टुक्रे बजेटले काम गर्नै गाह्रो- गण्डकी - कान्तिपुर समाचार

टुक्रे बजेटले काम गर्नै गाह्रो

प्रकाश बराल

बागलुङ — व्यक्तिका नाममा खुलेका दर्जनौं संस्थालाई लाखौं रकम विनियोजन गरेको बागलुङ नगरपालिकाले पर्यटन प्रवर्द्धनमा भने टुक्रे बजेट दिएको छ । पर्यटन शीर्षकमा दर्जनबढी कार्यक्रम राखे पनि टुक्रे र सानो बजेटका योजनाले काम र लक्ष्य पूरा हुन नसक्ने अवस्था देखिएको छ ।


पर्यटन गुरुयोजना निर्माणका लागि तयारी भन्दै १ लाख रुपैयाँ मात्रै विनियोजन भएपछि यो क्षेत्रका सरोकारवालाले पर्यटनमा सुधार गर्नै नसकिने बताए । बागलुङ नगरपालिकाले १ लाख रुपैयाँमा गुरुयोजना निर्माण तयारी भन्ने शीर्षक राखेको हो । ‘गुरुयोजना बनाउन विज्ञको अन्तरक्रिया राखे पनि दुई/चार लाख खर्च हुन्छ,’ पर्यटन समिति बागलुङका सचिव अर्जुन चोखालले भने, ‘टुक्रे बजेटले केही काम बन्दैन ।’ नगरपालिकाले भने अधिकांश शीर्षकमा टुक्रे बजेट राखेको छ ।

नगरपालिकाले पर्यटन सूचना केन्द्र बनाउन चालु आर्थिक वर्षका लागि १० लाख रुपैयाँ विनियोजन गरेको छ । कहाँ र कहिले त्यो सूचना केन्द्र बन्छ कार्यविधि र तयारी छैन ।

होमस्टे प्रवर्द्धनको नाममा भएको मात्र २ लाख बजेटले के गर्ने भन्ने भएको अतिथि सत्कार होमस्टेका अध्यक्ष यामबहादुर थापाले बताए । ‘शीर्षक भएर के गर्नु, एउटा होमस्टेमा कार्यक्रम गरे पनि दुई/चार लाख खर्च हुन्छ,’ उनले भने, ‘के गरेर प्रवर्द्धन हुन्छ भन्ने अन्योल छ ।’

संसारकोट पदमार्गलाई ४ लाख, वडा ५ को मालिका मन्दिर व्यवस्थापनमा ३ लाख, वडा ४ को गौरीधाम मन्दिर व्यवस्थापनमा ४ लाख, शालीग्राम संग्रहालयमा १० लाख, वडा ७ को सहिद स्मृति पार्क निर्माणमा १० लाख, मालढुंगामा गेट मर्मतमा १० लाख, कालीगण्डकी सभ्यता संरक्षण र पर्यटन प्रवर्द्धनका लागि गुरुयोजना बनाउन १ लाख बजेट छ । ‘यति सानो बजेटले के काम होला ? बरु थोरै योजनामा पर्याप्त बजेट लगाए राम्रो हुन्छ,’ कालीका भगवती गुठी व्यवस्थापन समितिका अध्यक्ष कुमार खड्काले भने, ‘देखिने गरी काम नभए पैसा पनि बच्दैन, कामले गति पनि लिँदैन ।’ ५० लाखदेखि १ करोड बजेट खर्चेर आकर्षक पूर्वाधार बनाएमा पर्यटककै कारण असुल गर्नसमेत सकिन्छ ।’ नगरप्रमुख वसन्तकुमार श्रेष्ठले आन्तरिक आय नहुँदा साना कार्यक्रमले सम्बोधन गर्न बाध्य भएको बताए । ‘आम्दानी छैन, त्यसैले सबै क्षेत्रको सम्बोधन गर्दा टुक्रे बजेट भयो,’ श्रेष्ठले भने, ‘कतिपयलाई सानो सम्बोधनले पनि ठूलो आशा पलाउन सक्छ ।’ ऐतिहासिक हनुमान नाँच संरक्षणमा ५ लाख रकम विनियोजन गरेको उनले बताए ।

प्रकाशित : भाद्र २८, २०७९ १२:०७
प्रतिक्रिया
पठाउनुहोस्

‘नाबालक’ लाई ३६ वर्षे भन्दै कारागार ?

