गण्डकीमा निर्वाचन सुरक्षामा कडाइ- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

गण्डकीमा निर्वाचन सुरक्षामा कडाइ

प्रदेशमा १२५३ मतदानस्थल रहेकोमा २८५ अति संवेदनशील
लालप्रसाद शर्मा

पोखरा — स्थानीय तहको निर्वाचनमा भोट खसाल्ने दिनको प्रतीक्षा एक दिनमात्रै बाँकी छ । मतदाता सुरक्षितसाथ आफूले चाहेको उम्मेदवारलाई मत खसाल्न आतुर छन् । निर्वाचनमा ढुक्कसाथ मतदानको अधिकार प्रयोग गराउने वातावरणका लागि सुरक्षा व्यवस्था पनि कडा पारिएको छ ।

अहिलेसम्म चुनावी हिंसाका घटना नभए पनि गण्डकी प्रदेशका सबै ११ वटै जिल्लामा निर्वाचन शान्तिपूर्ण रूपमा सम्पन्न गर्न आवस्यक तयारी पूरा भएको प्रदेश प्रहरी कार्यालयले जनाएको छ । गुन्डागर्दी, विस्फोटन, आगजनी, उम्मेदवार तथा मतदाता अपहरण, धम्कीलगायत गतिविधि हुन सक्ने भन्दै त्यसका लागि आवश्यक सतर्कता र निगरानी बढाइएको प्रदेश प्रहरी कार्यालयका प्रवक्ता डीएसपी विनोद शर्माले बताए । ‘राजनीतिक दल, भ्रातृ संगठनबीच हुन सक्ने झगडा, लडाइँ, भौगोलिक कठिनाइ, प्राकृतिक प्रकोपसमेतलाई ध्यानमा राख्दै आवश्यक सुरक्षा व्यवस्था मिलाइएको छ,’ उनले भने, ‘निर्वाचनमा हुन सक्ने घटनालाई विभिन्न कोणबाट अनुसन्धान गर्दै सोहीअनुसार सुरक्षा रणनीति बनाइएको छ ।’

प्रदेशमा १२५३ मतदानस्थल रहेकोमा २८५ अति संवेदनशील देखिएकाले सोहीअनुसार सुरक्षा योजना बनाइएको शर्माले बताए । यसैगरी ५४६ संवेदनशील र ४२२ मतदानस्थल सामान्य पहिचान गर्दै सोही अनुसार सुरक्षा रणनीति बनाइएको शर्माको भनाइ छ । अति संवेदनशील मतदानस्थलमा सबैभन्दा बढी गोरखामा ६७, स्याङ्जामा ५३ र कास्कीमा ५० छन । मुस्ताङमा एउटै मतदानस्थल अति संवेदनशीलमा परेको छैन । यसैगरी संवेदनशीलमा गोरखाकै १३७, लमजुङका ८० र स्याङ्जाका ७३ मतदानस्थल रहेका छन् ।

प्रदेशभरि २ हजार ३ सय मतदान केन्द्र तोकिएका छन् । प्रदेश प्रहरी प्रमुख डीआईजी दिवेश लोहनीले खासै ठूलो थ्रेट नदेखिए पनि संभावित सुरक्षा चुनौतीका लागि आवश्यक योजना बनाइएको बताए । ‘दलहरूले पनि समन्वयकारी भूमिका खेल्नु भएकाले विगतमा जस्तो अप्रिय घटना नहुनेमा विश्वस्त छौं,’ उनले भने, ‘मतदातालाई सुरक्षाको पूर्ण विश्वास दिलाएर मतदान गर्ने वातावरण मिलाउन सबै सुरक्षा निकायबीचको समन्वयमा काम भइरहेको छ । निर्वाचन विरोधी सबैखाले चुनौतीको सामना गर्न सुरक्षा योजना चुस्त बनाइएको छ ।’ प्राकृतिक प्रकोपबाट हुन सक्ने जोखिमप्रति पनि सचेत रहेको उनले बताए ।

