लेवान्डोस्की चम्किने विश्वास- विश्वकप फुटबल २०२२ - कान्तिपुर समाचार
कान्तिपुर वेबसाईट
AdvertisementAdvertisement

लेवान्डोस्की चम्किने विश्वास

एएफपी

दोहा — पोल्यान्डका गोलरक्षक विज्निएक स्जेस्नीले आफ्नो टोली १९८६ यता पहिलो पटक नकआउट चरणमा पुग्ने प्रयासमा रहँदा रोबर्ट लेवान्डोस्कीले विश्वकपमा गोलको खाता खोल्ने विश्वास लिएका छन् ।

लेवान्डोस्कीले पोल्यान्डबाट १ सय ३४ खेलमा ७६ गोल गरिसकेका छन् । तर बार्सिलोनाका यी स्टारले चार वर्षअघि रुस विश्वकपमा एउटै गोल गर्न नसक्दा पोल्यान्ड समूह चरणबाटै बाहिरिएको थियो ।

पछिल्ला दुई विश्वकप छनोट चरणका क्रममा ३४ वर्षे लेवान्डोस्कीले २५ गोल गरिसकेका छन्, तर पनि विश्वकप जस्तो ठूलो प्रतियोगितामा एउटै गोल गर्न सकेका छैनन् । ‘मलाई लाग्छ, उनका लागि पनि गोल गर्नु अति महत्त्वपूर्ण छ,’ स्जेस्नीले मेक्सिकोसँगको खेलअघि लेवान्डोस्कीबारे भने, ‘विश्वकपअघि उनी निकै उत्प्रेरित छन् । अहिलेको समयमा उनी विश्वका उत्कृष्ट खेलाडी हुन् भन्नेमा कुनै शंका छैन ।’

आठ उत्कृष्ट सिजन बायर्न म्युनिकमा बिताएपछि उनी यसै सिजनमा बार्सिलोना गएका थिए, जहाँ उनले १९ खेलमा १८ गोल गरिसकेका छन् । ‘क्लबस्तरमा मात्र नभई राष्ट्रिय टोलीबाट पनि उनी पक्कै आफ्नो महत्त्वाकांक्षा पूरा भएको हेर्न चाहन्छन्, त्यसैले यो प्रतियोगिता उनका लागि महत्त्वपूर्ण छ,’ स्जेस्नीले भने, ‘कतारमा देखाएको प्रदर्शनले लेवान्डोस्कीलाई पोल्यान्डका महान् खेलाडीको सूचीमा उभ्याउने छ ।’

मेक्सिकोका गोलरक्षक गुइलेर्मो ओचोआ पाँचौं पटक विश्वकप खेल्दै छन् । तर उनीसामु लेवान्डोस्कीलाई मात्र नभई समूह ‘सी’ कै प्रतिद्वन्द्वी अर्जेन्टिनाका स्टार लियोनल मेसीलाई पनि रोक्नुपर्ने चुनौती छ ।

‘कुनै पनि प्रतिद्वन्द्वी सजिला हुँदैनन्, चाहे त्यो अर्जेन्टिना होस् वा साउदी अरेबिया । यो छोटो समयको प्रतियोगिता हो, त्यसैले तीन अंकसहित यात्रा सुरु गर्नु आवश्यक छ,’ ३७ वर्षे ओचोआले भने । पछिल्ला तीन विश्वकप सहभागितामा पोल्यान्ड पहिलो चरणबाटै बाहिरिँदै आएको छ । चार वर्षअघि खेल्दा स्जेस्नीले नै सेनेगलविरुद्ध गल्ती गर्दा पोल्यान्डले त्यसको मूल्य चुकाउनुपरेको थियो ।

युभेन्ट्सका यी गोलरक्षकलाई प्रमुख प्रतियोगिता अफाप सिद्ध हुँदै आएको छ । पोल्यान्ड युरो २०१२ को सहआयोजक हुँदा उनले पहिलो खेलमै रातो कार्ड पाएका थिए । युरो २०१६ को पहिलो खेलमा घाइतेपछि उनले त्यसपछि प्रतियोगिताका खेल खेलेका थिएनन् । युरो २०२० मा स्लोभाकियासँग पोल्यान्ड पराजित हुँदा उनले आत्मघाती गोल गर्न पुगेका थिए । ‘मलाई लाग्छ सबै प्रतियोगिताको आफ्नै इतिहास छ,’ ३२ वर्षे स्जेस्नीले यो आफ्नो अन्तिम विश्वकप हुने निश्चित गरे ।

