स्याङ्जा-२ मा कांग्रेस–एमालेको छुट्टाछुट्टै दबाब- गण्डकी - कान्तिपुर समाचार

स्याङ्जा-२ मा कांग्रेस–एमालेको छुट्टाछुट्टै दबाब

प्रतीक्षा काफ्ले

स्याङ्जा — स्याङ्जाको क्षेत्र नम्बर–२ को मतगणना मंगलबार पनि सुरु हुन सकेको छैन । बुथ कब्जा गरी विदेश गएका र मृत्यु भइसकेका व्यक्तिको नाममा मतदान भएको भन्दै एमालेले पुनः मतदानको माग गरेको छ भने कांग्रेसले मतपेटिका संकलन भइसकेकाले गणना गरिनुपर्ने माग गरेको छ । 


चापाकोट नगरपालिकाअन्तर्गत ४ वटा बुथमा विदेश गएका र मृत्यु भएका १ हजार ८० जनाभन्दा बढीको नाममा मतदान भएको एमालेको दाबी छ । यसको प्रमाणसहितको विवरण निर्वाचन आयोगमा पठाइसकेकाले आयोगको निर्णय नआउँदासम्म मतगणना हुन नदिने एमालेबाट प्रतिनिधिसभा सदस्यकी उम्मेदवार पद्माकुमारी अर्यालले बताइन् । यता, कांग्रेसले भने मतदान भइसकेर सुरक्षित रूपमा मतपेटिका गणनास्थल आइसकेकाले गणना हुनुपर्ने माग राखेको छ । मंगलबार स्याङ्जाको वालिङमा कांग्रेस र एमालेले दबावस्वरूप छुट्टाछुट्टै आन्दोलन र धर्नाको कार्यक्रम गरेका थिए । स्याङ्जा–२ का निर्वाचन अधिकृत रामचन्द्र शर्माले निर्वाचन आयोगको निर्देशन नआउँदासम्म गणना अघि नबढ्ने बताए ।

एमाले केन्द्रीय सचिवसमेत रहेकी अर्यालले चापाकोटका चारवटा केन्द्रमा खटिएका एमालेका प्रतिनिधिलाई मतदान सुरु हुनेबित्तिकै लखेटिएको समेत आरोप लगाएकी छन् । उनका प्रतिद्वन्द्वी कांग्रेस केन्द्रीय उपसभापति धनराज गुरुङ यस विषयमा बोल्न चाहेनन् । कांग्रेस गण्डकी प्रदेशकी उपसभापति कल्पना तिवारीले मतदान फर्जी भए त्यही समयमा स्थगित गर्नुपर्ने बताइन् । निर्वाचन आयोगका प्रवक्ता शालिग्राम शर्मा पौडेलले यस विषयमा आयोगमा निवेदन आइसकेको हुँदा आयोगको निर्णय नआउँदासम्म केही बोल्न नसकिने बताए ।

जिल्लामा प्रारम्भिक तथ्यांकअनुसार ६० प्रतिशत मत खसेको थियो । स्याङ्जामा प्रतिनिधिसभाका दुई निर्वाचन क्षेत्र र चार प्रदेशसभा निर्वाचन क्षेत्र छन् । २ लाख ८७ हजार २ सय १ जनसंख्यामध्ये २ लाख ४४ हजार ८९ जना मतदाता छन् । जसमा १ लाख १९ हजार ३ सय १० पुरुष र १ लाख २३ हजार ७ सय ७८ महिला मतदाता छन् । चापाकोट–४ स्थित राम मन्दिर माध्यमिक विद्यालयमा रहेको बुथमा मतदाता नामावली भएका १ हजार ४ सय ६६ मध्ये १ हजार ४ सय ३८ (९८.०९ प्रतिशत) ले मतदान गरेका छन् । जसमा मृत्यु भएका ३१ र विदेश गएका ४२ जनाको नाममा मत खसेको एमालेको दाबी छ । यस्तै, चापाकोट–३ दिसिङ्कोट आधारभूत विद्यालयमा रहेको बुथमा १ हजार ६ सय ४१ मतदाता संख्या छ । १ हजार ५ सय ६० अर्थात् ९५.०६ प्रतिशत मत खसेको थियो । यहाँ १४ जना मृत्यु भएका र ३७ जना विदेश भएका व्यक्तिको नाममा मतदान भएको एमालेको दाबी छ ।

