केनले खेल्नेमा साउथगेट विश्वस्त- विश्वकप फुटबल २०२२ - कान्तिपुर समाचार

केनले खेल्नेमा साउथगेट विश्वस्त

कान्तिपुर संवाददाता

काठमाडौँ — इंग्ल्यान्डका प्रशिक्षक गारेथ साउथगेटले आफ्ना कप्तान ह्यारी केन फिट रहेको बताउँदै शुक्रबार अमेरिकाविरुद्ध खेल्ने जनाएका छन् । इंग्ल्यान्डले समूह ‘बी’ को आफ्नो पहिलो खेलमा इरानलाई सजिलै ६–२ ले पराजित गर्दा केन घाइते भएका थिए ।

उनलाई घुँडामा चोट लागेको थियो । टोटेनहमका स्ट्राइकर केनको घुँडाको चोटको लामो इतिहास छ । बुधबार मात्रै केनको चोटको परीक्षण गरिएको थियो । डर उत्पन्न भएको थियो सायद उनी बेञ्चमै रहने हो कि ?

तर, इंग्ल्यान्डका गोलरक्षक जोर्डन पिकफोर्डले पनि केन बुधबारको अभ्याससत्रमा उपलब्ध भएको बताएका छन् । इंग्ल्यान्डले शुक्रबार खेलमा अमेरिकाको सामना गर्नेछ । यो खेल अल बयाट स्टेडियममा हुनेछ । साउथगेटले बीबीसीलाई भनेका छन्, ‘केन ठीक छन् । उनले आफ्नो टिमभन्दा फरक स्थानमा अलग्गै रहेर तयारी गरेका छन् । तर उनी शुक्रबार रातिको खेलमा उपलब्ध हुनेछन् । परीक्षणपछि उनले खेल्ने तय भएको हो ।’

खलिफा अन्तर्राष्ट्रिय रंगशालामा भएको इरानविरुद्धको खेलमा २९ वर्षीय खेलाडीले ७५ मिनेटसम्म खेलेका थिए । पिकफोर्डले थपेका छन्, ‘सबैलाई थाहा छ, केन कति उम्दा खेलाडी हुन् भनेर । टिमका लागि उनी राम्रो खेलेर उदाहरण पेस गर्नसक्ने खेलाडी हुन् । उनी नेता हुन, कप्तान हुन् । उनी निःस्वार्थी खेलाडी हुन् । त्यसैले हामी उनलाई पछ्याउने गर्छौं ।’ केनले सन् २०१८ को विश्वकपमा इंग्ल्यान्डका लागि ‘गोल्डेन बुट’ अवार्ड जितेका थिए ।

सन् १९६६ यता पहिलो ठूलो फुटबल उपाधि जित्न प्रयासरत इंग्ल्यान्डका लागि केन सबैभन्दा महत्त्वपूर्ण खेलाडी रहेका छन् । इरानविरुद्धको खेलमा उनले कुनै गोल नगरे पनि रहिम स्टर्लिङ र बुकायो साकाको गोलमा सहयोगी भूमिका निभाएका थिए । सकेसम्म चोटमुक्त रहेर खेल्नका लागि केनले पछिल्लो समय निजी चिकित्सकको सहयोग लिइरहेका छन् । घुँडाको चोटकै कारण उनी आफ्नो खेलजीवनमा पाँचपल्ट लामो समय मैदानबाहिर रहेका छन् ।

इरानविरुद्धको खेलमा केन सबैको ध्यान खिच्न सफल रहेका थिए । उनले ‘वन लभ’ आर्मब्यान्ड लगाएर खेल्ने बताएका थिए, तर इंग्लिस फुटबल संघले उनलाई त्यस्तो नगर्न निर्देशन दिएको थियो । फिफाले त्यस्तो कुनै प्रकारको आर्मब्यान्ड लगाएर खेल्ने खेलाडीलाई कार्ड देखाइने बताएपछि सबै सतर्क भएका थिए । तर, पिकफोर्डले केनले त्यस्तै आर्मब्यान्ड लगाएर खेलेको हेर्न चाहेका बनाए । उनले भने, ‘तर यो निर्णय अब उनको हातमा मात्र रहेन ।’

यस्तै साउथगेटले ह्यारी मगायर पनि स्वस्थ महसुस गरिरहेको बताए । म्यानचेस्टर युनाइटेडका सेन्ट ब्याक इरानविरुद्धको खेलको अन्त्यतिर बिरामी भएपछि उनलाई मैदानबाट फिर्ता बोलाइएको थियो । साउथगेटले थपे, ‘इरानविरुद्धको खेलका बेला मगायरले बिरामी भएको महसुस गरे र त्यसैले उनले आँखा पनि धमिलो थियो । यसले उनलाई चोट लाग्ने जोखिम बढी हुनसक्थ्यो । तर, अहिले चिन्ताको विषय रहेन ।’

प्रकाशित : मंसिर ९, २०७९ ०८:२५
प्रतिक्रिया
पठाउनुहोस्

कतार चाहँदैन ‘दागी कीर्तिमान’

