नेयमर फर्कने ब्राजिलको विश्वास- विश्वकप फुटबल २०२२ - कान्तिपुर समाचार
कान्तिपुर वेबसाईट
AdvertisementAdvertisement
विश्वकप २०२२

नेयमर फर्कने ब्राजिलको विश्वास

एएफपी

दोहा — छैटौंपल्ट विश्वकप जित्ने अभियानमा रहेको ब्राजिललाई विश्वास रहेको छ, विश्व फुटबलका सबैभन्दा महँगा खेलाडी नेयमर चोटबाट फर्केर टिमको नेतृत्व गर्न सक्षम हुनेछन् । कतारमा ब्राजिलको पहिलो खेलमा नेयमरको घुँडामा चोट लागेको थियो । सर्बियाविरुद्ध प्राप्त २–० जितमा उनी खेलको अन्त्यतिर मैदानबाट बाहिर निस्केका थिए ।

पछि उनको एको चोट लागेको निश्चित भएको थियो । समूह ‘जी’ मा ब्राजिलले स्विट्जरल्यान्डको सामना गर्दा उनले नखेल्ने निश्चित मानिएको छ । डर त के थियो भने सम्भवतः उनले पूरा प्रतियोगिता नै खेल्न सक्ने छैनन् । डिसेम्बर १८ को फाइनल अगाडि उनी चोटबाट मुक्त हुन संघर्षरत रहने सम्भावना थियो ।

तर डिफेन्डर तथा पेरिस सेन्ट जर्मेन (पीएसजी) का साथी खेलाडी मारक्विन्होले नेयमर गहन उपचारमा संलग्न रहेको र पूर्ण निको भएर मैदानमा फर्कन प्रयासरत रहेको बताएका छन् । आइतबार आयोजित पत्रकार सम्मेलनमा मारक्विन्होले भने, ‘अहिले उनलाई गाह्रै भइरहेको छ ।’

उनी भन्छन्, ‘पहिलो खेलपछि उनी दुःखी थिए । यो सामान्य पनि हो, किनभने यही विश्वकपका लागि उनले कति धेरै सपना बुनेका छन् । अहिले परीक्षण र उपचार पनि उनी २४ घण्टा नै फिजियोथेरापी गरिरहेका छन् । यसले पनि देखाउँछ, उनी कति धेरै टिममा फर्कन चाहन्छन् । उनी ठ्याक्कै कहिले खेल्न सक्षम हुनेछन्, त्यो हामीलाई थाहा छैन । तर हाम्रो विश्वास छ, यो चाँडोभन्दा चाँडो हुनेछ ।’

ब्राजिली प्रशिक्षक टिटेले सर्बियाविरुद्धको खेललगत्तै नेयमरले प्रतियोगिताकै क्रममा खेल्न सक्षम हुने बताएका थिए । अहिले तिनै प्रशिक्षक ३० वर्षीय खेलाडीको खेल्न सम्भावनाबारे बचेर बोलिरहेका छन् । उनी नेयमर मात्र होइन, राइट ब्याक डानिलोले खेल्न नखेल्नेबारे दाबी गर्न सकिरहेका छैनन् । टिटे भन्छन्, ‘मलाई पूरा विश्वास छ, नेयमर र डानिलो यसै प्रतियोगितामा खेल्न सक्षम हुनेछन्, किनभने यो विश्वकप हो । तर चिकित्सकीय र आधिकारिक रूपमा यस्तै हुनेछ भनेर भन्न सक्ने स्थिति छैन । हामीलाई के विश्वास छ भने नेयमर मात्र होइन, डानिलोले पनि यसै विश्वकपमा खेल्नेछन् ।’

स्विट्जरल्यान्डका जेरडान साकिरी र प्रशिक्षक मुरत याकिन । तस्बिर : एएफपी

स्टेडियम ९७४ मा हुने खेलमा ब्राजिल स्विट्जरल्यान्डमाथि विजयी रहे, समूह चरणको एक खेल अगाडि नै त्यो अन्तिम १६ मा प्रवेशका लागि पर्याप्त रहन सक्नेछ । तर त्यसका लागि समूह ‘जी’ मा क्यामरुन र सर्बियाबीचको खेलको नतिजा भने कुर्नुपर्नेछ । त्यो हो भने डिसेम्बरको ५ अथवा ६ मा ब्राजिलले अन्तिम १६ को खेल खेल्नेछ । युभेन्ट्सका ३१ वर्षीय खेलाडी डानिलो पनि घुँडाको चोटबाट गुज्रिरहेका छन् र उनले पनि यो चोट सर्बियाविरुद्धको खेलमै बोकेका थिए ।

