रेनुको हारजितमा गठबन्धनको भविष्य !- समाचार - कान्तिपुर समाचार
कान्तिपुर वेबसाईट
AdvertisementAdvertisement

रेनुको हारजितमा गठबन्धनको भविष्य !

महानगर प्रमुखमा माओवादीकी रेनु दाहालले चुनाव नजिते गठबन्धन टुट्न सक्ने सत्तारुढ दलका शीर्ष नेताको अभिव्यक्ति
रमेशकुमार पौडेल, कलेन्द्र सेजुवाल

चितवन‚ काठमाडौं — सत्तारूढ दलका शीर्ष नेताहरूले भरतपुर महानगरपालिकाको निर्वाचन परिणामले पाँचदलीय गठबन्धनको भविष्य निर्धारण गर्ने अभिव्यक्ति दिएका छन् । माओवादी केन्द्रबाट महानगर प्रमुखमा उम्मेदवार बनेकी रेनु दाहालले चुनाव नजिते गठबन्धन टुट्न सक्ने उनीहरूले जनाएका छन्  ।

गठबन्धनले माओवादी अध्यक्ष पुष्पकमल दाहालकी छोरी रेनुलाई नै साझा उम्मेदवारका रूपमा अघि सारेपछि कांग्रेस नेता जगन्नाथ पौडेलले स्वतन्त्र उम्मेदवारी दिएका छन् । पौडेलको उम्मेदवारीले खडा गरेको चुनौती चिर्न बिहीबार भरतपुरमा चुनावी सभा गरेरै प्रधानमन्त्री एवं कांग्रेस सभापति शेरबहादुर देउवा, माओवादी अध्यक्ष दाहाल, एकीकृत समाजवादी अध्यक्ष माधवकुमार नेपाललगायतले रेनुका पक्षमा मत मागेका छन् । भरतपुरको केन्द्रीय बसपार्कमा आयोजित सभामा देउवाले रेनुलाई जिताउनु कांग्रेसको कर्तव्य रहेको बताए । गठबन्धनको भविष्य भरतपुरको निर्वाचनमा निर्भर रहेको उल्लेख गर्दै उनले गठबन्धन टुटे आफ्नो पार्टीलाई क्षति पुग्ने अभिव्यक्तिसमेत दिए । ‘भरतपुरबाट गठबन्धन टुटाउने षड्यन्त्र भइरहेको छ, यसलाई सफल हुन दिनु हुँदैन,’ उनले भने, ‘षड्यन्त्र सफल भए कांग्रेस पार्टी पनि खत्तम हुन्छ ।’

देउवाले रेनुलाई सफल महानगर प्रमुख भनेर प्रशंसा गरे । रेनुले सडकलगायत पूर्वाधारमा राम्रो काम गरेको, महानगरमा बेरुजु घटाएको, स्मार्टसिटी, अन्तर्राष्ट्रिय क्रिकेट मैदान र अन्तर्राष्ट्रिय सभाहलको अवधारणा अघि सारेको उल्लेख गर्दै उनले रेनु मेयरका लागि उपयुक्त पात्र रहेको उनले बताए । ‘यस्तो राम्रो काम गर्ने मान्छेलाई हराए भने भरतपुरका जनताले के भन्लान् ?’ उनले भने । अहिले रेनुलाई सहयोग गरेर जिताए कांग्रेसको पालो आउने देउवाको भनाइ थियो ।

माओवादी अध्यक्ष दाहालले भरतपुरका जनता अहिले ठूलो ऐतिहासिक परीक्षणमा रहेको बताए । ‘तपाईंहरूले अड्डी कसेर गठबन्धनको विरोध गरिराख्नुको अर्थ प्रतिगमन, निरंकुशता, गणतन्त्रविरोधी र लोकतन्त्रविरोधीलाई साथ दिनु हुनेछ,’ उनले भने, ‘नेता–कार्यकर्ताको पनि ठूलो अग्निपरीक्षा हुँदै छ, यो फैसला तपाईंकै हातमा छ ।’ दाहालले गठबन्धन कमजोर भए देश दुर्घटनामा पर्ने तर्क गरे ।