पराजित भए आयोजकका रुपमा कतार सबैभन्दा चाँडै प्रतियोगिताबाट बाहिरिने खराब कीर्तिमान बन्नेछ
एएफपी

दोहा — कतार प्रशिक्षक फेलिक्स सान्चेजलाई विश्वास छ, कतार सेनेगलविरुद्ध हुने खेलमा आफ्नो उत्कृष्ट प्रदर्शन गर्न सफल हुनेछ । अन्यथा तय छ आयोजकको नाममा विश्वकप इतिहासकै दागी कीर्तिमान बन्नेछ । शुक्रबार हुने खेलमा पनि पराजित हुने हो भने आयोजकका रूपमा सबैभन्दा चाँडै प्रतियोगिताबाट बाहिरिने कीर्तिमान हुनेछ ।

सन् २०१० मा दक्षिण अफ्रिका पनि समूह चरणबाटै बाहिरिएको थियो । तर समूह चरणको अन्तिम तेस्रो खेलसम्म अफ्रिकाको चुनौती बाँकी थियो ।

एसिया कपको डिफेन्डिङ च्याम्पियन कतार इक्वेडरसँग आफ्नो पहिलो खेलमा २–१ ले पराजित थियो । त्यसमा कतारको प्रदर्शन निकै कमजोर रह्यो । यसक्रमा आयोजक देशको नाममा पहिलो खेलमै पराजित हुने इतिहास बनेको थियो । प्रशिक्षक सान्चेज के पनि मान्छन् भने उनका कतारी खेलाडी यस परिस्थितिबाट मुक्त हुन सक्षम छन् र अफ्रिकी च्याम्पियन प्रतिद्वन्द्वी सेनेगलविरुद्ध आफ्नो वास्तविक खेल प्रदर्शन पूर्णतः सक्षम हुनेछन् ।

प्रशिक्षक सान्चेजले बिहीबार आयोजित पोस्टम्याच कन्फ्रेन्समा भने, ‘पहिलो खेलमा जुन प्रकारको अपार दबाब थियो, अब त्यो रहेन । हामी सबै खाले दबाबबाट मुक्त भएका छौं । अब हामी प्रतिस्पर्धामा उत्रन तयार छौं र आफ्नो उत्कृष्ट प्रदर्शन गर्न सक्षम हुनेछौं । हाम्रो प्रदर्शन पहिलो खेलको तुलनामा राम्रो हुनेछ । हामीले आफूलाई सिद्ध गर्न आक्रामक हुन आवश्यक छ । यो स्वाभाविक खेल हुनेछ । त्यसपछि के हुनेछ, त्यो हेर्नलायक हुनेछ ।’

डिफेन्डर इस्माइल मोहम्मदले आफ्ना समर्थकलाई एक खेलपछि नै कतारको चुनौती समाप्त भएको नमान्न अनुरोध गरेका छन् । उनले भनेका छन्, ‘पहिलो खेलमा जे जस्तो भयो, त्यो इतिहास भयो । अब हामी नयाँ ताजा यात्रा सुरु गर्दैछौं र अबको खेलका लागि तयारी गर्दैछौं । मलाई के पनि विश्वास छ भने हाम्रो टिम सही बाटोमा छ । त्यसैले अबको खेलमा हामी राम्रो गर्न सक्षम हुनेछौं । सेनेगलविरुद्धको खेलमा हामी आफूले सक्दो दिनछौं ।’

मोहम्मदले आफ्ना एसियाली दुई समकक्षी साउदी अरेबिया र जापानको प्रदर्शनप्रेरित रहने बताए । साउदी अरेबियाले अर्जेन्टिना र जापानले जर्मनीलाई हराएको थियो । उनले थपे, ‘साउदी टिमको प्रदर्शनमा हामीलाई केही ईर्ष्या पक्कै पनि लागेको छ । तर, यो हाम्रो लागि प्रेरणा रहेको छ । यो खेल हाम्रो लागि सबथोक रहनेछ ।’ प्रशिक्षक सान्चेजले विश्वकपमा आफ्नो टिमको प्रदर्शन जस्तोसुकै रहे पनि समग्रमा कतारको फुटबलको भविष्य भने स्वर्णिम रहेको दाबी गरे ।

उनले कतारी फुटबलले लामो बाटो तय गर्ने बताए । उनले थपे, ‘हामीसँग भविष्यका लागि धेरै योजना छन् । यी दूरगामी योजना हुन् । त्यसैले मलाई पूरा विश्वास छ, विश्वकपपछि पनि कतारले फुटबलमा सुधारको काम गरिरहने छ र यससँगै टिमको प्रदर्शनमा पनि उत्तिकै सुधार आउनेछ । कतारले यसतर्फ अग्रसरता देखाएको छ, त्यसैले आफूलाई सिद्ध गरेको छ । मलाई लाग्छ, विश्व फुटबलमा यो जहाँ त्यहीं जहिले पनि देख्न पाइन्न ।’

प्रकाशित : मंसिर ९, २०७९ ०८:२३
पूरा पढ्नुहोस्
प्रतिक्रिया
पठाउनुहोस्
×