मतदान अधिकृतको गल्तीले सय मत बदर- गण्डकी - कान्तिपुर समाचार

मतदान अधिकृतको गल्तीले सय मत बदर

दीपक परियार

पोखरा — मतगणनाको क्रममा कास्की–१ मा मंगलबार प्रदेशसभातर्फको एक सयवटा मतपत्र प्रतिनिधिसभातर्फको मतपेटिकामा भेटियो । मादी गाउँपालिका–५ को वडा कार्यालयमा रहेको मतदान केन्द्रको मतपेटिकामा ठूलो संख्यामा प्रदेशसभाको मतपत्र प्रतिनिधिसभाका बाकसमा भेटिएपछि केही बेर मतगणना रोकियो । निर्वाचन आयोगले नियमानुसार सर्वदलीय सहमति जुटाएर उक्त मतपत्र बदर गर्‍यो ।


उक्त केन्द्रमा खटिएका मतदान अधिकृतको गल्तीले ठूलो संख्यामा मत बदर भएको हो । मतदानका क्रममा मतदान अधिकृत र मतदान केन्द्रमा खटिएका कर्मचारीले मतदातालाई प्रतिनिधिसभाको मतपत्र दिनुपर्नेमा प्रदेशसभाको मतपत्र दिए । प्रदेशसभाको भन्दा प्रतिनिधिसभातर्फको मतपत्र ठूलो थियो । एक सयवटा मतपत्र गलत मतदातालाई वितरण हुँदासमेत कर्मचारीले पत्तो पाएनन् । मतदाताले समेत आफूले प्रतिनिधिसभाका लागि मतदान गरेको मतपत्र प्रदेशसभाको भएको भेउ पाएनन् । आफूले खोजेको चुनाव चिह्न नदेखेपछि त्यही भएकामध्येको चुनाव चिह्नमा मत हालेर प्रतिनिधिसभातर्फको बाकसमा खसाले ।

कास्की १ का सहायक निर्वाचन अधिकृत दीपक गिरीले आयोगको निर्णयअनुसार उक्त मत बदर गरिएको बताए । ‘यसमा मतदान अधिकृतकै कमजोरी देखिन्छ,’ उनले भने, ‘मतदाताले पनि आफूलाई गलत मतपत्र परेको थाहा पाएनन् । प्रचलित नियमानुसार बदर गर्नुपर्‍यो ।’ कास्की–१ मा राष्ट्रिय स्वतन्त्र पार्टीका उम्मेदवार राजु राईले चुनावको दिन उक्त मतदानस्थलबाट मतदाताले फोन गरेर मतपत्रमा घण्टी चुनाव चिह्न नै नरहेको जानकारी गराएको बताए । ‘त्यो दिन मतपत्रमा चुनाव चिह्न नै छैन भनेर फोन आएको थियो तर चुनावमा खटिनुपरेकोले धेरै ध्यान पुगेन,’ उनले भने ।

कास्की–१ का सहायक निर्वाचन अधिकृत गिरीका अनुसार प्रतिनिधिसभातर्फ १२ हजार ४ सय ६६ मत गणना गर्दा ४ सय ९१ मतपत्र बदर भएका छन् । प्रदेशसभातर्फ कास्की–१(२) मा १२ हजार ५ सय ५३ मतमा ३ सय ३६ मत बदर भएको छ । ‘धेरैजसो एउटा मतपत्रमा एकभन्दा बढी छाप हानेको भेटियो,’ उनले भने, ‘स्वस्तिक छापको मसी लत्पतिएर पनि मत बदर भएका छन् ।’ मतपत्रमा भएजति चिह्नमा छाप लगाउने, कलमले केरमेट गर्ने, औंठाछाप लगाउने, खाली छाड्ने गरिएका मतपत्र धेरै भेटिएका छन् ।

मंगलबार साँझसम्म कास्की २ मा प्रत्यक्षतर्फ १५ हजार ८१ मत गणना गर्दा ७ सय १२, २(१) मा १७ हजार ६ सय ३० गणना गर्दा ७ सय ६ मत बदर भएका छन् । कास्की ३ मा प्रत्यक्षतर्फ १९ हजार ९ सय ३२ मत गणना गर्दासम्म १ हजार ५०, ३(१) मा १९ हजार ९ सय २४ गणना गर्दा ७ सय ५७ मत बदर भएको सूचना अधिकारी राजाराम पौडेलले बताए । समानुपातिकतर्फ कास्की–३ मा २० हजार १ सय ६८ गणना गर्दा ८ सय ३७ र ३(१) मा १९ हजार ९ सय २२ गणना गर्दा १ हजार १ सय ८३ मत बदर भएका छन् ।