२०७४ को स्थानीय तह निर्वाचनमा कांग्रेसका मतदाताले हँसिया–हथौडामा भोट हाल्न गाह्रो मान्दा गठबन्धन टुटेको उनले स्मरण गराए । ‘उतिबेला पनि शेरबहादुरजीसँग गठबन्धनलाई १०–२० वर्षसम्म लैजाने गरी छलफल भएको थियो,’ उनले भने, ‘तर व्यवहारमा सहज नभएपछि चिन्तित भएर वामपन्थी गठबन्धन पो ठीक हो कि भन्ने लागेको हो, अहिले त्यस्तो अवस्था नआओस् ।’

एकीकृत समाजवादीका अध्यक्ष नेपालले गठबन्धनको भविष्य सुनिश्चित गर्नुपर्नेमा जोड दिए । कांग्रेसका वरिष्ठ नेता रामचन्द्र पौडेल स्वतन्त्र उम्मेदवार पौडेलप्रति बढी आक्रोशित देखिए । जनता समाजवादी पार्टीका नेता राजेन्द्र श्रेष्ठले गठबन्धनलाई सबैले साथ दिनुपर्ने बताए । सभामा चितवन कांग्रेसका पूर्वजिल्ला सभापति तथा केन्द्रीय सदस्य टेकप्रसाद गुरुङ र निवर्तमान जिल्ला सभापति जितनारायण श्रेष्ठले गठबन्धन दिगो हुने–नहुने स्पष्ट पार्न आवश्यक रहेको जनाएका थिए ।

जगन्नाथसँग भेट भएन
बुधबारै भरतपुर पुगेका देउवाको स्वतन्त्र उम्मेदवार बनेका कांग्रेसका पुराना नेता जगन्नाथ पौडेलसँग भेट भएन । देउवाले सुरुमा आफूसँगै भरतपुर गएका वरिष्ठ नेता रामचन्द्र पौडेललाई भेटघाट गर्न लगाएका थिए । रामचन्द्रले बिहीबार बिहान जगन्नाथसहित उनको पक्षमा खुलेका पार्टीका पूर्वजिल्ला सभापतिद्वय कृष्णलाल सापकोटा र टीकाराम न्यौपाने, पूर्वसांसद भीमबहादुर श्रेष्ठ र महासमिति सदस्य मीना खरेललाई देउवा बसेको होटल सिराइचुलीमा बोलाएका थिए ।

‘हामी बोलाइएको समयमै होटल पुग्यौं, पौडेलजीले उम्मेदवारी फिर्ता लिन नमिले पनि निष्क्रिय रहन आग्रह गर्नुभयो,’ पूर्वसांसद श्रेष्ठले भने, ‘मुलुक संकटमा परेकाले गठबन्धन गर्नुपरेको भन्दै रेनुजीलाई सहयोग गर्न भन्नुभयो तर हामीले अब सम्भव छैन भन्यौं ।’ श्रेष्ठका अनुसार जगन्नाथले बरु रेनुको उम्मेदवारी फिर्ता गर्ने वातावरण मिलाउन भनेका थिए । रामचन्द्रले केहीबेर पर्खेर प्रधानमन्त्रीसँग भेट्न आग्रह गरेका थिए तर सोही समयमा ज्योतिनगरमा चुनावी सभा तय भएकाले आफूहरू हिँडेको श्रेष्ठले बताए । कांग्रेसका जिल्ला सभापति राजेश्वर खनालका अनुसार पौडेलसँगको कुराकानी सकारात्मक भइदिएको भए स्वतन्त्र समूहलाई देउवासँग भेट गराउने तयारी थियो ।

कोइरालाबिना चुनावी सभा
सभामा कांग्रेस नेता शेखर कोइरालाका साथै महामन्त्रीद्वय गगन थापा र विश्वप्रकाश शर्मा सहभागी भएनन् । कांग्रेसले तीन दिनअघि सार्वजनिक गरेको देशव्यापी चुनावी सभाको तालिकामा भने भरतपुरमा थापा र शर्मा वक्ताका रूपमा जाने उल्लेख थियो । तालिकामा नेता कोइरालाको नाम नभए पनि भरतपुरको चुनावी सभाको ब्यानरमा उनको फोटोसहित प्रचार गरिएको थियो । कार्यक्रममा शेखर समूहका केन्द्रीय सदस्य दिनेश कोइराला उपस्थित थिए तर उनले बोलेनन् ।

