लागूऔषधका लागि अदालत तोडफोड- गण्डकी - कान्तिपुर समाचार

लागूऔषधका लागि अदालत तोडफोड

लालप्रसाद शर्मा

पोखरा — लागूऔषध दुर्व्यसनलगायत मुद्दामा पक्राउ परी सजाय भोगेका व्यक्तिले कास्की जिल्ला अदालत तोडफोड गरेको पाइएको छ । पोखरा-१५ टुटुंगाका २७ वर्षीय अर्जुन परियार (दावा) लाई प्रहरीले बुधबार राति पक्राउ गरी बिहीबार सार्वजनिक गरेको छ । 

मंगलबार राति अदालतको एक र ६ नम्बर इजलास कक्षको ढोका र दराज फोरेर मिसिल र अन्य महत्त्वपूर्ण कागजात चलाएको अवस्थामा बुधबार बिहान भेटिएको थियो । प्रहरीका अनुसार अर्जुन मंगलबार राति ९ देखि १० बजेको बीचमा फिर्केखोलाबाट अदालतभित्र पसेका थिए । अदालतसँगैको फिर्केखोला त्यस्तो ठाउँ हो‚ जहाँ बरामद लागूऔषध जलाउने गरिन्छ ।

खोलाकिनारमा लागूऔषध जलाएको ठाउँमा अर्जुनले खोतलेको र फेनरागन र नुर्फिन गरी दुई एम्पुल लागूऔषध पनि भेटेको प्रहरीको दाबी छ । त्यसपछि उनी ‘सामान’ (लागूऔषध) भेटिने‚ नभए पैसा पाइने आशमा अदालतको नयाँ भवनको दोस्रो र तेस्रो तलामा रहेका इजलास कक्षका ढोका फोरेर पसेको कास्की प्रहरीका प्रवक्ता डीएसपी सुन्दर तिवारीले बताए ।

‘यसअघि विभिन्न ८ वटा मुद्दा बेहोरिसकेका अर्जुनले लागूऔषध नष्ट गर्ने स्थान देखेका रहेछन्‚’ उनले भने, ‘त्यसैले लागूऔषधकै खोजीमा अदालत छिरेको देखिन्छ ।’ पेसीमा जाने क्रममा लागूऔषध लगेर डिस्पोज गरेको देखेकाले अदालतभित्र लागूऔषध हुनेरहेछ भन्ने बुझेर खोजीमा आएको उनले बयानमा भनेका छन् । कुनै पनि कागजात भने नलगेको उनले बताएका छन् ।

अर्जुनविरुद्ध कास्की जिल्ला अदालतमा अनधिकृत प्रवेश तथा आपराधिक उपद्रवसम्बन्धी र नकबजनी चोरी उद्योगमा मुद्दा चलाइएको प्रहरीले जनाएको छ ।

कास्की जिल्ला अदालतका सूचना अधिकारी नीलप्रसाद पनेरुले अहिलेसम्म कुनै पनि मिसिल हराएको नभेटिएको बताए । ‘मिसिलभित्रका कुनै प्रमाणहरू चोरिएको आशंकामा प्रमाणित गर्ने काम भइरहेको छ‚’ उनले भने । अदालतको मुख्य प्रवेशद्वारमा चौबीसै घण्टा प्रहरीको सुरक्षा रहने र ठीक अगाडि वडा प्रहरी कार्यालय बैदाम भए पनि अर्जुन अदालतमा प्रवेश गर्न सफल भएका थिए ।

अर्जुनविरुद्ध २०७३ जेठ ६ मा अभद्र व्यवहार मुद्दा, भदौमा अभद्र व्यवहारमा अर्को मुद्दा परेको थियो । उनीविरुद्ध सोही वर्षको असोजमा चोरी मुद्दा, २०७४ कात्तिकमा लागूऔषधसम्बन्धी मुद्दा, माघमा जिल्ला प्रहरी रुपन्देहीमा अभद्र व्यवहारसम्बन्धी मुद्दा, २०७५ असारमा लागूऔषध, २०७६ मंसिरमा अभद्र व्यवहारसम्बन्धी मुद्दा चलेको थियो । यसका साथै २०७६ चैत ९ गते वडा प्रहरी कार्यालय बैदाममा लागूऔषध कसुरमा पक्राउपछि कारागार चलान भएका अर्जुन २०७८ फागुन २३ मा थुनामुक्त भएका थिए ।

