डाइभर्सन निर्माण गरेर गैंडाकोटमा बाटो खुुलाइयो- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

डाइभर्सन निर्माण गरेर गैंडाकोटमा बाटो खुुलाइयो

नारायण शर्मा

पूर्वी नवलपरासी — बाढीले बगाएको डाइभर्सन सडक निर्माणपछि महेन्द्रराजमार्गको गैंडाकोटमा केही घण्टादेखि बन्द रहेको यातायात पुन: सञ्चालनमा आएको छ । गैंडाकोटको जयश्री खोलादेखि पश्चिमतर्फको डाइभर्सन बगाएको र त्यहाँ एउटा मालवाहक गाडी पल्टिएका कारण बिहानदेखि सडक अवरुद्ध थियो ।

सडक अवरुद्ध हुँदा पूर्वपश्चिम गरिरहेका सयौं गाडी गैंडाकोट र भेडाबारीमा रोकिएका थिए । यस क्षेत्रमा वर्षामा आएको बाढीले दिनहुँजसो यस्ता दर्जनौं डाइभर्सन बगाउने जोखिम हुन्छ । महेन्द्रराजमार्ग अन्तर्गत बुटवल नारायणगढ खण्डको १ सय १४ किलोमिटर क्षेत्रमा दर्जनौं डाइभर्सन रहेका छन् ।

साथै सडक फराकिलो पार्ने जिम्मा लिएको चिनियाँ ठेकेदार कम्पनी चाइना स्टेट इन्जिनियरिङ कर्पोरेसनले काम थालेको ३ वर्षको अवधिमा १७ प्रतिशत मात्र काम सम्पन्न गरेको छ ।

आगामी साउन २२ गते सडक निर्माणको काम सकेर नेपाल सरकारलाई हस्तरन्तरण गर्नुपर्ने सम्झौतामा उल्लेख भए पनि उसले १७ प्रतिशत मात्र काम सम्पन्न गरेको छ ।

कछुवा गतिमा काम गरेका कारण राजमार्गमा खाल्डैखाल्डा छन् । कल्भर्ड र नयाँ बनाइएका पुल निर्माण स्थलका अस्थायी डाइभर्सनमा पानीले निकास नपाउँदा सडक नै बगाउने गरेको छ । यस्तै बाढीका कारण महेन्द्रराजमार्ग हुँदै पूर्वपश्चिम यात्रा गर्नेहरू जोखिममा परेका छन् । दाउन्नेमा पहिरो जाने क्रम अहिले पनि रोकिएको छैन । वर्षात नरोकिएसम्म दाउन्नेमा यातायात सुरु गर्न कठिन हुने प्रहरीले जनाएको छ ।

प्रकाशित : असार १५, २०७९ १६:०९
प्रतिक्रिया
पठाउनुहोस्

स्थानीय तहमा अनियमितता बढ्दै गयो : राष्ट्रपति

कान्तिपुर संवाददाता

काठमाडौँ — राष्ट्रपति विद्यादेवी भण्डारीले स्थानीय तहहरूमा अनियमितता बढ्दै जानु चिन्ताको विषय बनेको टिप्पणी गरेकी छन् ।

बुधबार महालेखापरीक्षकको कार्यालयको ६४ औं वार्षिकोत्सव कार्यक्रममा राष्ट्रपति भण्डारीले स्थानीय तहहरूमा अनियमितता बढ्दै जानु चिन्ताको विषय बनेको बताएकी हुन् ।

यस क्रममा उनले स्थानीय तहका नेतृत्वले विगतका कमी, कमजोरी नदोहोरिने गरी आर्थिक अनुशासनको पालना गर्नुपर्ने भन्दै सुझाव दिएकी थिइन् । आर्थिक शुद्धता नै सुशासनको महत्त्वपूर्ण आधार भएको उल्लेख गर्दै राष्ट्रपति भण्डारीले महालेखापरीक्षकको कार्यालयले सार्वजनिक निकायहरूबाट नियमित सार्वजनिक सेवा प्रवाह, विकास निर्माण, राजश्व संकलन, स्रोत र साधनको बाँडफाँट लगायत सुधारका क्षेत्र पहिचान गरी सरकारलाई महत्त्वपूर्ण सुझाव दिनुपर्ने बताइन् ।

राष्ट्रपति भण्डारीले भनिन्, ‘विगतका लेखापरीक्षणको प्रतिवेदनले बेरुजु बढिरहेको पक्ष औंल्याएका छन् । अपेक्षाकृत रुपमा बेरुजु फर्छ्योट भएको देखिँदैन । त्यसैले विगत लामो समयदेखि कायम रहेको बेरुजुलाई यस पटक अभियानको रुपमा फर्छ्योट गर्दै आगामी आर्थिक कारोबार गर्दा बेरुजु नहुने व्यवस्था मिलाइ आर्थिक अनुशासन पालनामा सबैको ध्यान जानु पर्दछ । पछिल्लो समयमा नवस्थापित स्थानीय तहहरूमा अनियमितता वृद्धि हुँदै जानु चिन्ताको विषय बनेको छ । हाल स्थानीय तहको निर्वाचन सम्पन्न भइ नयाँ नेतृत्व जिम्मेवारी सम्हाल्ने क्रम सुरु भएको सन्दर्भमा नयाँ नेतृत्वले विगतका कमजोरी नदोहोरिने गरी आर्थिक अनुशासनको पालना गर्नुपर्छ । आर्थिक शुद्धता नै सुशासनको सबैभन्दा महत्त्वपूर्ण आधार हो भन्ने कुरा हामीले बुझ्न र बुझाउन आवश्यक छ ।'

यस्तै तीनै तहमा आर्थिक पारदर्शिता कायम गर्न महालेखा कार्यालय सक्षम हुनुपर्ने पनि उनले सुझाव दिएकी थिइन् । सार्वजनिक वित्तीय व्यवहारमा पारदर्शिता र स्वच्छता हासिल गरी सार्वजनिक प्रशासनमा देखिएका अनियमितता, चुहावट र भ्रष्टाचारजन्य कार्य नियन्त्रण गर्दै विकास, समृद्धिको वातावरण सिर्जना गर्न राज्यका सम्पूर्ण निकायको एकीकृत र समन्वयात्मक विकास हुनुपर्ने उनको भनाइ थियो ।

प्रकाशित : असार १५, २०७९ १६:०४
पूरा पढ्नुहोस्
प्रतिक्रिया
पठाउनुहोस्
×