हिउँ खेल्न गएका दुई किशोर ११ दिनपछि मृत भेटिए

फाल्गुन १, २०७८हरिराम उप्रेती

गोरखा — हिउँ खेल्न जाँदा सम्पर्कविहीन भएका दुई किशोर ११ औं दिनमा मृत भेटिएका छन् । माघ २० गते हिउँ खेल्न गएका बारपाक सुलिकोट गाउँपालिका–२ का १६ वर्षीय करण घले र वडा नम्वर १ का १६ वर्षीय साइँला भन्ने सञ्जय घले बेपत्ता बनेका थिए ।

आइतबार साँझ ५ बजे स्थानीय र वारपाक प्रहरी चौकीबाट खटिएको संयुक्त खोजी टोलीले उनीहरुको शव बारपाक सुलिकोट गाउँपालिका–१ तिम्राखोलाको डाँडाको खोचमा फेला पारेको जिल्ला प्रहरी कार्यालय गोरखाका डिएसपी प्रकाश दाहालले बताए । शवको प्रकृति र घटनास्थलको अवस्थाअनुसार दुई किशोर हिउँ परेको समयमा डाँडाबाट लडेर खोचमा पुगेको प्रारम्भिक अनुमान गरिएको डिएसपी दाहालले बताए ।