कासाब्लान्का, मोरक्को — मोरक्को आखिरमा विश्वकप फाइनल प्रवेशबाट एकै पाइलाले मात्र चुक्यो । तर, मोरक्कोवासीका लागि कतारमा आफ्नो टिमको प्रदर्शन सर्वथा गर्व गर्न लायक रह्यो । बुधबारको दोस्रो सेमिफाइनलमा मोरक्को डिफेन्डिङ च्याम्पियन फ्रान्सको हातबाट २–० ले पराजित रह्यो । कासाब्लान्काका फुटबलप्रेमी ओसमा अब्दोह भन्छन्, ‘हाम्रा खेलाडीले निकै राम्रो खेले तर भाग्य हाम्रो टिमको पक्षमा रहेन ।’
उनी थप्छन्, ‘जसरी हाम्रो टिमले डिफेन्डिङ च्याम्पियन फ्रान्सविरुद्ध खेल्यो, त्यो आफैंमा अद्वितीय छ । यो मोरक्को टिमले हामीलाई सपना देख्न प्रेरित गरेको छ, त्यो पनि अन्त्यसम्म । यसै कारण यो टिमप्रति मेरो सलाम छ ।’
हाकिम सल्मा मान्छिन्, फ्रान्ससँगको हार पचाउन गाह्रो छ । उनी भन्छिन्, ‘हाम्रो टिमले धेरै गल्ती गरे, केही राम्रा अवसर पनि गुमाए ।’ राजधानी रबाटमा सेमिफाइनलको समय पानी परिरहेको थियो ।
हारसँगै मोरक्को विश्वकप जित्ने सपना टुटेको छ । तर, टिमको सेमिफाइनल यात्रा कम्तीको रहेन । आखिरमा मोरक्को नै विश्वकपको इतिहासमा सेमिफाइनल पुग्ने पहिलो अफ्रिकी र अरब देश रह्यो । खेलपछि गाडीका हर्नहरू चुपचाप रहे, ड्रम बजाउने काम पनि भएन । एक प्रकारले खेलपछि मोरक्कोमा सन्नाटा छाएको थियो । रचिद सबिक के मान्छन् भने मोरक्को टिमले त खासमा चमत्कारी प्रदर्शन गरेको छ, त्यसैले शोक मनाउनुपर्ने कारण छैन ।
कासाब्लान्काको सडक व्यापारी रहेका सबिक भन्छन्, ‘हामी जित्यौं कि हार्यौं, त्यो महत्त्वपूर्ण नै रहेन । सबैभन्दा ठूलो मोरक्कोका खेलाडीले बाँकी विश्वकपबाट इज्जत कमाएको छ र यो अमूल्य छ ।’
विश्वकप ताका उनले आफ्नो नियमित व्यापार छाडेर मोरक्कोको झण्डा बेच्ने काम गरे । उनीमात्र होइनन्, हारपछि पनि मारेक्कोका राजा मोहम्मद छैटौंले टिमलाई हृदयदेखि बधाई दिएका छन् । राष्ट्रिय समाचार संस्था एमएपीका अनुसार राजाले आफ्नो फुटबल टिमले मोरक्कोको जनताको सम्मान गरेको बताएका छन् ।
उनले फ्रान्सेली राष्ट्रपति इमानुयल म्याक्रोनलाई पनि बधाई सन्देश पठाएका छन् । यसका लागि उनले टेलिफोन वार्ता गरेका थिए । सन् १९१२ देखि १९५६ सम्म उत्तर अमेरिकी देश मोरक्को फ्रान्सेली उपनिवेशकै रूपमा रहेको थियो । यसै कारणले पनि मोरक्कोमा फुटबल निकै लोकप्रिय रह्यो । डर्ब सुल्तानमा जन्मेका मोहम्मद जरिर मोरक्कोको फुटबलको अहिलेसम्मका सबैभन्दा ठूला स्टार हुन् । सन् १९७० को विश्वकपमा उनी मोरक्कोका लागि गोल गर्ने पहिलो खेलाडी बनेका थिए ।
डर्ब सुल्तानकै किशोर फुटबलप्रेमी मोहम्मद नादिफ भन्छन्, ‘हामी फुटबललाई असाध्यै माया गर्छौं र राष्ट्रिय टिमले तय गरेको यात्राले गर्दा हामी विश्व च्याम्पियन भएको सपना देख्न पायौं ।’ उनी आफ्नो पसलमा मोरक्कोको झण्डा र जर्सी बेचिरहेका छन् । उनी थप्छन्, ‘मोरक्कोको टिमले हामीलाई खुसीमात्र बनाएको छैन, व्यापार पनि दिएको छ । मोरक्को टिमले हाम्रो झण्डालाई अझ उच्च राखेको छ, त्यसैले यो टिमलाई जति धन्यवाद दिए पनि पुग्दैन ।’
प्रकाशित : पुस १, २०७९ ०७:०३
