपालिका वडा नम्बर ४ कोखे र तनहुँको रिसिङ गाउँपालिकाको वडा नम्बर ६ को मधुवन गाउँ जोड्ने पुल हो । पुल नजिक पुग्ने दुबै जिल्लाबाट सडक निर्माण भइसकेको छ ।
तनहुँतर्फ जोडिने रिसिङ गाउँपालिकाका अध्यक्ष राजेन्द्र श्रेष्ठका अनुसार जेभी कन्सट्रक्सन कम्पनीले यो पुल निर्माणका लागि ४० करोडमा ठेक्का लिएको थियो । ठेकेदार कम्पनीका मालिक जयराम लामिछाने सम्पर्कमा नै नआएको र पटकपटक फोन गर्दा पनि नउठाउने गरेको अध्यक्ष श्रेष्ठ बताउँछन् । 'मन्त्रालयमा पनि धेरैपटक धाइसकियो सरकारी निकायले नै वास्ता गर्दैनन्,' अध्यक्ष श्रेष्ठले भने ।
ताकेता गर्ने भौतिक पूर्वाधार मन्त्रालयको पुल विभागलाई धेरै पटक जानकारी गराउँदा समेत बेवास्ता भएको उनको भनाइ छ । 'ठेकेदार सम्पर्कमै छैनन् । काम पनि गर्दैनन् हाम्रो प्रयासले केही नहुने भयो,' उनले भने ।
गैंडाकोट बुलिङटार हुँदै मुक्तिनाथ जाने कालीगण्डकी सडक सञ्जालसँग यो पुल नजिक पर्छ । तनहुँ र नवलपरासीको पहाडी भेगमा जाने यो पुल चाँडो निर्माण होस् भन्ने स्थानीयहरूले पनि चासो देखाउँदै आएका छन् ।
![](https://assets-cdn.ekantipur.com/uploads/source/ads/900-x-100-0172024023126.gif)