प्रकाशित : मंसिर ७, २०७९ ०७:५०
प्रतिक्रिया
पठाउनुहोस्

प्रदेशसभामा जनमत र कांग्रेसका तीन निर्वाचित

कान्तिपुर संवाददाता

राजविराज — प्रदेशसभाअन्तर्गत सप्तरीमा जनमत पार्टीले दुई वटा क्षेत्र जितेको छ । सप्तरी–२ (१) र (२) मा जनमत पार्टीका उम्मेदवार क्रमशः सतिशकुमार सिंह र महेशकुमार यादव विजयी भएका हुन् । सिंहले १६ हजार ७ सय ३४ मत पाए । उनका निकटतम प्रतिद्वन्द्वी प्रदेशका अर्थमन्त्रीसमेत रहेका जसपाका शैलेन्द्रप्रसाद साहले ८ हजार २ सय ९२ मत पाए ।

सिंह गत स्थानीय तहको चुनावमा सप्तरीको तिलाठी कोइलाडी गाउँपालिकाको अध्यक्षमा पराजित भएका थिए । त्यतिबेला उनी लोसपाबाट उम्मेदवार थिए । उनी ०७४ को स्थानीय तह निर्वाचनमा सोही गाउँपालिकाको अध्यक्षमा निर्वाचित भएका थिए । शरदसिंह भण्डारी नेतृत्वको तत्कालीन राष्ट्रिय मधेस समाजवादी पार्टीबाट राजनीतिमा सक्रिय भएका सिंह तत्कालीन राजपाको जिल्ला अध्यक्ष थिए । सिंहका बुबा शेखरकुमार सिंह लोसपाका तर्फबाट राष्ट्रिय सभामा सांसद छन् ।

तत्कालीन राजपा र एमालेको गठबन्धनबाट सिंह राष्ट्रिय सभामा निर्वाचित भएका थिए । सप्तरी–२ (२) मा विजयी यादव माओवादीले टिकट नदिएपछि मनोनयनको अघिल्लो दिन जनमत पार्टीमा प्रवेश गरेका थिए । उनले पूर्वसिँचाइमन्त्री उमेश यादवलाई ६ हजार ३ सय २ मतान्तरले पराजित गरे । यादवले १३ हजार ३ सय २५ पाए । माओवादीका उमेशले ७ हजार २३ मत प्राप्त गरे ।

पर्सा २ (१) मा कांग्रेसका पटेल निर्वाचित

कांग्रेसका श्याम पटेल पर्सा–२ (१) बाट विजयी भएका छन् । जनता समाजवादी पार्टीका रामनरेश प्रसाद यादवलाई १ हजार ६ सय ५७ मतान्तरले पराजित गर्दै पटेल निर्वाचित भएका हुन् । उनले १३ हजार ७ सय ८४ मत ल्याए भने यादवले १२ हजार १ सय २७ मत पाए । यो क्षेत्रबाट २०७४ को निर्वाचनमा पनि कांग्रेसले नै जितेको थियो । त्यतिबेला कांग्रेसका राजेश्वरप्रसाद साह १० हजार २ सय ५९ मत ल्याएर निर्वाचित भएका थिए । त्यतिबेला पनि तत्कालिन संघीय समाजवादी फोरमबाट उम्मेदवार रहेका राम नरेश यादवले १० हजार ७९ मत ल्याएर पराजित भएका थिए ।

४६ वर्षीय पटेलले आफूले ठाकुरराम क्याम्पसबाट विद्यार्थी राजनीति सुरु गरेको र यसै क्याम्पसको परिसरबाट जनप्रतिनिधि बनेर बाहिरिँदा खुसीसँगै चुनौती पनि थपिएको बताए । बहदुरमाई नगरपालिका पुर्ख्यौली घर भएका उनी ०६२/६३ को आन्दोलनको क्रममा करिब ३ महिना वीरगन्ज कारागारमा कैद सजाय भोगेका थिए । दुई पटक पर्सा कांग्रेस–२ को क्षेत्रीय सभापतिको जिम्मेवारी वहन गरिसकेका उनी पर्सा कांग्रेसको सचिवसमेत भएका थिए ।

प्रकाशित : मंसिर ७, २०७९ ०७:४८
पूरा पढ्नुहोस्
प्रतिक्रिया
पठाउनुहोस्
×