२५.१२°C काठमाडौं
काठमाडौंमा वायुको गुणस्तर: १५४

‘साराङ हे यो सोन ओप्पा’

कोरियाली खेलाडीहरू कतारमा विश्वकप खेलिरहँदा मध्यरातमा राजधानी सोलमा भेला भएका हजारौं युवाहरूले आफ्ना खेलाडीलाई यसरी प्रेम र समर्थन व्यक्त गरे ।
गोकुल थोकर

दक्षिण कोरिया — शुक्रबार राति दक्षिण कोरियाो राजधानी सोल तुसारोले छपक्कै थियो । तापक्रम माइनस ८ डिग्री सेल्सियसभन्दा बढी छ । चिसो यति धेरै कि मानिसहरुले स्वास फेर्दा मुखबाट चुरोट पिएको जस्तै बाफ निस्कन्थ्यो ।

‘साराङ हे यो सोन ओप्पा’

ख्वाङ्ह्वामुन दरबार स्क्वायरअघि फुटबल हेर्न भेला भएका युवाहरूका आँखी भौंमा तुसारो नै जमेको थियो । कोरियाली मौसम विभागले शनिबार बिहान ४ बजेपछि हिउँ पर्ने पूर्वानुमान गरेको छ । सोलको चिसोलाई च्यालेन्ज गर्दै विश्वकप फुटबल हेर्न हजारौं युवाहरू रातो ज्याकेट र टाउकोमा पिलपिल बल्ने रातो बत्ती बोकेर भेला भए ।

झन्डै एक महिनाअघि सोलकै इथेवनमा हलोविन रमाइलोका लागि लाखौ मानिस जम्मा हुँदा निस्सासिएर १ सय ५८ जनाको मृत्यु भयो । अहिले एकै ठाउँमा धेरै मानिस जम्मा हुन परे कडा सुरक्षा नियम पालना गर्नुपर्छ । छेउमै प्रहरी छन् । दमकल, एम्बुलेन्स छन् । दरबार स्क्वायरमा केटी टेलिकम (कोरियाको ठूलो टेलिकममध्ये एक)ले हाई रिजोलुसनमा खेलको प्रत्यक्ष प्रशारण देखाउने व्यवस्था गरेको छ । मानिस धेरै हुने भएकाले दरबार स्क्वायरमा तीन वटा पर्दा राखिएका छन् ।

कोरियाली समय अनुसार रातको ठीक १२ बजे खेल सुरु भयो । खेल सुरु भएको पाँच मिनेटमा पोर्चुगलले गोल हानेपछि युवाहरू निराश देखिए । कोरियाली टिमका अहिलेका सबैभन्दा ठूला स्टार टोटनह्यामबाट खेल्ने सोन होङमिन नै हुन् । केही समयअघि क्लबका लागि खेल्दा उनी घाइते भएका थिए । त्यसैले अहिले कतार विश्वकपमा उनी मास्क लगाएर खेलेका छन् । उनको खुट्टामा बल पुग्दा कोरियाली समर्थकहरू दरबार स्क्वायर नै थर्किने गरी केही होला कि भनेर चिच्याउँछन्, ‘साराङ हे यो सोन ओप्पा’ (माया गर्छु सोन दाइ) ।

कोरियाली युवतीहरू दाइलाई ‘ओप्पा’ भन्छन् । अनि मन परेकी केटी वा प्रमिकाले पनि ‘ओप्पा’ नै भन्छन् । त्यसैले कसले भनेको त्यस अनुसार अर्थ लाग्छ । सोन कोरियाली युवतीका लागि आइडल ‘ओप्पा’ हुन् । उनी फुटबलर मात्रै होइनन् । स्टार हुन् । कोरियाका अधिकांश ठूला कम्पनीका उनी ब्रान्ड एम्बास्डर छन् ।

