कतार चाहँदैन ‘दागी कीर्तिमान’- विश्वकप फुटबल २०२२ - कान्तिपुर समाचार

कतार चाहँदैन ‘दागी कीर्तिमान’

पराजित भए आयोजकका रुपमा कतार सबैभन्दा चाँडै प्रतियोगिताबाट बाहिरिने खराब कीर्तिमान बन्नेछ
एएफपी

दोहा — कतार प्रशिक्षक फेलिक्स सान्चेजलाई विश्वास छ, कतार सेनेगलविरुद्ध हुने खेलमा आफ्नो उत्कृष्ट प्रदर्शन गर्न सफल हुनेछ । अन्यथा तय छ आयोजकको नाममा विश्वकप इतिहासकै दागी कीर्तिमान बन्नेछ । शुक्रबार हुने खेलमा पनि पराजित हुने हो भने आयोजकका रूपमा सबैभन्दा चाँडै प्रतियोगिताबाट बाहिरिने कीर्तिमान हुनेछ ।

सन् २०१० मा दक्षिण अफ्रिका पनि समूह चरणबाटै बाहिरिएको थियो । तर समूह चरणको अन्तिम तेस्रो खेलसम्म अफ्रिकाको चुनौती बाँकी थियो ।

एसिया कपको डिफेन्डिङ च्याम्पियन कतार इक्वेडरसँग आफ्नो पहिलो खेलमा २–१ ले पराजित थियो । त्यसमा कतारको प्रदर्शन निकै कमजोर रह्यो । यसक्रमा आयोजक देशको नाममा पहिलो खेलमै पराजित हुने इतिहास बनेको थियो । प्रशिक्षक सान्चेज के पनि मान्छन् भने उनका कतारी खेलाडी यस परिस्थितिबाट मुक्त हुन सक्षम छन् र अफ्रिकी च्याम्पियन प्रतिद्वन्द्वी सेनेगलविरुद्ध आफ्नो वास्तविक खेल प्रदर्शन पूर्णतः सक्षम हुनेछन् ।

प्रशिक्षक सान्चेजले बिहीबार आयोजित पोस्टम्याच कन्फ्रेन्समा भने, ‘पहिलो खेलमा जुन प्रकारको अपार दबाब थियो, अब त्यो रहेन । हामी सबै खाले दबाबबाट मुक्त भएका छौं । अब हामी प्रतिस्पर्धामा उत्रन तयार छौं र आफ्नो उत्कृष्ट प्रदर्शन गर्न सक्षम हुनेछौं । हाम्रो प्रदर्शन पहिलो खेलको तुलनामा राम्रो हुनेछ । हामीले आफूलाई सिद्ध गर्न आक्रामक हुन आवश्यक छ । यो स्वाभाविक खेल हुनेछ । त्यसपछि के हुनेछ, त्यो हेर्नलायक हुनेछ ।’

डिफेन्डर इस्माइल मोहम्मदले आफ्ना समर्थकलाई एक खेलपछि नै कतारको चुनौती समाप्त भएको नमान्न अनुरोध गरेका छन् । उनले भनेका छन्, ‘पहिलो खेलमा जे जस्तो भयो, त्यो इतिहास भयो । अब हामी नयाँ ताजा यात्रा सुरु गर्दैछौं र अबको खेलका लागि तयारी गर्दैछौं । मलाई के पनि विश्वास छ भने हाम्रो टिम सही बाटोमा छ । त्यसैले अबको खेलमा हामी राम्रो गर्न सक्षम हुनेछौं । सेनेगलविरुद्धको खेलमा हामी आफूले सक्दो दिनछौं ।’

मोहम्मदले आफ्ना एसियाली दुई समकक्षी साउदी अरेबिया र जापानको प्रदर्शनप्रेरित रहने बताए । साउदी अरेबियाले अर्जेन्टिना र जापानले जर्मनीलाई हराएको थियो । उनले थपे, ‘साउदी टिमको प्रदर्शनमा हामीलाई केही ईर्ष्या पक्कै पनि लागेको छ । तर, यो हाम्रो लागि प्रेरणा रहेको छ । यो खेल हाम्रो लागि सबथोक रहनेछ ।’ प्रशिक्षक सान्चेजले विश्वकपमा आफ्नो टिमको प्रदर्शन जस्तोसुकै रहे पनि समग्रमा कतारको फुटबलको भविष्य भने स्वर्णिम रहेको दाबी गरे ।

