नागरिकको समस्या समाधानमा लाग्न प्रहरी महानिरीक्षक थापाको निर्देशन

कास्की जिल्ला प्रहरी कार्यालय हातामा बनेका विभिन्न भवनको शुक्रबार उद्घाटन गर्दै उनले प्रहरी समाजका लागि एउटा अनिवार्य संगठन भइसकेकाले सोहीअनुसार काम गर्न मातहतका निकायलाई भनेका हुन् ।

मानिसले दु:ख पर्दा पहिला भगवान्, त्यसपछि बाबुआमा र तेस्रोमा सम्झने प्रहरी रहेको उनले सुनाए । ‘प्रहरीको पेसा भनैको सदैव सेवा हो’, उनले भने, ‘प्रहरी सबैको सहयोगी भएकाले तलब र राशनमा मात्र नजोखी शान्ति सुरक्षा र सेवामा लाग्नुपर्छ ।’ प्रहरी जनस्तरबाट सबैभन्दा बढी सहयोग पाउने सरकारी निकाय रहेको उल्लेख गर्दै उनले यो प्रहरीप्रतिको माया र अपेक्षा पनि रहेको बताए ।

कास्की प्रहरी कार्यालय हातामा ७ करोड ६ लाख ११ हजारको लागतमा हिरासत, ब्यारेक, जुनियर, सिनियर प्रहरी अधिकृतको आवास र भान्छाघर बनेका हुन्। यसैगरी कम्पाउन्ड वाल र शौचालय पनि १ करोड १४ लाख ३० हजारमा बनिरहेको कास्की प्रहरी प्रमुख एसपी रमेश थापाले बताए ।

उक्त अवसरमा प्रहरीलाई शान्तिपूर्ण वातावारण निर्माण तथा सहकार्य गर्ने समाजसेवी र भवन निर्माण कार्यमा सहयोग पुर्‍याउनेलाई कदरपत्र र उत्कृष्ट कार्यसम्पादन गर्ने प्रहरी कर्मचारीलाई प्रशंसापत्र वितरण गरिएको थियो ।