प्रदेशले गण्डकी रत्नबाट सम्मान गर्ने- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

प्रदेशले गण्डकी रत्नबाट सम्मान गर्ने

कान्तिपुर संवाददाता

पोखरा — प्रदेशभित्र रहेर विभिन्न क्षेत्रमा अतुलनीय योगदान पुर्‍याएका तीन जनालाई गण्डकी प्रदेश सरकारले गण्डकी रत्नबाट सम्मान गर्ने भएको छ । शिक्षा, स्वास्थ्य, खेलकुद, कृषि, उद्योग, पर्यटन, पूर्वाधार, विज्ञान प्रविधि र समाजसेवालगायत क्षेत्रमा अतुलनीय योगदान पुर्‍याई प्रदेशको गरिमा बढाएको प्रदेशवासीलाई सम्मान गर्न लागिएको सरकारले जनाएको छ । 

सरकारका प्रवक्ता एवं भौतिक पूर्वाधार, सहरी विकास तथा यातायात व्यवस्थामन्त्री कुमार खड्काले यसका लागि सोमबारको मन्त्रीपरिषद् बैठकले विशिष्ट व्यक्ति सम्मान गर्नेसम्बन्धी कार्यविधि २०७८ स्वीकृत गरेको बताए ।

‘प्रदेशसभाले पास गरेको, यसअघिका नीति तथा कार्यक्रममा समेटिएको र बजेटको व्यवस्थासमेत छ,’ उनले भने, ‘प्रदेशको विकासमा योगदान पुर्‍याउने विशिष्ट व्यक्तिलाई सम्मान गर्न लागेका हौं । यो प्रदेशको सर्वाधिक ठूलो सम्मान हो ।’ यसै वर्षदेखि बढीमा ३ जनालाई बर्सेनि सम्मान गरिने उनले जनाए ।

मन्त्रिपरिषद्ले विशिष्ट व्यक्ति सिफारिसका लागि वरिष्ठ मन्त्रीको अध्यक्षतामा अर्थ र आन्तरिक मामिलामन्त्री, प्रमुख सचिव सदस्य र आन्तरिक मामिलाका सचिव सदस्यसचिव रहने सिफारिससमेत गठन गरेको छ । सम्मानित व्यक्तित्वलाई सार्वजनिक सभा, समारोहमा प्रदेश सांसदसरहको मान्यता दिने, प्रदेश अस्पतालमा निःशुल्क सुविधा दिने, संरक्षणविहीन भएमा प्रदेश सरकारले संरक्षकत्व दिने, सार्वजनिक सेवालाई प्राथमिकतादेखि प्रदेशभित्रका विमानस्थलमा अति विशिष्ट कक्ष प्रयोग गर्न सुविधा दिइने कार्यविधिमा छ ।

प्रदेश सरकारले बेरोजगारको लागत संकलन गर्न, विवरण प्रकाशन, रोजगारदाता सूचीकरण र रोजगारदाता तथा बेरोजगारबीच श्रम विनिमयको व्यवस्थाका लागि रोजगार सूचना केन्द्र सञ्चालन गर्ने भएको छ ।

प्रकाशित : माघ १, २०७८ १२:५१
प्रतिक्रिया
पठाउनुहोस्

अलपत्र व्यास परासर पार्क

सम्झना रसाइली

तनहुँ — जिल्लामा पर्यटकीय गन्तव्य थप गर्ने उद्देश्यले निर्माण गरिएको पार्क अलपत्र अवस्थामा पुगेको छ । व्यास–५ स्थित पाटनको व्यास परासर क्षेत्रलाई आकर्षक पर्यटकीय गन्तव्यका रूपमा विकास गर्ने भन्दै पार्क निर्माण कार्य अगाडि बढाइएको थियो । करोडौं रुपैयाँको लागतमा निर्माण गरिएका संरचना अहिले अलपत्र बनेका छन् । 