उनले कतारी फुटबलले लामो बाटो तय गर्ने बताए । उनले थपे, ‘हामीसँग भविष्यका लागि धेरै योजना छन् । यी दूरगामी योजना हुन् । त्यसैले मलाई पूरा विश्वास छ, विश्वकपपछि पनि कतारले फुटबलमा सुधारको काम गरिरहने छ र यससँगै टिमको प्रदर्शनमा पनि उत्तिकै सुधार आउनेछ । कतारले यसतर्फ अग्रसरता देखाएको छ, त्यसैले आफूलाई सिद्ध गरेको छ । मलाई लाग्छ, विश्व फुटबलमा यो जहाँ त्यहीं जहिले पनि देख्न पाइन्न ।’

प्रकाशित : मंसिर ९, २०७९ ०८:२३
प्रतिक्रिया
पठाउनुहोस्

कोदो उत्पादन बढिरहँदा धान घट्यो

कान्तिपुर संवाददाता

काठमाडौँ — सुदूरपश्चिममा गत वर्ष कोदोको उत्पादन ४०.४९ प्रतिशतले वृद्धि भएको देखिएको छ । तर धान उत्पादनमा भने ३१.४९ प्रतिशतले ह्रास आएको नेपाल राष्ट्र बैंकको आर्थिक गतिविधि अध्ययनमा उल्लेख छ ।

प्रधानमन्त्री कृषि आधुनिकीकरण परियोजना तथा जिल्ला कृषि ज्ञान केन्द्रहरूले रैथाने बाली प्रवर्द्धन कार्यक्रम सञ्चालन गरेका कारण कोदो उत्पादनमा वृद्धि भएको अध्ययनमा उल्लेख छ । धान बाली पाक्ने समयमा परेको अत्यधिक वर्षाका कारण धान उत्पादनमा ह्रास आएको राष्ट्र बैंकले बुधबार सार्वजनिक गरेको आर्थिक वर्ष ०७८/७९ मा सुदूरपश्चिम प्रदेशको आर्थिक गतिविधि अध्ययनमा छ । अघिल्लो आर्थिक वर्ष आलुको उत्पादन १७.६९ प्रतिशतले वृद्धि भएको थियो । तेलहन उत्पादनमा भने १३.४६ ह्रास आएको थियो ।

अघिल्लो आर्थिक वर्षको तुलनामा सुदूरपश्चिममा कृषि बाली (खाद्य तथा अन्य बाली, तरकारी एवम् फलफूल तथा मसला) ले ढाकेको भू–क्षेत्र घटेको छ । अघिल्लो वर्ष शून्य दशमलव १८ प्रतिशतले वृद्धि हुँदा गत वर्ष २.९० प्रतिशतले ह्रास आएको छ । गत वर्ष खाद्य तथा अन्य बालीले ढाकेको क्षेत्रफलमा ३.९३ प्रतिशत र धान बालीले ढाकेको क्षेत्रफल १.३९ प्रतिशतले घटेको छ । कोदो, फापर, आलु, भटमासको क्षेत्रफल क्रमशः १९.७०, १२.८४, १.४५ र ४.१० प्रतिशतले बढेको छ । सबैभन्दा धेरै दलहन २७.८४ र तेलहनको क्षेत्रफल १७.८२ प्रतिशतले ह्रास आएको उक्त प्रतिवेदनमा छ । तरकारीले ढाकेको क्षेत्रफल गत वर्ष ३.४५ प्रतिशतले वृद्धि हुँदा यस वर्ष ७.३८ प्रतिशतले वृद्धि भएको छ । फलफूल तथा मसलाले ढाकेको क्षेत्रफल ७.६५ प्रतिशतले वृद्धि भएको छ । सुदूरपश्चिमअन्तर्गत बाजुरा, बझाङ, दार्चुला, डडेलधुरा र डोटीमा खाद्य तथा अन्न बालीको उत्पादनमा वृद्धि हुँदा अन्य जिल्लामा उत्पादनमा ह्रास आएको हो । सबैभन्दा बढी बाजुरामा ३१.३७ प्रतिशतले उत्पादन वृद्धि हुँदा कैलालीमा २५.६६ प्रतिशतले घटेको छ ।

