जनप्रतिनिधिको लापर्वाही : ५ वर्षदेखि बैठकमा अनुपस्थित, तर भत्ता नियमित- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

जनप्रतिनिधिको लापर्वाही : ५ वर्षदेखि बैठकमा अनुपस्थित, तर भत्ता नियमित

प्रकाश बराल

बागलुङ — बाग्लुङका दुई जना जनप्रतिनिधिले ५ वर्षको अवधिमा एक दिन पनि बैठकमा भाग नलिइकनै सेवा सुविधा भने नियमित रुपमा लिइरहेको पाइएको छ ।

बागलुङको काठेखोला गाउँपालिका २ का एमालेबाट निर्वाचित चिरन थापा र कांग्रेसबाट निर्वाचित जयबहादुर थापाले बैठकमा भाग नै नलिइकन नियमित भत्ता बुझेका हुन् । उनीहरूले निर्वाचित भएदेखि नै मासिक १३ हजार ५ सय रुपैयाँ बुझिरहेको पाइएको छ ।

पालिकाका कर्मचारीहरूका अनुसार निर्वाचनमा विजयी भएपछि उनीहरू शपथ ग्रहणमा आएका थिए । शपथ ग्रहणपछि कर्मचारीले बैंक खाता नम्बर र फोन नम्बर टिपेर राखेका थिए । ‘बैठकमा फोनबाट बोलाउने, पत्र पनि पठाउने चलन छ, तर उहाँहरू आउनु भएको छैन’ एक कर्मचारीले भने, ‘पटक पटक खबर भइरहेको छ, वास्ता नै गर्नु हुन्न ।’ बरु उनीहरूले बेलाबेला फोन नम्बरसमेत फेर्ने गरेकोले खोजीमा समेत समस्या भएको उनले बताए ।

सदस्य जयबहादुर थापाले भने पहिलो बैठकमै फरक दलको रुपमा अपमान गरेको भन्दै बैठकमा उपस्थित नभएको बताए । ‘एमालेले जितेको छ, म कांग्रेसको परें, सुरुमै हेपाहा प्रवृत्ति देखाए’ उनले भने, ‘त्यसपछि बैठकमा गएको छैन ।’ घरमै बसेर गाइभैंसी र खेतीपातीमा लागेको उनले बताए । उनले ५ वर्षदेखि नै मासिक १३ हजार ५ सय रुपैयाँ भने लिँदैआएका छन् ।

‘जनप्रतिनिधिको हाजिरी हुँदैन, बैठकमा आए नआएको विषयले तलब नदिने भन्ने छैन, त्यसैले पठाएका छौं’ प्रशासकीय अधिकृत मनोज कार्कीले भने, ‘तलब गइरहेको छ, पर्दैन पनि भन्नु भएको छैन ।’ थापाले सेवा सुविधा पाएको विषयमा भने केही प्रतिक्रिया दिएनन् ।

अर्का सदस्य चिरन थापाले पनि अहिलेसम्म बैठकमा बिनाउपस्थिति सेवा सुविधा भने लिँदैआएका हुन् । वडाध्यक्ष विद्यापति शर्माले उनी सुरुका एक/दुई वटा बैठकमा आएको दाबी गरे । ‘बैठकमा नआए पनि दुवैजनाले मलाई सधैँ सहयोग गर्नु भएको छ, मैले ल्याएका योजनामा साथ दिनु भएको छ’ शर्माले भने, ‘वडा र गाउँपालिकाको बैठकमा किन आउनु भएन, त्यो उहाँले जान्ने कुरा हो ।’

'दुई सदस्यहरू सहभागी हुनु भएको छैन । अन्य जनप्रतिनिधिहरूले वडाको बैठकसहित कार्यपालिका र गाउँ सभामा सक्रिय सहभागिता जनाउने गर्छन् । साथै योजना अनुगमन, मूल्यांकन तथा अन्य विकास निर्माणका काममा पनि सहयोग गरेका छन्। तर उहाँहरू उपस्थित हुनुहुन्न,' गाउँपालिका अध्यक्ष अमरबहादुर थापाले बताए ।

नियमित खटिने जनप्रतिनिधिले भने काममा लाग्दा तलब मात्र नभई आफ्नो पैसा पनि खर्च हुने बताए । ‘दैनिक काममा खटिंदा हजारौं रकम खर्चसमेत हुन्छ, नहिँड्नेलाई त बचत होला’ कार्यपालिका सदस्य टीका संगम बिकले भने, ‘जनप्रतिनिधि भएपछि जनताको काममा खटिनै पर्थ्यो, बैठकमै नजानु राम्रो काम भएन ।’ काठेखोला गाउँपालिकाले ५ वर्षमा ५५ वटा कार्यपालिका बैठक राखेको छ । वडा तहमा पनि मासिक रुपमा कम्तिमा एक/एक बैठक बस्ने गरेको शर्माले बताए । गाउँ सभा भने हरेक वर्ष २ पटक गरी १० वटा बसिसकेका छन् । ती कुनै पनि बैठकमा दुवैजना सदस्य उपस्थित नभएका हुन् ।