सेती र मादी नदीको दोभानमा निर्माण गरिएको पार्कको लागत करिब ३ करोड रुपैयाँ रहेको छ । पार्क निर्माणपश्चात यसको संरक्षणको जिम्मा कसैले नलिँदा पार्क जीर्ण अवस्थामा पुगेको बेनीपाटन टोल विकास संस्थाका अध्यक्ष परशुराम गिरी बताउँछन् । उनले भने, ‘यसको संरक्षणको जिम्मा कसैले नपाउँदा पार्क बेवारिसे अवस्थामा पुगेको छ । बनाइएका संरचना पनि काम नलाग्ने आवस्थामा पुगेका छन् ।’

पार्कको दायाँबाट सेती र बायाँबाट मादी नदी बग्छन् । पार्कसँगै परासर आश्रम छ । ४ वेद १८ पुराणका रचयिता वेदव्यासको तपोभूमिलाई धार्मिक पर्यटकीय गन्तव्यका रूपमा विकास गर्न योजना अगाडि सरिए पनि निर्माण सम्पन्न नहुँदै अलपत्र हुन पुगेको उनले बताए । निर्माण गरिएको पार्कको दायाँबायाँ क्षेत्र तटबन्द नहुँदा नदीले कटान गर्दै लगेको छ ।

‘पार्कमा निर्माण गरिएको संरचनाका कतै टायल फुटेका, हराएका छन् भने यसको हेरचाहको जिम्मा भने कसैले लिएको छैन,’ उनले भने, ‘जुन उद्देश्यले पार्क निर्माण गरियो त्योअनुसारको प्रतिफल आउन सकेन । उद्घाटन पनि नहुँदै १५/२० वर्षअघि निर्माण भएको पार्कजस्तो जीर्ण देखिन पुगेको छ ।’

सहरी विकास तथा भवन निर्माण विभाग गोरखाले २०७५ साउन १६ बाट निर्माण सुरु गरेको यो पार्क मुलुक संघीय संरचनामा गएसँगै संघीय आयोजना कार्यान्वयन इकाइ, कास्कीले हेरेको छ । २०७६ माघ १६ मा नै निर्माण सम्पन्न यस पार्कमा बाढीका कारण क्षति पुगेपछि मर्मतसँगै केही पूर्वाधार थपको काम भइरहेको इकाइकी इन्जिनियर रेखा लामिछानेले बताइन् ।

‘पार्कको निर्माण कार्य सम्पन्न भइसकेको छ,’ इन्जिनियर लामिछानेले भनिन्, ‘शौचालयका लागि पानीको आवश्यक पर्ने भएकाले आर्थिक वर्ष २०७७/७८ को बजेटले पानी ट्यांकी निर्माण कार्य भइरहेको छ । बाढीका कारण भत्किएको स्थानको मर्मत सुधार कार्य अगाडि बढाउने चरणमा छौं ।’ पानी ट्यांकी निर्माणका लागि ५० लाख रुपैयाँ विनियोजन भएको उनले बताइन् ।

उक्त व्यास परासर पार्कमा माछाको आकारमा पानी पोखरी, क्यारी वल, पिक्निक स्पोर्ट, बास्केटबल कोट, एमपी थ्रेटर, पार्किङ स्थान निर्माण गरिएको छ । भ्याट र कन्टेन्जेन्सीबाहेक आयोजनाको कुल लागत करिब ३ करोड ५४ लाख रुपैयाँ रहेको उनले बताइन् । उक्त पार्कको निर्माण जिम्मा न्यु ड्रैगन/एएनजी जेभी काठमाडौंले लिएको थियो ।

पार्क निर्माण गरी त्यसको स्वामित्व जिल्लामै हस्तान्तरण नगर्दा पार्कको संरक्षण हुन नसकेको व्यास–५ का वडाध्यक्ष मोहनकुमार श्रेष्ठ बताउँछन् । उनले भने, ‘पर्यटकीय गन्तव्य विकासका लागि पार्क निर्माण गरिनु राम्रो हो तर, सरकारको लगानीको संरक्षण नहुँदा यति ठूलो लागनी बालुवामा पानी मिसाएको जस्तै भएको छ ।’

प्रकाशित : माघ १, २०७८ १२:५१
पूरा पढ्नुहोस्
प्रतिक्रिया
पठाउनुहोस्
×