प्रतियोगितामा कसले के भने ?

‘आफ्नो फोन झिक्नु र इच्छा छ भने उनीसँग फोटो खिच्नु ।’

– अर्जेन्टिनाका खेलाडी लियोनल मेसीलाई लिएर आफ्ना खेलाडीप्रति साउदी प्रशिक्षक हार्भे रेनार्डको सुझाव । उनले हाफटाइममा यस्तो भनेका थिए, सायद यस भनाइले साउदी खेलाडी अभिप्रेरित भएको हुनुपर्छ, त्यसैले टिमले अपूर्व जित निकालेको थियो ।

‘सबैले फ्रान्स नै बलियो भन्छन्, तर हामीसँग विश्व फुटबलकै सर्वकालीन महान् खेलाडी रहेको छ ।’

– अर्जेन्टिनी गोलरक्षक इमिलियानो मार्टिनेजले टिमका प्रमुख खेलाडी मेसीको प्रशंसा गर्दै भनेका थिए ।

‘आज मैले आफूलाई कतारी महसुस गरिरहेको छु । अरबी, अफ्रिकी, समलिंगी, फरक क्षमता भएका र आप्रवासी कामदार भएको पनि महसुस गरिरहेको छु ।’

– विश्वकपको सुरुआती प्रेस कन्फ्रेन्समा बोल्दै फिफाका अध्यक्ष जियानी इन्फाटिनो ।

‘अहिले यस्तो छलफलको कुनै अर्थ छैन । यो विवादलाई अहिले नै रोक्न आवश्यक छ । यो समय क्रिस्टियानो रोनाल्डोलाई एक्लै छाडे राम्रो । हामी सबैलाई थाहा छ, पोर्चुगाली फुटबलमा उनको योगदान कति धेरै छ भनेर ।’

– पोर्चुगाली प्रशिक्षक फर्नान्डो सान्तोष आफ्ना सुपरस्टार खेलाडी क्रिस्टियानो रोनाल्डोबाट उठेको विवाद छलेर आफ्नो धारणा राख्दै ।

‘जतिबेला रक्की सिनेमा हेरिन्छ, सबैलाई रक्की बोलबोआ मनपर्ने हुन्छ, किनभने उनी निकै परिश्रमी छन् । उनी पूर्णतः समर्पित पनि छन् । खासमा यस विश्वकपका हामी रक्की हौं ।’

– मोरक्को प्रशिक्षक वालिद रेग्रागुइ आफ्नो टिममाथि रहेको ‘अन्डरडग’ छविबारे बोल्दै ।

‘यो मेरोबाट भएको भुल होइन, किनभने म पेनाल्टीबाट गोल गर्न चुकेको होइन ।’

– उरुग्वेली भेट्रान खेलाडी लुइस स्वारेज सन् २०१० को विश्वकपको घानाविरुद्धको खेलबारे चर्चा गर्दै । त्यस विश्वकपमा उनले घानाको निश्चित गोल अवसरमा बललाई हातले रोकेका थिए । यसलाई विश्वकप इतिहासमै कुख्यात घटना मानिएको छ ।

‘हाम्रो कुनै सम्भावना नै छैन । हाम्रो बलियो सम्भावना त सन् २०१८ को विश्वकपमा मात्रै हो । हामीसँगै पक्कै पनि बलियो टिम रहेको छ, तर यसका खेलाडी लगभग सबै बुढा भइसके ।’

– बेल्जियमका जादुयी खेलाडी केभिन डी ब्रुयन यस विश्वकपमा आफ्नो टिमको सम्भावनाबारे सुरुमै बोल्दै ।

‘हामी कतानिर चुक्यौं त ? हाम्रो आक्रमण पनि निकै खराब रह्यो । यस्तो किनभन्दा हामी वास्तवमै बुढा खेलाडीको समूह रह्यौं । अब त यो तथ्य प्रमाणित भएको छ ।’

– बेल्जियमका भेट्रान डिफेन्डर यान भेर्टोघन मोरक्कोविरुद्धको खेलमा पराजित भएपछि केभिन डी ब्रुयनलाई इंगित गर्दै बोल्दै ।

‘कसैले पनि मानवअधिकारबारे बोल्न सक्छ । कसैले पनि रंगभेद, बाल मृत्युदर, स्कुलमा गोली हानाहानबारे बोल्न सक्छ । हामी सबैको यी तथ्यमा एकबद्धता छ । तर हामी यहाँ ९० मिनेट खेलेर कसैको पनि अनुहारमा खुसी ल्याउने उद्देश्यमा छौं ।’

– इरानी प्रशिक्षक कार्लोस क्विरेज अमेरिकाविरुद्धको खेलबारे बोल्दै ।

‘म शारीरिक रूपमा पूर्णतः ध्वस्त जस्तै भएको छु । यो हारले म निकै दुखित छु । खेल सकेको १० मिनेटसम्म त म चल्नै सकिनँ, पक्षघात भएको अनुभव भएको थियो । त्यसपछि त मैले आफूलाई रोक्नै सकिनँ, आँसु झरिरहे ।’

– क्रोएसियाविरुद्धको खेल गुमाएपछि ब्राजिलका नेयमर प्रतिक्रिया दिँदै ।

‘अहिले जे भएको छ, त्यसले मलाई हरर सिनेमा हेरेजस्तै अनुभव भयो ।’

– जर्मनी खेलाडी काइ हाभर्टेज आफ्नो टिम समूह चरणबाटै बाहिरिएपछि ।