‘हिमाल चढ्न शारीरिक, मानसिक र प्राविधिक रूपमा बलियो हुनु पर्छ’- विविधा - कान्तिपुर समाचार
कान्तिपुर वेबसाईट
AdvertisementAdvertisement

‘हिमाल चढ्न शारीरिक, मानसिक र प्राविधिक रूपमा बलियो हुनु पर्छ’

माया शेर्पा

कोभिडभन्दा अगाडि हिमाल चढ्ने पर्यटक धेरै आउने गर्थे । सगरमाथामा हरेक वर्ष तीन/चार सयले संख्या बढिरहेको थियो । नेपाली आरोही, भरिया, स्थानीयवासीले काम पाउने गरेका थिए । साना–साना पसलदेखि होटलहरूमा व्यापार हुन्थ्यो । यसले गर्दा सगरमाथा क्षेत्रमा स्थानीय बासिन्दाको जीवनस्तर उकासिएको थियो । कोभिडका कारण एक वर्ष पर्वतारोहण ठप्प भयो ।

अहिले सुधार भएको छ । बहराइनका राजकुमारजस्ता पर्यटक आएपछि आरोहीको संख्या बढ्दै गएको हो । अहिले आरोही बढिरहेका छन् । चार सय जना विदेशी पर्यटक मनास्लु चढ्न गएका छन् । चार सय नेपाली आरोही पनि यही व्यस्त छन् । अमादब्लम, चोयु हिमाल चढ्ने गरेका छन् ।

प्रदेश १ का एलन पिक, मेरा पिकहरू चर्चित छन् । ६ हजारभन्दा बढी उचाइका मेरा, बरुण चे, अमादब्लममा धेरै समूह आइरहेका छन् । फागुन–चैतमा सगरमाथा चढ्न धेरै आउँछन् । अन्यमा भने असोज–कात्तिक र पुस–माघमा पनि आरोहण गर्ने गरिन्छ । सिनियर आरोहीहरुले जति दु:ख गरे । त्यो अनुसारको सुख–सुविधा नेपालमा पाउन सकेनन् । सरकारबाट पनि त्यही अनुसार सहयोग भएन ।

हिमाल चढ्ने एकदमै गारो काम हो । हिमाल चढ्ने र फर्किंने मात्र हुँदैन । त्यहाँ सबै काम नेपाली पर्वतारोहीहरुले गर्छन् । हिमाल चढ्न आउने विदेशीलाई पकाउने, खुवाउने, टेन्ट र अक्सिजन बोक्नेदेखि लिएर सबै काम नेपाली पर्वतारोहीले नै गर्नु पर्छ । उमेर बढ्दै गएपछि काम पाइँदैन । रिटायर्डमेन्ट छैन । राम्रो बीमा सुविधा छैन ।

कुनै विकल्प नभएपछि अन्तिम विकल्प भनेको विदेशिनु हो । पर्वतारोही भएर धेरै हिमाल चढिसकेपछि र चिनजानको आधारमा युरोप अमेरिकाको भिषा पाउन सजिलो हुन्छ । त्यहाँ गएर १० वर्ष मेहनत गर्‍यो भने आफ्ना छोरीको भविष्य बनाउन सकिन्छ । त्यही भएर पर्वतारोहीहरु पलायन भएका छन् ।

यो बिडम्बना हो । देशका लागि नाम कमाएर जीवन धान्ने गरी आफ्नै देशमा बस्ने स्थिति हुन नसक्नु राम्रो होइन । अहिले नभएपनि अबको १० वर्षपछि यसको कमी हुन्छ । युवापुस्ता आरोहण पेसामा नलाग्न सक्छन् । अहिले जति पनि युवाहरु छन् । गाउँगाउँबाट आएका छन् । सहरमा बसेका र हुर्केकाले यस्तो चुनौतीपूर्ण काम कमै गर्न सक्छन् । बाह्य मुलुकमा हिमाल आरोहण व्यवस्थित छ । जहाँ आरोहणका क्रममा आरोही र गाइड दुवैले मिलेर काम गर्छन् । तर नेपालमा नियम धेरै भएपनि कसैले पालना गर्दैनन् । जसले गर्दा हिमालमा दुर्घट्ना हुने, जथाभावी फोहोर थुप्रिने समस्या छन् ।