कोरियाले भन्दा पोर्चुगलकै खेलाडीको खेल राम्रो भएपछि केही युवा निराश देखिन्छन् । भित्रैदेखि स्वास तान्छन् उनीहरू, स्स्स्स्स । यो स्टाइल कोरियालीले दु:ख देखाउँदा व्यक्त गर्ने तरिका हो । फेरि युवाहरु हात हल्लाउँदै बीटीएसका गीत गाउँछन् । संसारभर चर्चित कोरियाली संगीतिक ब्यान्ड छ बीटीएस । त्यही ब्यान्डका गायक जन जङकुकले यही फिफा वर्ल्डकपका लागि गीत गाएका छन् । उनले विश्वकपको उद्घाटनका बेला पनि यो गीत गाएका थिए ।

'लुक हु वी आर, वी आर द ड्रिमर

वी मेक इट ह्यापन्, कज वी बिलिभ इट ।' अर्थात् (हेर्नुस् हामी को हौं ? हामी हौं स्वपन्द्रष्टा । सपनालाई हामी विपना बनाउँछौं ।विपनामा हामी विश्वास गर्छौं)

खेलको २७ मिनेटमा सोलदेखि ३ सय किलोमिटर दक्षिणमा पर्ने उल्सान हुन्डाइ क्लबबाट खेल्ने किम योङग्वानले गोल गरेपछि एकाएक महोल तातियो । किम कोरियाकै आई लिगको खेल खेल्छन् । शक्तिशाली देशहरुलाई हराउँदै शुक्रबार नै छिमेकी देश जापान नक आउट चरण पुगिसकेको छ । कोरियालीहरू जापानलाई भने खासै मन पराउँदैनन् । सन् १९१० देखि दोस्रो विश्व युद्धसम्म कोरियालाई उपनिवेश बनाएको रिस अहिले पनि उनीहरूमा देखिन्छ ।

‘उरी दो उल्लाखाएदे ओनुल’ हामी पनि माथि जानुपर्छ आज । झिनो स्वरमा भनेकाथे उनले । शायद उनैलाई विस्वास थिएन होला ।

खेलको निर्धारित समय सकिएर इन्जुरी सयममा कोरियाका उनै स्टार फुटबलर सोनले अर्का प्रिमियर लिग नै खेल्ने ह्वाङ् हि चाङलाई पास दिए । अन्तत: कोरियाले पोर्चुगललाई दुई गोल हान्यो । पोर्चुगलले एक मात्रै । अनि त कोरियाली समर्थकहरू भने खुसियालीमा दरबार स्क्वायर नै थर्काउने गरी चिच्याए । सोलको चिसो मौसम फेरि तात्तियो । खुसीले धेरैका आँखा रसाए ।

कोरिया पोर्चुगलको खेल सकिए पनि अर्को चरणमा कुन टोली पुग्छ टुङ्गो लागेको थिएन । उरुग्वे र घानाको खेल सकिएकै थिएन । एक छिन समय रोकियो । दरबार स्क्वायर शान्त भयो । पर्दामा कोरियाली खेलाडीले अर्को चरण पुगेकोमा खुसियाली मनाए । यता दरबार स्क्वायरका सबै कोरियाली चिच्याउन थाले ।

१२ वर्षपछि कोरिया नकआउट चरणमा पुग्यो । यसअघि पछिल्लो पटक सन् २०१० मा समूह चरण पार गरेको थियो भने सन् २००२ मा जापानसँगै कोरियाले आयोजना गरेको फिफा वर्ल्डकपमा सेमिफाइनल पुगेको थियो ।

प्रकाशित : मंसिर १७, २०७९ १६:३७
प्रतिक्रिया
पठाउनुहोस्
जनताको राय

पार्टी स्थापनाकालदेखि निरन्तर अध्यक्ष रहेका जसपा नेपालका उपेन्द्र यादव महाधिवेशनबाट फेरि आफैं नेतृत्वमा आएका छन् । पटक-पटक एउटै व्यक्ति नेतृत्वमा रहिरहनुलाई के भन्नुहुन्छ ?