प्रकाशित : वैशाख २३, २०७९ ०६:४७
प्रतिक्रिया
पठाउनुहोस्

स्वतन्त्रलाई फकाउन–दबाउन राज्य शक्ति परिचालित

देशभरका पालिका प्रमुखमा ७५३ पद भए पनि गठबन्धनकै सहयात्रीबाट १८७९ जनाको उम्मेदवारी परेको छ, तर कांग्रेस र माओवादी शीर्ष नेतृत्वको सम्पूर्ण शक्ति भरतपुरमा केन्द्रित छ, स्वतन्त्रलाई बसाउन र नेताविशेषकी छोरीलाई मेयरमा जिताउन मन्त्रीहरु नै खटिएका छन्
रमेशकुमार पौडेल, कलेन्द्र सेजुवाल

भरतपुर — ‘कृपया मलाई बागी भनेर नलेख्नुहोला है !’ भरतपुर महानगरको मेयर पदका प्रत्याशी जगन्नाथ पौडेलले आफ्नै निवासमा अनुरोध गरे, ‘मैले पार्टीको आधिकारिक उम्मेदवारविरुद्ध उठेकै होइन, भरतपुरमा कांग्रेसको उम्मेदवार नै छैन । कोही उठेको भए पो मलाई बागी भन्न मिल्थ्यो ।’

वरिष्ठ अधिवक्तासमेत रहेका ७१ वर्षीय पौडेलले यो पनि भने, ‘आधिकारिक रूपमा पार्टी केन्द्रले मेरो उम्मेदवारी अस्वीकार गरे पनि कांग्रेसको उम्मेदवार म मात्रै हुँ ।’ २०४९ मा भरतपुरको उपमेयरमा निर्वाचित पौडेल २०५४ मा राष्ट्रिय सभा सदस्य भएका थिए । भरतपुरको मेयरमा सत्ता गठबन्धनले माओवादी केन्द्रकी रेनु दाहाललाई उठाएपछि असन्तुष्ट बनेका नेता पौडेलले स्वतन्त्र उम्मेदवारी दिएका हुन् । शीर्ष नेताले भने जस्तै पूर्ण गठबन्धन कुनै पनि जिल्लामा बनेको छैन । देशका ७ सय ५३ स्थानीय तहका ३५ हजार २ सय २१ पदमा गठबन्धनकै तर्फबाट दोब्बरभन्दा बढी अर्थात् ७४ हजार ७ सय २४ जनाले उम्मेदवारी दिएका छन् ।

पालिका प्रमुखमा ७ सय ५३ पद भए पनि गठबन्धन दलबाटै १ हजार ८ सय ७९ जनाको उम्मेदवारी परेको छ । एक पदमा एक मात्र उम्मेदवार उठाउने समझदारी गरेका सत्तारूढ दलहरूले आधिकारिक रूपमै झन्डै तीन गुणा उम्मेदवार उठाएका छन् । तर, सत्तारूढ कांग्रेस र माओवादी शीर्ष नेतृत्वको सम्पूर्ण शक्ति भरतपुरमा जुटेको छ किनकि यहाँ निवर्तमान मेयर रेनुको दोस्रो ‘इनिङ’ चुनौतीपूर्ण बनेको छ । स्वतन्त्र उम्मेदवार पौडेलको उम्मेदवारी रोक्न कांग्रेस नेतृत्व मात्र नभई सिंगो राज्य शक्ति नै जोडतोडले लागेको छ ।

पौडेलको उम्मेदवारी फिर्ता गर्ने कसरतमा गृहमन्त्री बालकृष्ण खाँण र प्रधानमन्त्री तथा मन्त्रिपरिषद् कार्यालयका राज्यमन्त्री उमेश श्रेष्ठ चितवनमा छन् । लोकतन्त्र र गणतन्त्रका लागि आ–आफ्नो इतिहास भएका कांग्रेस र माओवादीको नेतृत्व एक नेताविशेषकी छोरीलाई मेयर बनाउने विषयलाई आफ्नो जीवनमरणको खेल जस्तै बनाएकामा चितवन कांग्रेसका नेताहरू नै चकित परेका छन् । ‘निर्वाचनका बेला देशभरको शान्तिसुरक्षामा ध्यान दिनुपर्ने गृहमन्त्री नै यहाँ (भरतपुर) आएर उम्मेदवारको स्वतन्त्रतामाथि दमन गरिरहनुभएको छ,’ कांग्रेस पूर्वसभापति टीकाराम न्यौपाने भन्छन् ।