स्थानीय सरकार सञ्चालन ऐनमा भने यसरी उपस्थित नहुने जनप्रतिनिधिलाई के गर्ने, वा कारबाही गर्न मिल्छ कि मिल्दैन भन्नेबारे प्रष्ट छैन ।

प्रकाशित : माघ १, २०७८ १७:०६
प्रतिक्रिया
पठाउनुहोस्

संक्रान्तिका दिन टुँडिखेलमा जे देखियो

शब्द/तस्बिर: संजोग मानन्धर

काठमाडौँ — माघ महिनाको पहिलो दिन शनिबार बिहान स्नान, जप, तप, ध्यान, साधना गरी घ्यु, चाकु खाएर माघे संक्रान्ति पर्व मनाइएको छ । सूर्य धनु राशिबाट मकर राशिमा प्रवेश गर्ने संक्रान्ति अर्थात् माघ १ गते मकर (माघे) संक्रान्तिका नाममा पनि वैदिक सनातन हिन्दू धर्मावलम्बीले सनातनदेखि कूल परम्पराअनुसार यो पर्व मनाउँदै आएका छन् ।

कोरोना भाइरसको जोखिमका कारण सरकारले लगाएको प्रतिबन्धका कारण विगतको तुलनामा सार्वजनिक ठाउँमा जमघटका कार्यक्रम कम भए । तैपनि काठमाडौं टुँडिखेलमा मौलिक पोसाकमा सजिएका मगर समुदायका मानिसहरु भेला भइ तस्बिर खिच्ने र रमाइरहेका देखिए ।

माघ १ गतेदेखि उत्तरायण सुरु हुने भएकाले दिनभन्दा क्रमशः रात छोटो हुँदै जान्छ । उत्तरायण सुरु हुने दिनको स्नान, जप, तप, ध्यान साधना, दान आदिलाई पुण्यदायक मानिन्छ । यसैले आजका दिन देवघाट, त्रिशूली, कालीगण्डकी, वाग्मती, इन्द्रावती, त्रिवेणी, रिडीलगायत स्थानमा माघ स्नान गर्ने भक्तजनको भीड लाग्ने गरेकामा यस वर्ष कोरोना भाइरसको महामारीका कारण सीमित भक्तजनमात्र स्नान गर्न पुगेका थिए । देवघाटको मुख्यस्थलमा शुक्रबारदेखि नै प्रहरीले आउजाउ निषेध गरेको थियो ।

तराईवासीले माघ १ लाई नहान अर्थात् नुहाउने पर्वका रुपमा मनाउँछन् । वर्षभर ननुहाए पनि आज भने अनिवार्य नुहाउनुपर्ने मान्यता छ । धर्मसिन्धुमा माघ १ मा घ्यू, चाकु, तिलका परिकार तथा खिचडी नखाने, दान नगर्ने, जलाशयमा गई स्नान नगर्ने, ध्यान नगर्ने व्यक्ति जीवनभर रोगी हुने उल्लेख भएको धर्मशास्त्रविद् प्रा रामचन्द्र गौतमले बताए ।

आजका दिन शरीरमा तिलको तेलले मालिस गर्दा दुषित पदार्थ बाहिर निस्कन्छ भन्ने विश्वास छ । शरीरका नाडी, स्नायुमण्डल र हड्डीलाई तिलको तेलको मालिसबाट सुदृढ र स्वस्थ राख्न सकिने आयुर्वेद शास्त्रीय मान्यता छ । जाडो महीनामा घ्यू, चाकु, चरुल, लड्डु, तिलौरीजस्ता परिकार खाँदा न्यानो हुनाका साथै स्वास्थ्य राम्रो हुने भएकाले यो पर्वलाई मानव स्वास्थ्यसँग समेत जोडेर हेर्ने गरिन्छ । यस्ता परिकारले मानव शरीरमा रोग प्रतिरोधी क्षमता बढाउन पनि सहयोग गर्ने आयुर्वेदका चिकित्सक डा वंशदीप शर्मा खरेलले बताए ।


प्रकाशित : माघ १, २०७८ १६:५५
पूरा पढ्नुहोस्
प्रतिक्रिया
पठाउनुहोस्
x
×