‘सम्मान’ को लडाइँमा क्रोएसिया र क्यानडा

डालिचको टोलीले समूह ‘एफ’ को खेलमा आइतबार खलिफा अन्तर्राष्ट्रिय रंगशालामा क्यानडाको सामना गर्दै छ । दुवै टोली नकआउट चरणमा पुग्न संघर्षरत छन् । क्यानडा पहिलो खेलमा बेल्जियमसँग १–० ले पराजित भएको थियो ।

बेल्जियमसँग पराजित भएपछि ‘हडल’ मा आफ्ना खेलाडीलाई के भनियो त भन्ने प्रश्नको जबाफमा हेर्डमनले एक टेलिभिजन अन्तर्वार्तामा भने, ‘तिमीहरू यो प्रतियोगितामा अझ अगाडि बढ्न योग्य छौं भनेको थिएँ ।’

रियल म्याड्रिडका लुका मोड्रिच जस्ता खेलाडीहरूले भरिएको क्रोएसियाविरुद्धको खेलमा नडराई सामना गर्न भन्दा क्यानडाका प्रशिक्षकले केही आपत्तिजनक भाषा प्रयोग गरेका थिए । ३६ वर्षपछि विश्वकपमा पहिलो पटक खेलिरहेको क्यानडाका प्रशिक्षक हेर्डमनले उत्तेजनक भनाइ राखेपछि क्रोएसियाले आक्रोशित हुँदै सम्मान खोजेको हो ।

बेल्जियमसँग पराजित भए पनि क्यानडाले त्यस खेलमा उत्साहजनक प्रदर्शन गरेको थियो । हर्डमनले अब पछाडि फर्किनुभन्दा पनि बेल्जियमविरुद्धको खेलमा केन्द्रित हुनुपर्ने जनाए । ‘अर्को चुनौतीका लागि तयार हुनुपर्छ भनेर मैले खेलाडीहरूलाई सचेत गराएको हुँ,’ हेर्डमनले भने, ‘उनीहरूलाई पहिलो दिनदेखि नै मानसिक हिसाबमा तयार रहन भनिरहेको छु ।’

उनले अगाडि भने, ‘मलाई लाग्दैन खेलाडीहरूले मेरो यो कुरा सुन्छन् । हामीले लक्ष्य बनाएका छौं, त्यो खेलाडीहरूलाई थाहा छ । त्यसलाई पूरा गर्नु छ ।’ मोरक्कोसँग पहिलो खेलमा निराशाजनक बराबरी खेलेको क्रोएसियाले ४७ वर्षे इङ्लिस प्रशिक्षक हेर्डमनको भनाइलाई सहज रूपमा लिएको छैन ।

क्रोएसियाले जति सफलता हात पारेको छ, त्यसका लागि हेर्डमनले सम्मान व्यक्त गर्नुपर्ने डालिचको भनाइ छ । ‘सबैबाट क्रोएसिया टोलीले सम्मानको हक राख्छ, विश्वकपमा हामीले खेलेको प्रदर्शन र आचरणले यो प्रमाणित गर्छ,’ डालिचले भने, ‘हामीले सबैलाई समान हिसाबले सम्मान गरेका छौं । हामी सम्मानको हकदार छौं । क्यानडेलीहरूले हामीलाई सम्मान गर्नुपर्छ । उनले बोलेका शब्दहरूमा सम्मान छैन । हामी विश्वकपको उपविजेता हौं ।’

यसै साता क्रोएसियाको एउटा ट्याब्लोइडमा हेर्डमनको नाङ्गो तस्बिर छापिएको थियो, जसमा मुख र गोप्य अंग क्यानडाको झन्डाले छोपिएको देखाउँदै भनिएको छ, ‘तिम्रो मुख त छ, अरू छ कि छैन ।’ त्यसपछि उत्तेजित भएका हेर्डमनको भनाइले आगोमा घिउ थपेको थियो ।

‘विश्वकपमा क्यानडाका लागि यो निर्णायक क्षण हो, अहिले गर या मरको स्थितिमा छौं,’ हेर्डमनले भने, ‘यहाँ आइपुग्न हामीले ३६ वर्ष कुर्नुपर्‍यो । अब कुनै प्रेरणा आवश्यक छैन । विश्वकपमा हामी लुका मोड्रिचसहितको क्रोएसियासँग खेलिरहेका छौं । निकै गर्विलो क्षण हो यो ।’ क्यानडा आश्चार्यजनक रूपमा विश्वकपमा प्रवेश गरेको थियो भने क्रोएसियाले धेरै दबाब खेपेको थियो ।

थिबाउट कोर्टियस (बेल्जियम)

बेल्जियमको ‘स्वर्णिम पुस्ता’ का प्रमुख खेलाडी हुन्, गोलरक्षक कोर्टियस । मोरक्कोसँग आइतबार हुने खेल बेल्जियमको राष्ट्रिय टोलीको जर्सीमा उनको ९९ औं खेल हुनेछ । बेल्जियमले क्यानडाविरुद्ध पहिलो खेलमा फितलो प्रदर्शन गर्दा ३० वर्षे उनले नै अल्फोन्सो डेभिसको पेनाल्टी प्रहार जोगाए । उनी सन् २०१८ मा चेल्सीबाट रियल म्याड्रिड गएका थिए । उनको खास प्रर्दशन देखिएको गत वर्ष हो, जहाँ रियलले लिभरपुललाई हराउँदै च्याम्पियन्स लिग जितेको थियो । रुस विश्वकपमा तेस्रो भएको बेल्जिमयलाई यसपालि माथि पुर्‍याउन उनको भूमिका निर्णायक हुनसक्छ ।