प्रकाशित : मंसिर ६, २०७९ ०३:४४
प्रतिक्रिया
पठाउनुहोस्

मानेप्रति सहानुभूति राख्दै भान डाइक

एएफपी

दोहा — नेदरल्यान्ड्सका स्टार खेलाडी भर्जिल भान डाइकले लिभरपुलका आफ्ना पूर्वखेलाडी साडियो मानेले चोटका कारण विश्वकप गुमाउनु दु:खद रहेको बताएका छन् । मानेको अनुपस्थितिले विश्वकपको सोमबार सेनेगलविरुद्ध हुने खेलमा नेदरल्यान्ड्सलाई नै फाइदा हुनेछ । समूह ‘ए’ को आफ्नो पहिलो खेलमा डच टिमले अफ्रिकी प्रतिद्वन्द्वीको सामना गर्न लागेको हो ।

बायर्न म्युनिखका लागि खेल्ने क्रममा खुट्टामा चोट लागेपछि मानेले विश्वकप गुमाएका हुन् । भान डाइकले दोहामा आयोजित प्रि–म्याच कन्फ्रेन्समा भने, ‘मैले घटनाको भोलिपल्ट नै उनलाई फोन गरेको थिएँ । म उनको स्थिति बुझ्न चाहन्थें । हल्लाका भरमा आइरहेका समाचारले दुविधा भएको थियो । एक साथी खेलाडीका रूपमा म उनको स्थिति बुझ्न चाहन्थें । तर वास्तवमै समाचार राम्रो रहेन । दुर्भाग्य उनले विश्वकप खेल्न पाएनन् ।’ भान डाइक र माने दुवैले लिभरपुलका लागि खेल्नअगाडि साउथह्याम्पटनमा आबद्ध थिए ।

एनफिल्डमा रहने क्रममा दुवै खेलाडीले योर्गन क्लोपका टिमका लागि इंग्लिस प्रिमियर लिग र युरोपेली च्याम्पियन्स लिग जिते । यस सिजनको सुरुमा मानेले बायर्नका लागि लिभरपुल छाडेका थिए । भान डाइकले थपे, ‘म उनीप्रति सहानुभूति राख्छु । यस विश्वकपका लागि उनले कति मिहिनेत गरेका छन्, त्यो मलाई थाहा छ । उनी सेनेगलका सर्वाधिक महत्त्वपूर्ण खेलाडी हुन् । त्यसैले उनको अनुपस्थिति खड्किने निश्चित रहेको छ । अन्त्यमा खालि यति आस गरौं, माने नहुँदा हामीलाई फाइदा नै हुनेछ ।’

अल थुमामामा हुने सोमबारको खेलसँगै नेदरल्यान्ड्सले विश्वकपमा पुनरागमन पनि रच्दै छ । डच टिम सन् २०१८ मा रुसमा भएको विश्वकपमा छनोट भएको थिएन । सन् २०१४ मा नेदरल्यान्ड्स तेस्रो स्थानमा आएको थियो । प्रशिक्षका रहेका लुइस भान गालले मेम्फिस डेपे नहुनुले डच टिमका लागि ठूलै धक्का रहेको बताएका छन् । बार्सिलोनाका फरवार्डले आफ्नो देशका लागि ८१ खेलमा ४२ गोल गरेका छन्, तर चोटका कारण सेप्टेम्बरयता खेलेका छैनन् ।

भान गालले भनेका छन्, ‘सेनेगल अफ्रिकी च्याम्पियन हो, त्यसैले यसलाई एक अर्को प्रतिद्वन्द्वी मात्र मान्न सकिन्न । यो खेलको नतिजाले प्रतियोगिताकै दिशा निर्देश गर्न मद्दत गर्नेछ । माने असाधारण खेलाडी हुन् । म म्यानचेस्टर युनाइटेडमै छँदा उनलाई साउथह्याम्पटनबाट किन्न चाहन्थें । यसले प्रस्ट पार्छ, म उनको प्रशंसक हुँ । उनी एक्लैले खेल आफ्नो पक्षमा मोड्न सक्छन् । सेनेगलले पक्कै पनि उनको अनुपस्थितिमा मूल्य चुकाउनुपर्नेछ ।’

प्रकाशित : मंसिर ५, २०७९ ०६:४८
पूरा पढ्नुहोस्
प्रतिक्रिया
पठाउनुहोस्
x
×