म्याग्दीमा बालबालिकालाई कोरोनाको दोस्रो डोज- गण्डकी - कान्तिपुर समाचार

म्याग्दीमा बालबालिकालाई कोरोनाको दोस्रो डोज

कान्तिपुर संवाददाता

म्याग्दी — जिल्लामा १२ देखि १७ वर्ष उमेर समूहका बालबालिकालाई कोरोनाविरुद्धको दोस्रो डोज खोप लगाउन सुरु भएको छ । कोरोनाको तेस्रो लहरपछि बन्द गरिएका विद्यालयमा स्वास्थ्यकर्मी पुगेर सामाजिक दूरी र स्वास्थ्य सावधानी राख्दै विद्यार्थी बोलाई दोस्रो मात्रा खोप लगाउन थालिएको हो ।

शनिबार सदरमुकामका विद्यालयमा अध्ययनरत विद्यार्थीबाट सुरु गरिएको कोरोनाविरुद्धको दोस्रो मात्रा खोप माघ १४ सम्म सबै बालबालिकालाई लगाइसक्ने स्वास्थ्य कार्यालयले जनाएको छ । जिल्लामा १२–१७ वर्ष उमेर समूहका ११ हजार २ सय ७८ जना बालबालिकाले कोरोना विरुद्धको पहिलो मात्रा खोप लगाएका छन । यो तथ्यांक बालबालिकाको लक्षित जनसंख्याको ९० प्रतिशत खोप समेटिएको हो ।

‘वर्षा, हिमपातको प्रतिकूल मौसमका बीचमा पनि माघ १४ गतेभित्र जिल्लाका सबै पहिलो मात्रा खोप लगाएका १२–१७ वर्ष उमेर समूहका बालबालिकालाई कोरोनाविरुद्धको खोप लगाइसक्ने योजना छ,’ स्वास्थ्य कार्यालय प्रमुख एकनारायण लम्सालले भने, ‘यो बीचमा विद्यालयको पहुँचबाट छुटेका समुदायका अन्य बालबालिकालाई समेत खोजेर खोप लगाउँछौं ।’

प्रकाशित : माघ ११, २०७८ ०९:२२
प्रतिक्रिया
पठाउनुहोस्

माइनस तापक्रममा कोरोनाको ‘बुस्टर’ खोप

आश गुरुङ

लमजुङ — हिमाली जिल्ला मनाङमा अहिले तापक्रम माइनस डिग्रीमा छ । अत्यधिक चिसोमा स्थानीय जीवनयापन गरिरहेका छन् । माइनस डिग्रीमै अहिले मनाङमा कोरोनाविरुद्धको ‘बुस्टर’ खोप लगाउने काम भइरहेको छ । हिमपात, मौसम बदली र चिसो एकसाथ हुँदा जनजीवन प्रभावित बनेको छ ।

चिसोका कारण धेरैजसो मनाङी काठमाडौं, पोखरा, बेंसीसहर झरे पनि गाउँमा भएकाहरू घरभित्रबाट निस्केर बुस्टर डोज खोप लगाउन पुग्ने गरेका छन् ।

मनाङमा १८ वर्षमाथि सबैले पहिलो र दोस्रो मात्राको खोप पाइसकेका छन् । चामे र नासों गाउँपालिकाका १२ देखि १८ वर्षसम्मका विद्यार्थीले मोडर्ना खोप लगाइसकेका छन् । नार्पाभूमि र मनाङ ङिस्याङ गाउँपालिकाका विद्यार्थी यसअघि नै झरिसकेकाले लगाउन बाँकी छ ।

मनाङमा प्राथामिकतामा पर्ने सुरक्षाकर्मी, ज्येष्ठ नागरिक, विभिन्न बिरामी साथै अन्य सर्वसाधारणलाई पनि बुस्टर खोप लगाउन थालिएको स्वास्थ्य कार्यालय प्रमुख बद्रीराज आचार्यले बताए । उनका अनुसार प्राथमिकतामा पर्नेसँगै अन्य नागरिकलाई पनि बुस्टर खोप लगाउन थालिएको छ । उनले चिसो र हिमपातका बाबजुत पनि बुस्टर खोप लगाइएको बताए । ‘खोपलाई २ देखि ८ डिग्री सेन्टिग्रेटमा राख्नुपर्छ । यहाँ दिउँसै तापक्रम माइनस ७ सम्म छ,’ उनले भने, ‘स्वास्थ्यकर्मीले म्यानेज गरेर खोप लगाइदिने गरेका छन् ।’

उनले खोप लगाइदिने स्वास्थ्यकर्मीको हातसमेत चिसोले समस्या पार्ने भएकाले हातलाई न्यानो राख्नेबारे समेत स्वास्थ्यकर्मी आफैंले ख्याल गरेको बताए । ‘हिमपात भइरहे पनि ओत लगाउने ठाउा, अस्पताल, स्वास्थ्य चौकी, कुनै भवनको ओभानो ठाउँमा हामीले खोप लगाउने गरेका छौं,’ उनले भने । उनका अनुसार यसअघि चामे गाउँपालिकामा बुस्टर खोप लगाउन सुरु गरिएकोमा तल्लो क्षेत्रको नासों गाउँपालिकामा आइतबारदेखि बुस्टर खोप लगाउन थालिएको छ । माथिल्लो मनाङको मनाङ ङिस्याङ गाउँपालिकामा फागुन २० बाट लगाउने भनिएको छ । नार्पाभूमि गाउँपालिकामा चिसोका कारण सबैजना काठमाडौं, पोखरा, बेंसीसहर झरेकाले फागुनमा मात्रै बुस्टर खोप लगाउनेबारे छलफल भएको उनले बताए ।

स्वास्थ्य कार्यालय मनाङका अनुसार माघ ५ बाट सुरु भएको बुस्टर डोज खोप लगाउने कार्यक्रमअन्तर्गत सोमबारसम्म ७ सय जनाले खोप लगाइसकेका छन् । प्रमुख जिल्ला अधिकारी रवीन्द्रप्रसाद आचार्यले चिसोका कारण प्रायः मनाङीले जिल्ला छाडेकाले सोचेअनुरूप खोप दिन नसकिएको बताए । उनले मनाङी फर्केपछि खोप अभियानलाई तीव्र पारिने बताए ।

‘अहिले पनि उपलब्ध र कोरोनाविरुद्धको कोभिसिल्ड र भेरोसेलको दोस्रो मात्रा लगाएर ६ महिना पुगेकालाई हामीले बुस्टर खोप दिएका छौं । सबैलाई आउन आह्वान गरेका छौं,’ उनले भने, ‘अहिले मान्छे नै छैन । मान्छे आउनेबित्तिकै हामी दिन्छौं । हामीसँग पर्याप्त खोप छ ।’ उनका अनुसार मनाङमा १८ वर्षभन्दा माथिका सबैले कोरोनाविरुद्धको दोस्रो मात्राको खोप लगाइसकेका छन् । पहिलो र दोस्रो खोपको मात्राको खोप लगाइसकेका ४ हजार ३ सय ९९ जना रहेको उनले बताए ।

प्रकाशित : माघ ११, २०७८ ०९:२१
पूरा पढ्नुहोस्
प्रतिक्रिया
पठाउनुहोस्
×