कानुन व्यवसायीसमेत रहेका कांग्रेस कार्यकर्ता गोपी सिग्देलले पौडेलको उम्मेदवारीलाई प्रधानमन्त्री देउवा र माओवादी अध्यक्ष दाहालले सत्ताको भविष्यसँग जोडेको टिप्पणी गर्छन् । ‘पौडेलले चितवनका कांग्रेसीलाई न्याय दिन उम्मेदवारी दिनुभएको हो तर उम्मेदवार हुन पाउने नागरिकको अधिकार कुण्ठित गर्दै न्याय मार्न राज्य शक्ति नै लागेको देख्दा अचम्म लागेको छ,’ उनी भन्छन् ।

पौडेलको उम्मेदवारी फिर्ताको ‘टास्क’ दिएर प्रधानमन्त्री देउवाले दुई मन्त्रीलाई भरतपुर खटाएका हुन् । मन्त्रीद्वयले पौडेललाई बारम्बार भेटिरहेका छन्, त्यस्तै उनका उम्मेदवारीका प्रस्तावक र समर्थकलाई समेत फिर्ताका लागि माहोल बनाउन निरन्तर दबाब दिइरहेका छन् । आफ्नो उम्मेदवारीले केन्द्रीय गठबन्धनलाई असर गर्नुपर्ने कुनै कारण नभएको पौडेलको भनाइ छ । ‘अनुशासनको सीमा नाघेको हो भन्ने नै लाग्छ भने कारबाही गर्न सक्ने व्यवस्था छ, त्यसमा मलाई कुनै आपत्ति र गुनासो हुँदैन,’ निवासमै पुगेका गृहमन्त्री खाँणलाई उनले भनेका थिए, ‘तर सरकार र पार्टीको गठबन्धनको संकटसँग जोडेर मेरो उम्मेदवारीलाई हेर्न भएन ।’

बिहीबार साँझ कान्तिपुरसँग संवाद गरिरहेका पौडेललाई गृहमन्त्री खाँणका सहयोगीले एक घण्टाभित्र होटल सेन्टरपाममा आउन भनेका थिए । पौडेलको पक्षमा खुलेर लागेका पूर्वसभापतिहरू न्यौपाने र कृष्णलाल सापकोटा, पूर्वसांसदहरू भीमबहादुर श्रेष्ठ र रामकृष्ण घिमिरे तथा महासमिति सदस्य मीना खरेललाई पनि सोही होटलमा बोलाइएको थियो ।

बिहीबार दिउँसो स्थानीय अगुवा नेता–कार्यकर्तासँग भेटेका गृहमन्त्री खाँणले पौडेलको उम्मेदवारी जसरी पनि फिर्ता गराउनुपर्ने बाध्यता रहेको सुनाएका थिए । ‘भरतपुरमा माओवादीलाई प्रमुख पद दिइएन भने गठबन्धन टुट्छ,’ एक नेताका अनुसार खाँणको भनाइ थियो, ‘अहिले हामीले माओवादीसँग गठबन्धन गर्‍यौं भने एमाले कमजोर हुन्छ, १० वर्षसम्म एमालेको सत्तामा फर्किने सम्भावना सकिन्छ ।’

पौडेललाई उम्मेदवारी फिर्ता लिन प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल र कांग्रेस वरिष्ठ नेता रामचन्द्र पौडेलले पनि टेलिफोन गरेर दबाब दिएका छन् । पौडेलले उम्मेदवारी दर्ता गरेको भोलिपल्ट गत मंगलबार नै फोन गरेर प्रधानमन्त्री देउवाले उनलाई ‘पार्टी हितका लागि विचार गर्न’ आग्रह गरेका थिए ।

