बालिकामाथि आफन्त र छिमेकीबाटै यौनजन्य हिंसा- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

बालिकामाथि आफन्त र छिमेकीबाटै यौनजन्य हिंसा

हरिराम उप्रेती

गोरखा — गत माघ २५ मा ११ वर्षीय बालिकालाई फकाइफुल्याइ जबर्जस्ती करणी गरेको आरोपमा धार्चे गाउँपालिका–५ माछाखोलाबाट २६ वर्षीय रितेश क्षत्री पक्राउ परे । मानसिक अपांगता भएकी बालिकालाई मिठाई र सय रुपैयाँ दिई फकाएर करणी गरेको उजुरी उनीविरुद्ध जिल्ला प्रहरी कार्यालयमा दर्ता छ । क्षत्री हाल गोरखा कारागारमा थुनामा छन् ।



जिल्ला प्रहरी कार्यालय गोरखामा विगत ६ महिनामा करणी, करणी उद्योग र बालयौन दुर्व्यवहारका १३ वटा घटना दर्ता भएका छन् । १३ मध्ये सबैभन्दा बढी बालिकासँग सम्बन्धित ९ वटा छन् । धेरैजसो घटनामा बालिका आफन्त र चिनजानका व्यक्तिबाटै यौनजन्य हिंसामा पर्ने गरेको देखिएको छ । यस्तै घटना गत फागुन २९ मा पनि घट्यो । १३ वर्षीय बालिका २९ वर्षीय मामाबाटै बलात्कृत भएकी हुन् । धाकधम्की र फकाइफुल्याइ गरी पटकपटक बलात्कृत हुँदै आएकी पीडितले अन्ततः न्यायका लागि प्रहरीको सहारा लिएकी हुन् ।

त्यस्तै, गत चैत ५ मा २८ वर्षीय महिलामाथि ६५ वर्षीय वृद्धले बलात्कारको प्रयास गरेको घटना प्रहरीमा दर्ता भएको छ । उनीहरू नाताले ससुरा बुहारी हुन् । जबर्जस्ती करणी उद्योगमा आरोपित वृद्ध चैत २९ को अदालतको आदेशले पुर्पक्षका लागि कारागारमा छन् ।

प्रहरीमा दर्ता भएका यी प्रतिनिधि घटनाले बालिका र महिला घरभित्रै असुरक्षित रहेको देखाउँछ । अपांगता भएका महिला र बालिका पनि यौनजन्य हिंसाको सिकार भएका छन् । गत पुस २० मा राम्रोसँग बोल्न नसक्ने ४० वर्षीया महिला बलात्कृत भइन् । अर्को घटनामा अपांगता भएकी भतिजी बलात्कृत भएको भन्दै उनका काकाले प्रहरीमा उजुरी दर्ता गराए । अपांगता भएकाहरू एक्लै भएको मौका छोपेर यस्ता घटना हुने गरेको प्रहरी बताउँछ ।

९ वर्षीया बालिकालाई बालयौन दुरुपयोग गरेको आरोपमा वैशाख २२ मा ६४ वर्षीय वृद्ध पक्राउ परे । आरोपित ६० हजार बुझाएर धरौटीमा छुटिसकेका छन् । वैशाख २६ मा १४ वर्षीया बालिकालाई बलात्कार गरेको अभियोगमा भीमसेन थापा गाउँपालिका–३ का ४९ वर्षीय गोपाल विकलाई पनि प्रहरीले पक्राउ गरेको थियो । यी प्रतिनिधिमूलक घटनाले वृद्ध र जान्ने बुझ्नेबाटै बालिका तथा महिलामाथि यौनदुर्व्यवहार हुने गरेको देखाउँछ ।

बालिकालाई विवाहको प्रलोभन देखाएर करणी गरेको आरोपमा पनि प्रहरीमा उजुरी दर्ता भएको छ । त्यस्तै अभियोगमा माघ २५ मा पक्राउ परेका युवा अहिले पुर्पक्षका लागि कारागारमा छन् । गोरखा प्रहरीमा दर्ता हुने यौनजन्य दुर्व्यवहारका अधिकांश घटना आफन्त, नजिकका नातेदार र छिमेकीबाट हुने गरेको पाइएको प्रहरी प्रमुख एसपी केदार खनाल बताउँछन् ।