चोरी आरोपमा पक्राउ परेका अन्दाजी १६ वर्षे ११ महिनादेखि थुनामा 
उमेर खुल्ने कागजात भेटिएन, दाँत परीक्षणको प्रमाण अदालतले मानेन 
प्रकाश बराल

बागलुङ — उमेर खुल्ने कागजात उपलब्ध गराउन नसक्दा यहाँका एक ‘बालक’ लाई अदालतले ३६ वर्ष कायम गर्दै कारागार चलान गरेको छ । ती बालक ११ महिनादेखि पुर्पक्षका लागि थुनामा छन् । चोरी आरोपमा गत असोजमा पक्राउ परेका ढोरपाटन नगरपालिका–९ सुपुर्दुङका एक बालकको जन्मदर्ता नभएकै कारण मुद्दामा सुनुवाइ भएको छैन ।

वडासचिव थमप्रसाद घर्तीले अदालतबाट पत्र नआएको र ताकेता पनि नगरिएको बताए । गत साताको पेसीमा जन्म मिति खुल्ने कागजात नभएपछि उनी फेरि कारागार चलान भएका छन् ।

ती ‘बालक’ ले आफू अहिले १७ वर्ष पुगेको बताएका छन् । गत कात्तिक ११ मा पुर्पक्षका लागि भन्दै अदालतले पठाएको पत्रमा उनको उमेर ३६ वर्ष कायम छ । ‘हेर्दा पाको उमेर जस्तो लाग्दैन तर अदालतको कागजले उनको उमेर ३६ वर्ष बोल्छ,’ जिल्ला कारागार प्रमुख डिलबहादुर केसीले भने, ‘बयान दिँदा, हिरासतमा राख्दा पनि यो मानिस कति उमेरको हो भन्ने बुझ्नुपर्ने हो ।’ ढोरपाटन–९ का तुलबहादुर विकको जाहेरीपछि ती बालक पक्राउ परेका थिए । विकको पसलबाट ४ लाख रुपैयाँ चोरेको आरोपमा उनलाई प्रहरीले पक्रेको थियो । प्रहरीले उनको साथबाट रकम भने भेटेको थिएन ।

जिल्ला अदालतका तहसिलदार जगतबहादुर भण्डारीले कागजातमा ३६ भनेर आएको र पछि १८ वर्षको भनिएपछि केरेर सच्याइएको बताए । ‘जन्मदर्ता प्रमाणपत्र नभएसम्म उनको उमेर थाहा पाउन सकिँदैन,’ उनले भने, ‘वडा कार्यालयलाई पत्र पठाइएको तर जवाफ आएको छैन ।’ जवाफ नआएसम्म उनको मुद्दामा सुनुवाइ नहुने भएको हो । चोरी गरेको ठहर भए पनि उनलाई बालसुधार गृहमा पठाइनुपर्ने हो । तर, कागजातमा नाबालिग दाबी गरिएकाले त्यसैअनुसार उनले ११ महिना कैद भुक्तान गरिसकेका छन् ।

उनको घरमा केही वर्षअघि आगो लागेकाले उनको जन्म मिति खुल्ने काजगात नभएको बताइएको छ । उनले पढेको सरस्वती आधारभूत विद्यालय पनि ३ वर्षअघिको भुजीखोला पहिरोले बगाएकाले त्यहाँ पनि उनी सम्बन्धित कागजात छैनन् । उनले कक्षा ६ सम्म मात्रै पढेका छन् । ११ वर्षका उनका भाइ अहिले घरैमा रहेको उनकी आमाले बताइन् । कानुन व्यवसायी हरिप्रसाद गौतमले उनी बालक भएकोले सुधार गृह पठाउन माग गरिए पनि अदालतले कारागार पठाएको बताए ।

कागजात नभेटेपछि उनको दाँत परीक्षण भएको थियो । दाँत परीक्षणमा १३ देखि १९ वर्षको भनेर लेखिएको छ । जिल्ला न्यायाधीश दिवाकर भट्टले बालबालिकासम्बन्धी मुद्दामा अदालत लचिलो बन्ने बताए । ‘उमेर खुल्ने प्रमाण आयो भने हामीले तल्लो उमेर हेर्ने गर्छौं,’ उनले भने, ‘बेस्ट इन्ट्रेस्ट अफ चाइल्ड भन्ने मान्यता हेर्नुपर्ने हुन्छ ।’ न्यायाधीश भट्टको भनाइलाई आधार मान्दा पनि दाँत परीक्षणअनुसार उनको उमेर १३ वर्ष मात्रै मानिनुपर्ने हो । तर, यसअनुसार फैसला भएको छैन ।

प्रकाशित : भाद्र २६, २०७९ ०८:४१
पूरा पढ्नुहोस्
प्रतिक्रिया
पठाउनुहोस्
×