माओवादी अध्यक्ष दाहालले बिहीबार दिउँसो फोन गरेर ‘तपाईंलाई प्रधानमन्त्रीले माथि लिने सोचिरहनुभएको छ’ भन्दै फकाएका थिए । ‘कांग्रेसको पुरानो नेता तपाईंमाथि अन्याय पनि भएको हुन सक्छ,’ पौडेलका अनुसार दाहालले फोनमा भनेका थिए, ‘तर तपाईंलाई कसरी न्याय दिने, व्यवस्थापन गर्ने भन्ने कांग्रेसको कुरा हो, अहिलेलाई उम्मेदवारी फिर्ता लिएर सहयोग गर्नुपर्‍यो ।’ पौडेलले भने जनमतको हिसाबले आफ्नो उम्मेदवारी स्वाभाविक भएको बताउँदै सहयोग मागेका थिए । ‘अघिल्लो पटक तपाईंको कुरा काट्न सकेनौं, छोरी (रेनु) लाई जितायौं, यस पटक हामीलाई सहयोग गर्नुहोस्,’ उनको भनाइ थियो ।

पौडेलमाथि दबाब दिने सूचीमा पूर्वप्रधानन्यायाधीश गोपाल पराजुली पनि जोडिएका छन् । बुधबार दिउँसो उनले पौडेल निवासमै पुगेर उम्मेदवारी फिर्ता लिन आग्रह गरेका थिए । पराजुली र पौडेल कानुन व्यवसाय गर्दाका सहकर्मी पनि हुन् । ‘पार्टीले एकखाले निर्णय गरिसकेकाले उम्मेदवारी फिर्ता लिँदा नै राम्रो हुन्छ,’ पराजुलीले पौडेललाई सुझाव दिँदै भनेका थिए, ‘भविष्यका लागि पनि उम्मेदवारी फिर्ता लिन सुझाव दिन्छु ।’ तारन्तार फोन र दबाब आए पनि पौडेलले चितवनका कांग्रेसीको भावना सम्मान गर्न उम्मेदवारी दिएको बताएका छन् । कांग्रेस समर्थकबाट घेरिएका उनी हरेक फोनमा एउटै जवाफ फर्काइरहेका छन्, ‘म अघि बढिसकेको छु, मेरो निर्णय पुनर्विचार हुँदैन ।’ कार्यकर्ताको एक समूहले पनि उम्मेदवारी फिर्ता नलिन उनलाई हौसला दिइरहेको छ ।

कांग्रेस केन्द्रीय सदस्यसमेत रहेका चितवनका नेता टेकप्रसाद गुरुङले यस पटक पौडेलको उम्मेदवारी आवेगमा आए जस्तो नलागेको बताउँदै भने, ‘पौडेलको उम्मेदवारीमा चितवन कांग्रेसको भावना जोडिएको छ, यो आवेगको अभिव्यक्ति मात्र होइन ।’

भरतपुरमा एमाले र राप्रपाबीच पनि गठबन्धन बनेको छ । प्रमुखमा एमालेका विजय सुवेदी र उपप्रमुखमा राप्रपाका हिमलाल गुरुङ उम्मेदवार छन् । सत्ता गठबन्धनका तर्फबाट उपमेयरमा कांग्रेसका चित्रसेन अधिकारी उम्मेदवार छन् ।

गत निर्वाचनमा महानगरका २९ वडामध्ये कांग्रेसले १४, एमालेले १२ र माओवादी केन्द्रले ३ वटामा जितेका थिए । जिल्लामै कांग्रेस र एमाले प्रमुख प्रतिस्पर्धी हुन् भने माओवादी केन्द्र तेस्रो शक्ति हो । गत निर्वाचनमा कांग्रेसले आफ्नोतर्फबाट प्रमुखमा उम्मेदवारी दिएका दिनेश कोइरालाको टिकट रद्द गराएर माओवादीकी रेनुलाई समर्थन गरेको थियो । यसपालि पनि माओवादी र त्यसमा पनि नेतापुत्रीलाई दिएको भन्दै कांग्रेसमा असन्तुष्टि छ ।

प्रकाशित : वैशाख १६, २०७९ ०६:२१
पूरा पढ्नुहोस्
प्रतिक्रिया
पठाउनुहोस्
×