क्रोएसियालाई ३-० ले हराउँदै अर्जेन्टिना विश्वकपको फाइनलमा
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
दोहा — कप्तान लियोनल मेसीप्रेरित अर्जेन्टिना लुसेल रंगशालामा मंगलबार क्रोएसियामाथि ३–० को सानदार जित निकाल्दै विश्वकप २०२२ को फाइनलमा प्रवेश गरेको छ । विश्व फुटबलले पाएको सर्वकालीन महानमध्येका एक खेलाडी ३५ वर्षीय मेसी पाँचौँ प्रयासमा विश्वकपको उपाधि जितेर आफ्नो करिअरलाई सार्थक बनाउन चाहन्छन् ।
![](https://assets-cdn.ekantipur.com/uploads/source/ads/900x100-1172024092759.gif)
![क्रोएसियालाई ३-० ले हराउँदै अर्जेन्टिना विश्वकपको फाइनलमा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2022/third-party/argentina-14122022020639-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
त्यसैअनुसार उनले कतारमा भइरहेको २२ औं संस्करणमा प्रदर्शन पनि गरिरहेका छन् । चार वर्षअघिको उपविजेता क्रोएसियाविरुद्ध मेसीले पेनाल्टीमा गोल गर्दै अर्जेन्टिनालाई अग्रता दिलाएका थिए । त्यसपछि जुलियन अलभारेजले दुई गोल गर्दै अर्जेन्टिनालाई ८ वर्षपछि फाइनलमा पुर्याएका हुन् ।
स्ट्राइकर अलभारेजलाई गोलकिपर डोमिनिक लिभाकोभिचले फल गरेपछि अर्जेन्टिनाले ३४ औं मिनेटमा पेनाल्टी पाएको थियो । त्यसमा मेसीले सहजै गोल गरेपछि अर्जेन्टिना अगाडि बढ्यो । यससगै मेसीले प्रतियोगितामा सर्बाधिक ५ गोल गरेका फ्रान्सका किलियन एम्बाप्पेको गोल संख्यालाई बराबरी गरेका छन् । उनी विश्वकपमा सबभन्दा बढी ११ गोल गर्ने अर्जेन्टिनी खेलाडी भए । उनले विश्वकपमै सबभन्दा धेरै २५ खेल खेलेका लोथर म्याथ्युज (जर्मनी) को रेकर्ड बराबरी गरे ।
अलभारेजले ३९ औं मिनेटमा गरेको गोल निक्कै उत्कृष्ट रह्यो । मेसीले मैदानको मध्यभागनजिक हेडद्वारा दिएको बललाई अलभारेजले अगाडि बढाउदै पेनाल्टी क्षेत्रमा पुर्याएर बललाई जाली चुमाउदै अर्जेन्टिनाको अग्रता दोब्बर बनाए । जासेपि बुरानोभचि र बोर्ना सोसालाई लागेर फर्केको बललाई उनले लिभाकोभिचलाई कुनै मौका नदिई गोलमा परिणत गरेका थिए ।
यो प्रतियोगितामा उत्कृष्ट प्रदर्शन गरिरहेका जोस्को जिभार्डियोलालाई छक्याउदै मेसीले उत्कृष्ट रूपमा उपलब्ध गराएको बललाई अलभारेजले फिनिसिङमा दिदै ६९ औं मिनेटमा अर्जेन्टिनालाई ३–० को अग्रता दिलाएका थिए । यससँगै उनको यो विश्वकपमा गोल संख्या ४ पुगेको छ ।
दक्षिण अमेरिकी महारथीले अरु अवसर पनि बनाएको थियो तर गोल थप्न सकेन । रुसमा (सन् २०१८) सर्बोत्कृष्ट खेलाडीको अवार्ड गोल्डेन बल जितेका ल्युका मोड्रिचको कप्तानीमा रहेको क्रोएसियाले गतिलो प्रदर्शन गर्न सकेन । अर्जेन्टिनी टिमको प्रदर्शन संगठित, परिस्कृत र उत्कृष्ट रह्यो । क्रोएसियाले भने अर्जेन्टिनाको खेल पछ्याइरह्यो मात्रै । त्यसैले त एक गोल पनि गर्न सकेन । ३७ वर्षीय मोड्रिचको उपाधि अनुभव गर्न नपाएरै अन्तर्राष्ट्रिय करिअरमा पूर्णविराम लाग्ने अवस्था आएको छ ।
सन् १९७८ र १९८६ को विश्वकप विजेता अर्जेन्टिनाले छैटौंपल्ट फाइनलमा प्रवेश गरेको हो । पााचपल्टको च्याम्पियन ब्राजिलले पनि ६ पल्ट विश्वकप पाइनल खेलेको छ । सबभन्दा बढी आठपल्ट फाइनल खेलेको रेकर्ड जर्मनीको नाममा छ । अर्जेन्टिनाले पछिल्लोपल्ट ब्राजिल (सन् २०१४) मा फाइनल खेलेको थियो, जहा मेसीको टिम अतिरिक्त समयमा १–० ले हारेको थियो ।
त्यसैले अर्जेन्टिना डिएगो म्याराडोनाको युगपछि अर्थात् ३६ वर्षपछि विश्वविजेता बन्न चाहन्छ । त्यसको लािग उसले आइतबार लुसेलमै हुने फाइनलमा डिफेन्डिङ च्याम्पियन फ्रान्स वा मोरक्कोविरुद्ध प्रतिस्पर्धा गर्ने छ । फ्रान्स र मोरक्को बुधबार अल बायत रंगशालामा हुने दोस्रो सेमिफाइनलमा भिड्दै छन् ।
यसपाली पहिलो खेलमै साउदी अरेबियाविरुद्ध हारेको अर्जेन्टिना क्रमिक सुधार गरेर मेक्सिको (२–०), पोल्यान्ड (२–०), अस्ट्रेलिया (२–१), नेदरल्यान्ड्स (२–२ को बराबरीपछि टाइब्रेकरमा ४–३) लाई पराजित गरेपछि क्रोएसियाको चुनौती ३–० ले समाप्त पार्दै उपाधि होडमा उभिएको हो ।
![](https://assets-cdn.ekantipur.com/uploads/source/ads/900-x-100-0172024023126.gif)