यो क्षेत्रमा महिला भएपनि अवसर उत्तिकै छ । तर महिला भन्ने बित्तिकै उसले सक्दैन भनिन्छ । यसमा लाग्न शारीरिक, मानसिक र प्राविधिक सबै कुराले बलियो हुनु पर्छ । त्यसैले महिलालाई अवसर दिन जरुरी छ । अवसर पाउँदा जेपनि गर्न सकिन्छ । सरकारले पनि पर्यटन क्षेत्रमा लगानी बढाउन जरुरी छ ।

– सगरमाथा आरोही संघकी अध्यक्ष शेर्पालेविराटनगरमा आयोजित ‘कान्तिपुर उज्यालो पूर्व’ कार्यक्रमको ‘पूर्वको पौरख’ सत्रमा व्यक्त गरेको विचारको सम्पादित अंश ।

प्रकाशित : आश्विन १४, २०७९ १३:५५
प्रतिक्रिया
पठाउनुहोस्

‘सरकारको नीति निर्यातमैत्री हुनुपर्छ’

ओमप्रकाश शर्मा

हामी गाडी आयात गरिरहेका छौं । गाडीमा प्रयोग हुने स्पेयर पार्ट्स पनि बाह्य मुलुकबाटै आयात गर्छौं । भोलिका दिनमा एसेम्बलिङ उद्योग स्थापना गरेर यहीँ गाडीहरु उत्पादन गर्नु पर्छ । सरकारका नीति सहज भए नेपालमै गाडी उत्पादन गर्न सजिलो हुने थियो । नीति नै सहज नहुँदा समस्या भएका हुन् ।

यो क्षेत्रमा नयाँ उद्यमीहरु छिर्ने प्रयास गरिरहेका छन् । उनीहरुलाई व्यवसाय गर्नका लागि जग्गाको अभाव भएको हुन सक्छ । यस्तो अवस्थामा विशेष आर्थिक क्षेत्र (सेज) को व्यवस्था मिलाउन सके जग्गा किन्दा समस्या आउँदैन थियो ।

उद्योगका लागि आइपर्ने समस्यामा सरकारले सहयोग गरे सहज हुने थियो । सबैको रोजाईमा परेकाले अटोमोबाइल क्षेत्र राम्रो हुँदै गएको छ । तर पूर्वाधारको भने कमी छ । त्यसैले यो क्षेत्रमा अवसर र चुनौती दुवै छन् । सबै कुरा मिलाएर हिँड्न सके यो क्षेत्रमा राम्रो गर्न सकिन्छ ।

आज बजारको अवस्था हेर्दा सरकारले सवारी आयातमा लगाएको प्रतिबन्ध ठिकै हो । ‘बीएस फोर’ का सवारी साधन नेपालमा आइरहेका छन् । त्यसको ठाउँमा ‘बीएस सिक्स’ का सवारी आउन थाले भने त्यो राम्रो हुन्छ । जसले गर्दा गुणस्तरीय वस्तु नेपालमा भित्रिन्छन् । बेस फोर भारतमा बन्द भइसकेको छ । भारतमा बनेका सवारी पनि भारतमै चलाउन पाइरहेका छैनन् । तर ‘बीएस सिक्स’का सवारी चलाइरहेका छन् । नेपालमा पनि आयातमा ‘बीएस सिक्स’ नै चालु गरिदिए गुणस्तरीय सवारी साधन आउँछन् । ती सवारीले तेल पनि कम खान्छ ।

सरकारले ल्याएको नीतिले राजश्वमा कमी आएको हुन सक्छ । तर आजको बजारको स्थिति हेर्दा सरकारले जे नीति लिएको छ । त्यो ठीक छ । बजारको अवस्था राम्रो भएपछि मात्र आयात प्रतिबन्ध खुल्ला गर्नु पर्छ । यहाँ गाडी उत्पादनको सम्भावना धेरै छ । सरकारको नीति निर्यातमैत्री हुनुपर्छ । सरकारसँग पार्टनरसिप गरेर पनि यसमा काम गर्न सकिन्छ ।

– महाविर अटोमोबाइल्सका प्रबन्ध निर्देशक शर्माले विराटनगरमा आयोजित ‘कान्तिपुर उज्यालो पूर्व’ कार्यक्रमको ‘पूर्वको पौरख’ सत्रमा व्यक्त गरेको विचारको सम्पादित अंश ।

प्रकाशित : आश्विन १४, २०७९ १३:४८
पूरा पढ्नुहोस्
प्रतिक्रिया
पठाउनुहोस्
x
×