‘घटना भयो भनेपछि प्रहरीकोमा अभिभावकले उजुरी दिए, यस्ता घटनाको उजुरीलाई हामीले प्राथमिकतामा कारबाही प्रक्रिया अघि बढाएका छौं,’ उनले भने । पछिल्ला समय यौनजन्य दुर्व्यवहारसम्बन्धी घटनाको उजुरी दर्ता हुने क्रम पनि बढेको उनले बताए ।

प्रकाशित : असार २१, २०७९ ११:१४
प्रतिक्रिया
पठाउनुहोस्

११ करोड लागतमा पार्क बनाइने

सुनिता बराल

महोत्तरी — सहरमा वन विकास गर्ने योजनासहित महोत्तरीको रातु खोलाको बगरमा रातु मित्रपार्क निर्माण हुने भएको छ । बर्दिवास नगरपालिका १, ६ र १४ अन्तर्गत पर्ने करिब १९ बिघा खोलाको बगर क्षेत्रलाई मित्रपार्कका रूपमा विकास गरिने भएको हो । 

२१ करोड रुपैयाँ लागत अनुमानसहित पार्कको निर्माण थालिएको रोटरी क्लब अफ बर्दिवासले जनाएको छ । क्लबका पूर्वअध्यक्ष विष्णु खड्काले पहिलो चरणमा ११ करोड बराबरको काम गर्ने लक्ष्य रहेको र अहिलेसम्म १ करोड २६ लाख लागतमा पार्कलाई हरियाली बनाउने काम पूरा गरिएको जानकारी दिए । अहिले रातु खोलाको बगरमा चल्की, गोलमोहर, सत्तिवन, पारिजात, रुद्राक्ष, राजवृक्षलगायत १७ प्रजातिका २६ सय बिरुवा रोपेर पार्कलाई हरियाली बनाउने योजना रहेको खड्काले बताए । पार्कलाई छिट्टै हरियाली बनाउने योजनाअनुरुप भारतको कोलकत्ताबाट ५ देखि ८ फिटसम्मका बिरुवा ल्याएर रोपिएको खड्काले जानकारी दिए ।

नेपालमा ठूला बिरुवा किन्न नपाएपछि नेपालकै नर्सरीको सहयोगमा भारतबाट बिरुवा झिकाएर रोपिएको उनले बताए । पहिलो चरणको कामअन्तर्गत क्लबले ७ बिघा बगर क्षेत्रलाई बाउन्ड्री वाल लगाउने, रातु खोलाको ड्याम मजबुत बनाउने, पार्कभित्र अपांगमैत्री ट्र्याक निर्माण गर्ने र वृक्षरोपण गर्ने काम सकिएको खड्काले बताए ।

संघीय सहरी विकास मन्त्रालयबाट १ करोड, भूसंरक्षण विभागबाट ७४ लाख २७ हजार र बर्दिवास नगरपालिकाको ३१ लाख ८३ हजार बजेटबाट पार्कको काम निरन्तर अघि बढिरहेको क्लबले जनाएको छ ।

सहरी विकास मन्त्रालयको सहरी वन विकास परियोजनाअन्तर्गत रोटरीसँग सहरलाई वन बनाउने योजनासहितको पार्क निर्माण गर्ने सम्झौताअनुसार काम अघि बढेको छ । अव पार्कभित्र पिकनिक स्पोर्ट, पार्कलाई पर्यटनसँग जोड्न वन्यजन्तुको संरचना, आराम स्थल र गार्डेनिङलगायत थप काम अघि बढाइने रोटरी क्लब बर्दिवासले जनाएको छ । रोटरीले बृहत् योजनाअनुसार निर्माण गरेको पार्क बर्दिवासका लागि महत्त्वपूर्ण रहेको स्थानीयले बताए ।

बर्दिवासमा खोलाको बगरलाई संरक्षण गर्ने, खोलाबाट गाउँबस्तीलाई सुरक्षित गर्ने र पर्यटन प्रवर्द्धन गर्ने गरी हरियाली पार्क बनाउने काम राम्रो भएको बर्दिवासका स्थानीय नवराज तिमिल्सिनाले बताए । पार्क संरक्षण गर्न नगरपालिकालाई आग्रह गरिने र विस्तार गर्ने योजना पनि रहेको रोटरीका अध्यक्ष विजय महतोले बताए ।

प्रकाशित : असार २१, २०७९ ११:०४
पूरा पढ्नुहोस्
प्रतिक्रिया
पठाउनुहोस्
×