बैंकिङ कसूरकी आरोपित पक्राउ- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

बैंकिङ कसूरकी आरोपित पक्राउ

प्रतीक्षा काफ्ले

कास्की — बैंकिङ कसूर मुद्दाको आरोपमा कास्की प्रहरीले २७ वर्षीया दीक्षा पुनलाई पक्राउ गरेको छ । बागलुङको ताराखोला गाउँपालिका–१ घर भई पोखरा महानगरपालिका–२ मिरुवा बस्दै आएकी दीक्षालाई कास्कीको अन्नपूर्ण गाउँपालिका–८ विरेठाँटीस्थित निगालोको घारीबाट शनिबार पक्राउ गरेको हो ।

घारीभित्र लुकेको अवस्थामा पक्राउ गरिएको कास्की प्रहरी प्रवक्ता डीएसपी सुन्दर तिवारीले बताए ।

‘दीक्षा पुनउपर बैकिङ कसूर मुद्दा दर्ता गरी पक्राउ अनुमति लिएर खोजतलास गर्ने क्रममा झाडीमा भेटायौ,’ तिवारीले भने, ‘आइतबार उच्च अदालत पोखरामा मुद्दा दर्ता गरि ७ दिनको म्याद थप गरेका छौं ।’

पुनले पोखरा फाइनान्स लिमिटेडमा रहेको आफ्नो खातामा पर्याप्त रकम नभएको अवस्थामा कुलबहादुर विकलाई गत वैशाख २६ मा ३ लाख रुपैयाँको चेक दिएकी थिइन् । खातामा रकम नभएको कारण उक्त चेक फाइनान्सबाट बाउन्स भएको डीएसपी तिवारीले बताए । उनका अनुसार कुलबहादुरले प्रहरीमा जाहेरी दिएका थिए ।

दीक्षाले विभिन्न व्यक्तिलाई यूके पठाइदिने भन्दै रकम ठगी गरेको सूचना सामाजिक सञ्जालमा सम्प्रेषण भएको हुँदा यस विषयमा पनि अनुसन्धान भइरहेको बताउँदै डीएसपी तिवारीले भने, ‘अन्य पीडित व्यक्तिहरु र प्रमाणसहित प्रहरी कार्यालयमा सम्पर्क गर्न अनुरोध छ ।’

प्रकाशित : श्रावण २२, २०७९ २१:५३
प्रतिक्रिया
पठाउनुहोस्

साँघुटार सबस्टेसन सञ्चालनमा

कान्तिपुर संवाददाता

रामेछाप — रामेछापको पूर्वी सिमाना पर्ने साँघुटारमा निर्माण भएको ३३ केभी सबस्टेसन सञ्चालनमा आएको छ । आठ वर्षअघि निर्माण थालिएको सबस्टेसन आइतबारदेखि सञ्चालनमा आएको नेपाल विद्युत् प्राधिकरण रामेछाप वितरण केन्द्रले जनाएको छ । 

मन्थलीदेखि साँघुटार पुर्‍याइएको ३३ केभी प्रसारण लाइनलाई उक्त सबस्टेसनमा पुर्‍याएर चार्ज गरिएको वितरण केन्द्रका प्रमुख कृष्णहरि दाहालले बताए । साँघुटार सबस्टेसनमार्फत रामेछाप जिल्लाको पूर्वी उत्तर क्षेत्र दुरागाउँसम्मको विद्युतीकरण हुने व्यवस्था मिलाइएको छ । त्यसका अतिरिक्त ओखलढुंगाको पश्चिमी क्षेत्रमा पर्ने विभिन्न भागमा पनि उक्त सबस्टेसनकै फिडरमार्फत विद्युत् पठाइनेछ ।

यसअघि मन्थलीको सबस्टेसनबाट वितरण भएको विद्युत् साँघुटार सबस्टेसनको सञ्चालन पछि सुधार हुनेछ । साँघुटारको सबस्टेसनसम्म ३३ केभी सिधै पुग्ने भएकाले विद्युत्को गुणस्तरसमेत बढ्ने प्राधिकरणले जनाएको छ । बारम्बार विद्युत् जाने समस्या पनि अब घटेर जाने केन्द्रले जनाएको छ । एकातिर साँघुटारतर्फको विद्युत् गुणस्तरीय हुने र अर्कोतिर मन्थलीको विद्युत्समेत प्रभावकारी बनाउन सहयोग पुग्ने दाहालले बताए ।

रामेछापको मन्थली सबस्टेसनबाट वितरण भएका विद्युत् सिधै व्यक्तिको घरमा पुग्ने भएकाले गुणस्तरदेखि बारम्बार गइरहने समस्याबाट गुज्रँदै आएको छ । साँघुटार जस्तै दोरम्बा, राकाथुम र बाम्तीमा निर्माणाधीन सबस्टेसनको निर्माण पूरा भई सञ्चालनमा आए पनि विद्युत्मा अझै सुधार हुने उक्त केन्द्रले जनाएको छ ।

प्रकाशित : श्रावण २२, २०७९ २१:२०
पूरा पढ्नुहोस्
प्रतिक्रिया
पठाउनुहोस्
x
×