प्रकाशित : मंसिर ७, २०७९ ०७:५२
प्रतिक्रिया
पठाउनुहोस्

स्याङ्जा-२ मा कांग्रेस–एमालेको छुट्टाछुट्टै दबाब

प्रतीक्षा काफ्ले

स्याङ्जा — स्याङ्जाको क्षेत्र नम्बर–२ को मतगणना मंगलबार पनि सुरु हुन सकेको छैन । बुथ कब्जा गरी विदेश गएका र मृत्यु भइसकेका व्यक्तिको नाममा मतदान भएको भन्दै एमालेले पुनः मतदानको माग गरेको छ भने कांग्रेसले मतपेटिका संकलन भइसकेकाले गणना गरिनुपर्ने माग गरेको छ । 


चापाकोट नगरपालिकाअन्तर्गत ४ वटा बुथमा विदेश गएका र मृत्यु भएका १ हजार ८० जनाभन्दा बढीको नाममा मतदान भएको एमालेको दाबी छ । यसको प्रमाणसहितको विवरण निर्वाचन आयोगमा पठाइसकेकाले आयोगको निर्णय नआउँदासम्म मतगणना हुन नदिने एमालेबाट प्रतिनिधिसभा सदस्यकी उम्मेदवार पद्माकुमारी अर्यालले बताइन् । यता, कांग्रेसले भने मतदान भइसकेर सुरक्षित रूपमा मतपेटिका गणनास्थल आइसकेकाले गणना हुनुपर्ने माग राखेको छ । मंगलबार स्याङ्जाको वालिङमा कांग्रेस र एमालेले दबावस्वरूप छुट्टाछुट्टै आन्दोलन र धर्नाको कार्यक्रम गरेका थिए । स्याङ्जा–२ का निर्वाचन अधिकृत रामचन्द्र शर्माले निर्वाचन आयोगको निर्देशन नआउँदासम्म गणना अघि नबढ्ने बताए ।

एमाले केन्द्रीय सचिवसमेत रहेकी अर्यालले चापाकोटका चारवटा केन्द्रमा खटिएका एमालेका प्रतिनिधिलाई मतदान सुरु हुनेबित्तिकै लखेटिएको समेत आरोप लगाएकी छन् । उनका प्रतिद्वन्द्वी कांग्रेस केन्द्रीय उपसभापति धनराज गुरुङ यस विषयमा बोल्न चाहेनन् । कांग्रेस गण्डकी प्रदेशकी उपसभापति कल्पना तिवारीले मतदान फर्जी भए त्यही समयमा स्थगित गर्नुपर्ने बताइन् । निर्वाचन आयोगका प्रवक्ता शालिग्राम शर्मा पौडेलले यस विषयमा आयोगमा निवेदन आइसकेको हुँदा आयोगको निर्णय नआउँदासम्म केही बोल्न नसकिने बताए ।

जिल्लामा प्रारम्भिक तथ्यांकअनुसार ६० प्रतिशत मत खसेको थियो । स्याङ्जामा प्रतिनिधिसभाका दुई निर्वाचन क्षेत्र र चार प्रदेशसभा निर्वाचन क्षेत्र छन् । २ लाख ८७ हजार २ सय १ जनसंख्यामध्ये २ लाख ४४ हजार ८९ जना मतदाता छन् । जसमा १ लाख १९ हजार ३ सय १० पुरुष र १ लाख २३ हजार ७ सय ७८ महिला मतदाता छन् । चापाकोट–४ स्थित राम मन्दिर माध्यमिक विद्यालयमा रहेको बुथमा मतदाता नामावली भएका १ हजार ४ सय ६६ मध्ये १ हजार ४ सय ३८ (९८.०९ प्रतिशत) ले मतदान गरेका छन् । जसमा मृत्यु भएका ३१ र विदेश गएका ४२ जनाको नाममा मत खसेको एमालेको दाबी छ । यस्तै, चापाकोट–३ दिसिङ्कोट आधारभूत विद्यालयमा रहेको बुथमा १ हजार ६ सय ४१ मतदाता संख्या छ । १ हजार ५ सय ६० अर्थात् ९५.०६ प्रतिशत मत खसेको थियो । यहाँ १४ जना मृत्यु भएका र ३७ जना विदेश भएका व्यक्तिको नाममा मतदान भएको एमालेको दाबी छ ।

प्रकाशित : मंसिर ७, २०७९ ०७:५०
पूरा पढ्नुहोस्
प्रतिक्रिया
पठाउनुहोस्
×