गण्डकीलाई कम बजेट- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

गण्डकीलाई कम बजेट

कान्तिपुर संवाददाता

पोखरा — संघीय सरकारले आगामी आर्थिक वर्ष २०७९/८० का लागि गण्डकी प्रदेशलाई १६ अर्ब ५४ करोड ३२ लाख रुपैयाँ बजेट विनियोजन गरेको छ । जुन अन्य प्रदेशको तुलनामा सबैभन्दा कम हो । 

वाग्मती प्रदेशलाई सबैभन्दा बढी २० अर्ब ३२ करोड ६६ लाख रुपैयाँ विनियोजन भएको छ । गण्डकीलाई समानीकरण अनुदानतर्फ ७ अर्ब ९२ करोड ७९ लाख रुपैयाँ बजेट छ । यस्तै ससर्त अनुदान ६ अर्ब ९१ करोड ८३ लाख, विशेष अनुदान ८६ करोड, समपूरक अनुदान ८३ करोड ७० लाख रुपैयाँ राखिएको छ ।

गण्डकीका ११ जिल्लाका लागि केन्द्रबाट अन्तरसरकारी वित्तीय हस्तान्तरणअन्तर्गत सो रकमबापतको बजेट आएको हो । अघिल्लो आर्थिक वर्षमा प्रदेशलाई १३ अर्ब २ करोड ९७ लाख रुपैयाँ विनियोजन गरिएको थियो । समपूरक अनुदान अघिल्लो आर्थिक वर्षभन्दा ३ करोड ६६ लाख कम हो । अघिल्लो वर्ष पनि गण्डकी प्रदेशले ७ प्रदेशमा सबैभन्दा कम अनुदान पाएको थियो । बजेटले गण्डकी प्रदेशमा पूर्वाधारलाई जोड दिएको छ ।

गण्डकीमा विभिन्न क्षेत्रमा समेटिएको बजेटले संस्कृति जगेर्नालाई पनि जोड दिइएको छ भने कृषि उत्पादनलाई पनि प्राथमिकता दिएको छ । गण्डकी प्रदेश सरकारले प्राथमिकतामा राखेको हिमाली जिल्लामा स्याउ उत्पादन र प्रशोधन केन्द्र बनाउने कार्यक्रमलाई संघीय सरकारले पनि प्राथमिकता दिएको छ । गण्डकीलाई सडक मानवमुक्त सडक बनाउन संघले पनि पहल गरेको छ । निजी क्षेत्रको लगानीमा चितवन–रामपुर–पोखरा द्रुत मार्ग निर्माण गरिने भएको छ ।

मुस्ताङको कोरलामा सुक्खा बन्दरगाह निर्माणको सम्भाव्यता अध्ययन गरिने भएको छ । पोखरामा रहेको गुरुङ मौलिक संस्कृति संरक्षण गुरुयोजना कार्यक्रमलाई सहयोग गर्ने र मुक्तिनाथ–उपल्लो मुस्ताङ जोड्ने सडक स्तरोन्नतिका साथै वीरेठाँटी–मुक्तिनाथ केबलकार पूर्वाधार तयार गर्न निजी क्षेत्रलाई सहजीकरण गर्ने बजेट वक्तव्यमा उल्लेख गरेको छ ।

बागलुङको बलेवा विमानस्थलको स्तरोन्नति गर्ने भएको छ । विमानस्थल पूर्वाधारका लागि १२ अर्व २४ करोड विनियोजन भएको छ ।

प्रकाशित : जेष्ठ २८, २०७९ ११:४५
प्रतिक्रिया
पठाउनुहोस्

सवारी दुर्घटनामा दुई जनाको मृत्यु, पाँच घाइते

लक्ष्मी गौतम

पाँचथर — पाँचथर र इलाममा छुट्टाछुट्टै भएको सवारी दुर्घटनामा दुई जनाको मृत्यु भएको छ । पाँच जना घाइते भएका छन् ।

पाँचथरको फालेलुङ गाउँपालिका–३ नाम्लुवास्थित भित्रि सडकखण्डमा पञ्चमुखीदेखि थोक्लिम्बातर्फ जाँदै गरेको प्र.१–०२–००३ त १८५४ नम्बरको ट्याक्टर अनियन्त्रित भइ सडकदेखि १० फिट तल खस्दा स्थानीय २२ वर्षीय सुरेश साँवाको घटनास्थलमै मृत्यु भएको जिल्ला प्रहरी कार्यालय पाँचथरले जनाएको छ ।

मेची राजमार्गको झापा इलाम सडक खण्ड अन्तर्गत इलामको सूर्योदय नगरपालिका–७ सुकेपोखरीमा भएको जिप दुर्घटनामा झापाको बिर्तामोड नगरपालिका ३ निवासी ५७ वर्षीय ईश्वरीप्रसाद खरेलको मृत्यु भएको छ । प्रदेश प्रहरी कार्यालय विराटनगरका अनुसार गम्भीर अवस्थामा रहेका उनको झापाको बिएन्डसी अस्पतालमा उपचारका क्रममा मृत्यु भएको हो ।

बिर्तामोडदेखि फिक्कलतर्फ जाँदै गरेको प्रदेश न. १–०१–००१ च ९१९३ नम्बरको जिप साँझ ७ बजे अनियन्त्रित भई सडकदेखि एक सय मिटर तल खस्दा खरेलसहित ६ जना घाइते भएका थिए ।

दुर्घटनामा चालक झापा बिर्तामोड नगरपालिका–५ का ५० वर्षीय गणेश पराजुलीसहित जिपमा सवार विर्तामोड ४ का ४५ वर्षीय एकराज विष्ट, विर्तामोड ४ का ४५ वर्षीय डिल्ली बस्नेत, बिर्तामोड ३ का ४७ वर्षीय तसबहादुर प्रधान र बिर्तामोड–४ का ५३ वर्षीय सन्तोष श्रेष्ठको बिएन्डसी असपतालमा उपचार भइरहेको छ ।

प्रकाशित : जेष्ठ २८, २०७९ ११:४३
पूरा पढ्नुहोस्
प्रतिक्रिया
पठाउनुहोस्
×