वनजन्य उत्पादनतर्फ काठ उत्पादन ४५.२२, दाउरा उत्पादन ६१.४१ तथा अन्य उत्पादन ५२.१० प्रतिशतले वृद्धि भएको । औषधिजन्य वस्तु उत्पादनमा भने ३१.८५ प्रतिशतले ह्रास आएको छ । गत वर्ष औषधिजन्य उत्पादन ६८.०७, दाउरा १५.७३ तथा काठ उत्पादन १२.५६ प्रतिशतले वृद्धि भएको थियो । अन्य उत्पादनमा ३३.२३ प्रतिशतले ह्रास भएको थियो । प्रदेश वन ऐन, ०७६ बमोजिम वनक्षेत्रमा रहेका सुक्खाखडा र ढलापडा फलफूल तथा मसला बालीको समग्र उत्पादनमा ६.२५ प्रतिशतले बढेको छ ।

यस समूहअन्तर्गत केरा उत्पादन ३०.३७, अन्य फलफूल उत्पादन २६.६७ र मसला उत्पादन ७.७७ प्रतिशतले वृद्धि भएको छ । तर आँप उत्पादन ४७.६९, स्याउ उत्पादन २.९९ र सुन्तला उत्पादन १.३२ प्रतिशतले घटेको छ ।

पशुपन्छी उत्पादनअन्तर्गत दूध उत्पादन १.५९ प्रतिशतले बढेको छ । गत वर्ष १.१६ प्रतिशतले बढेको थियो । ‘मासुजन्य उत्पादन १.५५ प्रतिशतले बढेको छ । गत वर्ष सोही अवधिमा मासु उत्पादन १.५९ प्रतिशतले वृद्धि भएको थियो,’ अध्ययन प्रतिवेदनमा भनिएको छ, ‘मासुजन्य उत्पादनतर्फ कुखुरा तथा हाँसको मासु उत्पादन ४.१७, खसी/बोका/भेडाको मासु उत्पादन १.५२, सुँगुर/बंगुरको मासु उत्पादन १.५ र भैंसी/राँगोको मासु उत्पादन १.२३ प्रतिशतले बढेको छ ।’ बसाइँसराइका कारण बाँझो हुँदै गएको पहाडी जिल्लाहरूका खेतीयोग्य जमिनलाई लिज एवम् करार खेतीमार्फत श्रम र सीप हुनेहरूमा पहुँच पुर्‍याई कृषि उत्पादन बढाउन सकिने राष्ट्र बैंकले जनाएको छ । सिँचाइको अथाह सम्भावनाका बाबजुद त्यससम्बन्धी परियोजना निर्धारित समयमै सम्पन्न नहुँदा सिँचाइका लागि मौसमी निर्भरतालाई समेत न्यूनीकरण गर्नुपर्ने प्रतिवेदनमा उल्लेख छ ।

प्रतिवेदनअनुसार सुदूरपश्चिमको कृषि क्षेत्रमा गत आर्थिक वर्षमा २६ प्रतिशतले कर्जा वृद्धि भई कुल १५ अर्ब २२ करोड ५४ लाख रुपैयाँ प्रवाह भएको छ । अघिल्लो वर्ष यस्तो कर्जा ४७.६३ प्रतिशतले वृद्धि भएको थियो । कुल कृषि कर्जामध्ये सबैभन्दा बढी अन्य कृषि तथा कृषिजन्य सेवामा १८.७६ प्रतिशत छ भने सबैभन्दा कम ०.००३ प्रतिशत सुर्तीमा प्रवाह भएको छ । कृषि क्षेत्रमा प्रवाहित कर्जामध्ये सबैभन्दा बढी कैलालीमा ६५.५४ प्रतिशत र सबैभन्दा कम बाजुरामा १.०६ प्रतिशत छ ।

प्रकाशित : मंसिर ९, २०७९ ०८:२२
पूरा पढ्नुहोस्
प्रतिक्रिया
पठाउनुहोस्
×