प्रकाशित : चैत्र १०, २०७८ १५:४१
प्रतिक्रिया
पठाउनुहोस्

कास्की अदालतको इजलास कक्षमा तोडफोड, कागजात चोरिएको आशंका

लालप्रसाद शर्मा

पोखरा — कास्की जिल्ला अदालतको मुख्य प्रवेशद्वारमा चौबीसै घण्टा प्रहरीको सुरक्षा छ । ठीक अगाडि वडा प्रहरी कार्यालय छ । त्यहाँबाट जिल्ला अदालत छ्यांगै देखिन्छ । सुरक्षित मानिएको जिल्ला अदालतका दुईवटा इजलास कक्ष मंगलबार राति तोडफोड भएको छ । 

अदालतका सूचना अधिकारी नीलप्रसाद पनेरूका अनुसार १ र ६ नम्बर इजलासका ढोका र दराज फोडिएका छन् । १ नम्बर इजलास प्रमुख न्यायाधीश श्रीकृष्ण भट्टराई र ६ नम्बर इजलासमा देवप्रसाद योगीले मुद्दा हेर्दै आएका थिए । ६ नम्बर इजलासको मूल ढोका र भित्रको फाँट प्रवेश गर्ने ढोका फोडिएको छ । त्यहाँका ३ वटा दराजको ताला पनि खोलिएको छ ।

मिसिल कागजात चलाइएको छ । घर्रा पनि खोलिएको छ । १ नम्बर इजलासको ढोका फोडिएको छ । ताला नभएको दराजका कागजात पनि चलाइएको छ । टेबलका घर्रा खुलेका छन् । पनेरूले भने, ‘६ नम्बरमा फलामे रडसमेत भेटिएको छ ।’

सरसफाइ गर्न आएकी मनमाया कुमालले बुधबार बिहान ढोका र दराज फोडिएको देखेपछि कर्मचारीहरूलाई खबर गरेकी थिइन् । तीनतले नयाँ भवनको दोस्रो र तेस्रो तलामा रहेका इजलास कक्ष फोडिएका हुन् । तोडफोडका कारण ६ नम्बरको इजलासमा बुधबार सुनुवाइ हुन सकेन । सूचना अधिकारी पनेरूका अनुसार महत्त्वपूर्ण मिसिल चोरी भएको शंका गरिएको छ ।

कास्कीका एसपी रमेश थापाले घटनाको अनुसन्धान भइरहेको बताए । प्रहरीले घटनास्थलको ‘फिंगर प्रिन्ट’ र ‘फुट प्रिन्ट’ निकालेको छ । ‘फिर्के खोलामा तारबार छैन, अन्यत्र २०२१ सालमा बनेको पर्खाल छ । अदालतका ढोका पनि पुराना छन्,’ पनेरूले भने, ‘अदालतमा सुरक्षा चुनौती महसुस गरेका छौं ।’

अदालतको गेटमा असईको नेतृत्वमा ७ प्रहरी खटिएका छन् । उक्त क्षेत्र प्रदेश प्रमुखको कार्यालय, मुख्यमन्त्रीको निवासदेखि जिल्ला प्रशासन, जिल्ला समन्वय, प्रदेश नीति तथा योजना आयोग, नगर विकास समितिजस्ता महत्त्वपूर्ण सरकारी कार्यालय रहेको स्थान पनि हो ।

प्रकाशित : चैत्र ९, २०७८ १२:५६
पूरा पढ्नुहोस्
प्रतिक्रिया
पठाउनुहोस्
x
×