उनले खेल्न नसक्ने स्थितिमा स्विस टिमविरुद्ध रियल म्याड्रिडका एडेर मिलिटाओ अथवा ३९ वर्षीय डानी एलाभेसलाई उतारिनेछ । तर चर्चाको केन्द्रबिन्दु भने नेयमर नै रहेका छन् । ब्राजिली टिमको प्रदर्शन धेरे हदसम्म नेयमरकै खेलमा भर पर्ने मानिन्छ । सन् २०१४ को ब्राजिलमै भएको विश्वकपमा पनि नेयमर कोलम्बियाविरुद्धको क्वाटरफाइनल खेलमा घाइते भएका थिए । त्यसैले उनी जर्मनीविरुद्ध ७–१ को खेलमा उपस्थित थिएनन् ।

प्रकाशित : मंसिर १२, २०७९ ०७:५६
प्रतिक्रिया
पठाउनुहोस्

अफ्रिकालाई धेरै स्थान दिन माग

एएफपी

दोहा — घानाका प्रशिक्षक ओटो एडोले अफ्रिकी टिमले विश्वकपको अन्तिम चरणसम्मको यात्रा तय गर्ने सम्भावना कम रहेको बताउँदै विश्व फुटबलको सबैभन्दा ठूलो प्रतियोगितामा आफ्नो महादेशलाई बढी स्थान दिनुपर्ने आइतबार दाबी गरेका छन् । अफ्रिकाका कुनै पनि टिम अहिलेसम्म विश्वकपको क्वाटरफाइनलभन्दा अगाडि जान सकेका छैनन् ।

सन् २०१० को विश्वकपमा घाना सेमिफाइनलको नजिक रहे पनि टाइब्रेकरमा पराजित रहेको थियो । समूह ‘एच’ को दक्षिण कोरियाविरुद्ध हुने खेल अगाडि बोल्दै एडोले अफ्रिकामा ५४ देश रहेकाले पनि विश्वकपमा बढी सहभागिता आवश्यक रहेको बताए । उनले भने, ‘विश्वकप छनोटमा सबैले समान सम्भावना पाएका छैनन् । फिफा इतिहासमै यस्तो भएको छैन । अफ्रिकाका पाँच टिमले मात्र विश्वकपमा खेल्न पाउने हुन्छ । युरोपले के कति पाउँछ, त्यो मलाई थाहा छैन, तर उसको लिग चरणबाट अगाडि बढ्ने सम्भावना पक्कै पनि बढी हुन्छ ।’

कतारमा विश्वकप खेलिरहेका ३२ मध्ये १३ टिम युरोपका छन् । एसियाबाट छ टिमले प्रतिनिधित्व गरेका छन् भने दक्षिण अमेरिका र कनकाकाफबाट ४–४ टिमले खेलिरहेका छन् । कतारमा यसपल्ट लिग चरणमा जित निकाल्ने सेनेगल र मोरक्को मात्र छन् । चार वर्ष अगाडि रुसमा भएको विश्वकपमा पाँच अफ्रिकी टिममध्ये कुनै पनि नकआउट चरणसम्म पुग्न सकेनन् । सन् २००६ मा घानाले विश्वकपमा डेब्यु गर्दा अन्तिम १६ मा पुगेको थियो र त्यति बेला एडो खेलाडी थिए ।

उनी भन्छन्, ‘त्यसो त सबैलाई सुरुमा उत्तिकै अवसर छ, कसैलाई केही बढी, कसैलाई केही कम । तर म के प्रार्थना गरिरहेको छु भने कम्तीमा एक अथवा दुई अफ्रिकी टिम नकआउट चरण पुग्न सक्छन् । पोर्चुगलविरुद्धको खेल ३–२ ले गुमाएको घानाले सोमबार आफ्नो दोस्रो खेलमा दक्षिण अफ्रिकाको सामना गर्नेछ । मिडियासामु बोल्ने क्रममा प्रशिक्षक एडोले पोर्चुगलविरुद्धको खेलमा अमेरिकी रेफ्री इस्माइल इलफतहको निर्णयको पनि आलोचना गरे ।

पोर्चुगलले पाएको पेनाल्टी गलत भएको उनको दाबी थियो । उनले भनेका छन्, ‘त्यस खेलपछि म निकै भावुक भएको थिएँ । त्यति बेला म केही कडा ढंगले पेस भएको भए पनि अहिले माफी माग्न चाहन्छु । अब त यो पनि पुरानो कुरा भइसकेको छ । अब त्यसमा कुनै परिवर्तन गर्न सकिन्न । मैदानमा रहेका सबैले भूल गर्न सक्छन्, मैले पनि भूल गर्न सक्छु । त्यति क्षणका लागि किन भार प्रयोग गरिएन, त्यसमा म आश्चर्यमा छु ।’

प्रकाशित : मंसिर १२, २०७९ ०७:५५
पूरा पढ्नुहोस्
प्रतिक्रिया
पठाउनुहोस्
×