पूर्वी नवलपरासीमा कांग्रेसबाट धमाधम राजीनामा- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

पूर्वी नवलपरासीमा कांग्रेसबाट धमाधम राजीनामा

कान्तिपुर संवाददाता

पूर्वी नवलपरासी — स्थानीय तहको निर्वाचनमा कांग्रेसले सबैजसो स्थानमा पराजय भोगेपछि नेपाली कांग्रेसका नेताहरुले धमाधम राजीनामा दिएका छन् । पराजयको कारणमा जिल्ला नेतृत्व दोषी देखिएको दाबी गर्दै नगर तहका नेताले राजीनामा दिएका हुन् । देवचुली नगरपालिकाका पार्टी सभापति डिल्लीराम कडरिया र कावासोती नगरपालिकाका सचिव विनोद रानामगरले राजिनामा दिएका हुन् । 

रानाले दिएको राजीनामा पत्रमा स्थानीय तहको निर्वाचनमा पार्टीले लज्जास्पद हार ब्यहोरेका कारण पदमा बसिरहन उपयुक्त नदेखिएको बताएका छन् । कावासोती र देवचुली नगरपालिकामा उम्मेदवार नमिलेकै कारण पार्टीले पराजय भोग्नुपरेको उनिहरुले राजीनामा पत्रमा आशय व्यक्त गरेका छन् । अन्य वडा र प्रदेश कमिटीमा रहेका सदस्यले पनि राजीनामा दिएका छन् ।

पार्टीको केही महिनाअघि सम्पन्न निर्वाचनमा सर्वाधिक मत ल्याएर कावासोती नगर सचिव चुनिएका राना स्थानीय तहको निर्वाचनमा वडा १३ मा वडाध्यक्षको उम्मेदवार भएर पराजित भएका थिए । उनी २०७४ मा निर्वाचित वडाध्यक्ष हुन् ।

त्यसैगरी देवचुली नगरपालिकाका पार्टी सभापति डिल्लीराम कडरियाले जिल्लाभरी कांग्रेसले नराम्रो पराजय भोगेको कारण देखाएका छन् । उनले देवचुलीमा कांग्रेसका लज्जास्पद हारका पछाडि जिल्ला नेतृत्वको मुख्य हात रहेको दाबी गरेका छन् । पार्टी जिल्ला नेतृत्वले जनमत नभएका व्यक्तिलाई खोजीखोजी टिकट दिएको र पराजय भोग्न परेको उल्लेख गरेका छन् ।

पूर्वी नवलपरासीको ८ स्थानीय तहमध्ये ६ वटामा कांग्रेस पराजित भएको छ । यहाँको विनयी त्रिवेणी र बुलिंटार गाउँपालिकामा कांग्रेसकै अन्तर्घातका कारण पराजित भएको नेताहरु बताउँछन् । २०७४ मा ६ पालिकामा बहुमतसहित मुख्य पदमा कांग्रेस निर्वाचित भएको थियो । यसपटक हुप्सेकोट र गैंडाकोट नगरपालिकामा मात्र कांग्रेस बहुमतसहित विजयी भएको छ । अन्य ६ वटा पालिकामा पराजित भएको छ ।

प्रकाशित : जेष्ठ ११, २०७९ २२:१३
प्रतिक्रिया
पठाउनुहोस्

हिमालपारि ‘उज्यालो’ पाएपछि...[तस्बिरहरु]

शब्द तथा तस्बिर : अंगद ढकाल

चामे (मनाङ) — तीन दिनको पैदलमा पुगिने सिमान्तकृत गाउँ नारबाट जसोतसो आइपुगेकी ८४ वर्षीया छिरिङ कुन्जोप बिहीबार दिउँसो चामेको स्वास्थ्य चौकीमा निकै खुशी बनेर कुराकानी गरिरहेकी थिइन् । मोतीबिन्दुको उपचारपछि आफू सामुका गाउँले र आफन्तलाई प्रस्टै चिनेपछि उनले भनिन्— संसारै उज्यालो भयो ।

चामेको सामुदायिक आँखा केन्द्रमा मंगलबार र बुधबार आयोजित शिविरमा छिरिङ कुन्जोपजस्तै अरु ६४ जना आँखाका बिरामीहरु एकैचोटी खुशीले रमाए, सबैले तिलगंगा अस्पतालको सत्कार्यमा ताली पिटेर स्याबासी जनाए । गरिब एवं स्वास्थ्य पहुँचमा नपरेका जनसाधारणको नि:शुल्क आँखा उपचार गर्न स्थापित तेज कोहली एण्ड रुइत फाउन्डेशनका तर्फबाट आयोजित शिविरमा तिलगंगा अस्पतालको जनशक्ति र प्राविधिक सहयोग रहेको थियो । ‘हामीले आँखा उपचारको सहज पहुँच नरहेका केही जिल्लामा पालोक्रममा आँखा शिविर राख्ने निर्णय गरेअनुसार यसपटक मनाङ आएका हौं,’ तिलगंगा आाखा अस्पतालका कार्यकारी निर्देशक डा.सन्दूक रुइतले कान्तिपुरसँग भने । उनका अनुसार, तेज कोहली एण्ड रुइत फाउन्डेशनका तर्फबाट सोलुखुम्बू, रोल्पा, हुम्ला, गोर्खा, मुस्ताङलगायतका जिल्लामा नि:शुल्क आँखा शिविर राखिनेछ ।

चामे शिविर संचालनमा बिरामीका लागि आवतजावत तथा स्थानीय बसोबासको सौजन्य मनाङ, भ्राकावासी व्यवसायी कालु घलेले गरेका थिए । यसअघि तेज कोहली एण्ड रुइत फाउन्डेशनकै सहयोगमा गत चैतमा रामेछापको दोरम्बामा ३ सय जना बिरामीको मोतीबिन्दु शल्यक्रिया गरिएको थियो । मनाङमा शिविर संचालन गर्नुअघि जिल्लाका थानचोक, ताल, ओडार, खाङसार, भ्राका, हुम्दे, नारसहितका १७ स्थानमा पूर्वपरीक्षण गरेर आँखा बिरामीको पहिचान गरिएको थियो । चामे शिविरमा डा.सन्दूक रुइत, डा.सागर रुइतले बिरामीको आँखा शल्यक्रिया गरेका थिए ।


प्रकाशित : जेष्ठ ११, २०७९ २१:५२
पूरा पढ्नुहोस्
प्रतिक्रिया
पठाउनुहोस्
×