गैंडा मुद्दामा आठ वर्ष जेल बसेर छुटेका व्यक्ति फेरि ‘खाग’ बेच्दै गर्दा पक्राउ 

पंकजलाई यसअघि गैंडालाई गोली हानी घाइते बनाएको मुद्दामा आठ वर्ष जेल र ५० हजार रुपैयाँ जरिवाना भएको चितवन राष्ट्रिय निकुञ्जका सूचना अधिकारी रहेका संरक्षण अधिकृत गणेशप्रसाद तिवारीले बताए । सजाय पूरा गरी उनी ७५ सालमा छुटेको तिवारीले जानकारी दिए । प्रहरीले पंकजसँगै नौजनालाई समाएर असार नौ गते आइतबार चितवन जिल्ला अदालतमा मुद्दा दायर गरेको छ ।

अनुसन्धानका क्रममा उनीहरूले नक्कली खाग बनाएर बिक्रीका लागि लैजाँदै गरेको अवस्थामा पक्राउ परेको खुलेको तिवारीले बताए । त्यसैले उनीहरूविरुद्ध खाग खरिद बिक्री कसुर अन्तर्गत उद्योगमा मुद्दा दायर गरेको तिवारीको भनाइ छ । यस्तो कसुर गर्नेलाई मुख्य कसुरमा हुने आधा सजाय तोकिने कानुनी व्यवस्था भएको उनले बताए । गैंडा मुद्दामा अधिकतम १० लाख रुपैयाँ जरिवाना या १५ वर्ष कैद वा दुवै सजाय हुने व्यवस्था छ ।

निकुञ्जले पंकजसहित चितवन राप्ती नगरपालिका–३ सुन्दरवस्तीका ३३ वर्षीय बालकुमार राई, नवलपरासी बर्दघाट नपा–८ भानुनगरका ३५ वर्षीय देवबहादुर परियार, रुपन्देही बुटवल उपमहानगरपालिका–७ कालिका टोलका ३८ वर्षका धनबहादुर बानियाँ र बुटबल–११ आनन्दपथका ५१ वर्षीय कृष्णराज पाण्डे क्षेत्री तथा बाग्लुङ जैमनी–१० राङखानीका ३८ वर्षीय नगेन्द्र थापा रहेका छन् ।

त्यसैगरी जैमनी–७ का २८ वर्षीय कमल राना, जैमनी–९ का ३६ वर्षीय खड्कबहादुर थापा र स्याङ्जा निरकोट घर भई हाल बुटबल–४ का बस्ने गरेका ४७ वर्षीय कुलबहादुर बुढाथोकीलाई पनि निकुञ्जको टोलीले पक्राउ गरी मुद्दा दायर गरेको छ । भरतपुर महानगरपालिका–९ मा शंकास्पद गतिविधि गरी रहेका केही व्यक्तिलाई निगरानी राख्दै जाँदा भरतपुर–२३ मा कालो झोलामा सामान बोकेर आएको व्यक्ति भेटिएको र खान तलासी गर्दा खाग जस्तै देखिने वस्तु बरामद भएको सूचना अधिकारी तिवारीले बताए ।