पोखरामा एमालेको नाराबाजीले रोकिएको मतगणना पुन: सुरु
पोखरा — पोखरा महानगरपालिकाको मतगणनास्थलमा सत्ता गठबन्धनले तोकिएको भन्दा धेरै प्रतिनिधि राखेको भन्दै नेकपा एमालेका प्रतिनिधिले विरोध जनाएपछि मतगणना प्रभावित भएको छ । विवादका कारण केहीबेर मतगणना स्थगित भएको थियो । अहिले पुन: मतगणना सुरु भएको छ ।
सहिदचोकस्थित जिल्ला समन्वय समितिको सभाहलमा भइरहेको मतगणनाका क्रममा दलका प्रतिनिधिबीच विवाद भएको थियो ।
वडा नम्बर ७ को मतगणना भइरहँदा एमाले प्रतिनिधिले नेपाली कांग्रेसले धेरै प्रतिनिधि प्रवेश गराएको आरोप लगाएका थिए । कांग्रेसका प्रतिनिधिले भने गठबन्धनका दलको तर्फबाट गणक प्रतिनिधि खटाएको दाबी गरेका छन् ।
त्यही क्रममा विवाद हुँदा केही बेर मतगणना स्थगित भएको हो । एमाले कार्यकर्ताले मतगणना भइरहेको हल बाहिर नाराबाजी गरेपछि मतगणना कार्य रोकिएको थियो । प्रहरीले स्थिति नियन्त्रणमा लिएपछि हाल मतगणना सुरु भइसकेको छ ।
पोखरामा हाल सत्तारुढ गठबन्धनबाट मेयर उम्मेदवार एकीकृत समाजवादीका धनराज आचार्य एमालेका कृष्णबहादुर थापाभन्दा २ हजार भन्दा बढी मतले अगाडि छन् । वडा नम्बर १ र ५ एमालेले जितेको छ भने २, ३, ४, १२, १३, २३, २४ र २६ कांग्रेसले जितेको छ ।
प्रकाशित : जेष्ठ ४, २०७९ १६:३०