स्याङ्जामा ५३ मतदानस्थल अति संवेदनशील

स्याङ्जा– स्थानीय तहको निर्वाचनको लागि पाँच नगरपालिका र ६ गाउँपालिका रहेको स्याङ्जामा एक सय ९९ वटा मतदान स्थल कायम गरिएको छ, जसमा ३ सय १८ वटा मतदान केन्द्र छन् । तीमध्ये ५३ वटा मतदान स्थल अति संवेदनशील रहेको प्रमुख जिल्ला अधिकारी राजु पौडेलले बताए । उनका अनुसार ७३ वटा स्थल संवेदनशील र ७१ वटा स्थल सामान्य छन् । अति संवेदनशील मतदान स्थलमा सोहीअनुसार सुरक्षाकर्मीको परिचालन गरिएको प्रजिअ पौडेलले बताए । जिल्ला निर्वाचन कार्यालयका कम्प्युटर अपरेटर खुमबहादुर भुजेलका अनुसार कुनै पनि केन्द्रमा मतदान गर्न मतदाता ५ किलोमिटरभन्दा बढी हिँड्नु पर्दैन । स्याङ्जामा २ लाख ४० हजार ५ सय ३५ जना मतदाता छन् । १९ वटा राजनीति दल रहे पनि १२ दलबाट मात्र उम्मेदवारी परेको छ । यसैगरी एउटा स्वतन्त्र उम्मेदवारी परेको छ ।

प्रकाशित : वैशाख २९, २०७९ १०:०४
प्रतिक्रिया
पठाउनुहोस्

पोखरामा यस्तो देखियो मतदानस्थल [तस्बिरहरु]

लालप्रसाद शर्मा

पोखरा — स्थानीय तह निर्वाचन गर्न निर्वाचन अधिकृतसहित सबै कर्मचारी र सुरक्षाकर्मी मतदान सामग्रीसहित सम्बन्धित मतदानस्थल पुगिसकेका छन् । निर्वाचन तालिकाअनुसार बुधबार र बिहीबार मतदाता परिचयपत्र वितरण, मतदाता शिक्षा दिने र मतदान केन्द्र बनाउने समय हो ।

पहिलो दिन बुधबार नयाँ मतदाताको परिचयपत्र वितरण गर्ने योजना रहे पनि खासै मतदाताहरु लिन आएनन् । फाट्टफुट्टमात्रै परिचयपत्र लिन आएका थिए । नागरिकतालगायत परिचयपत्रका आधारमा पनि मतदान गर्न पाउने निर्वाचन आयोगले जनाएकाले पनि मतदाता परिचय पत्र लिन नआएको अनुमान गरिएको छ । अधिकांश बिहीबार पनि आउने अनुमान छ ।

यसैगरी आयोगले दुवै दिन मतदाता शिक्षा दिने भने पनि पोखराका केही मतदानस्थलमा त्यस्तो देखिएन । नयाँ मतदातालाई परिचयपत्र वितरणसँगै नमुना मतपत्रमा मत हाल्न सिकाउने भनिएकोमा त्यस्तो नभएको हो । ‘पहिलो दिन भएर पनि होला मतदाता परिचयपत्र लिन खासै आएनन्,’ पोखरा–७ वडा कार्यालय मतदानस्थलका मतदान अधिकृत दिनेश काफ्लेले भने, ‘बिहीबार आउनुहोला ।’ फाट्टफुट्ट परिचयपत्र लिन आउनेले पनि मतदाता शिक्षासम्बन्धी कुनै कुरा नगरेको र कसैले सोधेमा भोट हाल्न पनि सिकाएको उनले बताए ।

प्रकाशित : वैशाख २८, २०७९ १९:३३
पूरा पढ्नुहोस्
प्रतिक्रिया
पठाउनुहोस्
×