क्यानभासमा कृषि कर्मदेखि खेल मैदानसम्म

अमृता अनमोल

बुटवल — कोरोना भाइरसको सन्त्रास र लकडाउनकैबीच रुपन्देहीका कलाकार चित्र कार्यशालामा सरिक भएका छन् । नेपाल व्यवसायिक कलाकार संघको स्थापना दिवस तथा रजत महोत्सवको अवसर पारेर संघमा आवद्ध कलाकारले कार्यशाला गरेका हुन् ।


‘देशभरिका कलाकारहरु एक जुट हौं, गुणस्तरीय कलाको र्सिजना गरी पेशागत मर्यादा माथि उठाऔं’ भन्ने नाराका साथ दुई दिने चित्रकला कार्यशाला गरे । आफूमा भएको कला बाहिर ल्याउन र सामूहिक रुपमा सिक्ने सिकाउने वातावरण सिर्जना गर्न कार्यशाला गरिएको संघका सहसचिव बिक्रम तरामुले बताए । ‘लकडाउनका बीच भेटघाट हुन नपाएका कलाकारको जमघट भयो । आफ्नो कला बाहिर ल्याउन पनि पाइयो,’ उनले भने , ‘कार्यशालाबाट हामी उत्साहित भएका छौं ।’

कुञ्जलापुरमा आयोजित कार्यशालामा रुपन्देहीका २५ जना चित्रकार सहभागी थिए । आइतबार र सोमबार कलाकारले कार्यशालामा २७ वटा चित्र बनाए । ती मूर्त, अमूर्त दुवै खाले चित्र थिए । कृषिकर्मदेखि खेलमैदानसम्म तयार गरे । डाँडापाखा र मौलिक तस्बिर कोरे । कलाकारले थारु, गुरुङ, नेवारी लगायतका जातजातिका विभिन्न भेषभूषा र ऐतिहासिक स्थल तथा मन्दिरहरुको चित्र बनाउने धेरै थिए । पछिल्लो पटक जातिगत र ऐतिहासिक भेषभूषा धेरैले मन पराउन थालेकाले त्यस्ता चित्र बनाएको संघका अध्यक्ष बेनप्रसाद थापाले बताए ।

कार्यशाला आयोजना गर्न तिलोत्तमा नगरपालिका र झरना स्पोर्ट्स क्लबले सहयोग गरे । कलाकारले कार्यशालाबाट तयार गरिएका चित्र पनि नगरपालिकालाई नै हस्तान्तरण गरे ।

नगरपालिकाले उक्त चित्र बन्दै गरेको नयाँ भवनमा सजाएर राख्ने बताएको छ । ‘कला र सीप व्यक्ति मात्र होइन राष्ट्रकै सम्पत्ति हुन्,’ नगरप्रमुख बासुदेव घिमिरेले भने, ‘हामी सम्पतीका रुपमा जोगाएर र सजाएर राख्ने छौं ।’

प्रकाशित : असार ९, २०७७ १४:५१
प्रतिक्रिया
पठाउनुहोस्

कोरोना महामारीबीच सिंगापुरको संसद् भंग

एजेन्सी

सिंगापुर — कोरोना महामारीबीच सिंगापुरको संसद् विघटन भएको छ । मंगलबार सिंगापुरकी राष्ट्रपति हालिमा याकुबले प्रधानमन्त्री ली सेन लूङको सिफारिसमा संसद् विघटन गरेकी हुन् ।

यसअघि मंगलबार प्रधानमन्त्री लूङले संसद्‍मा सम्बोधन गर्दै ताजा जनादेशका लागि आफूले चुनाव गराउन चाहेको बताएका थिए । उनले सम्बोधनका क्रममा संसद् विघटनका लागि राष्ट्रपतिलाई आग्रह गरेको जानकारी पनि गराएका थिए ।

नयाँ चुनावले राष्ट्रिय एजेन्डा र कठिन परिस्थितिको सामना गर्न सक्ने गरी ताजा जनादेश दिने उनले बताएका थिए । वर्तमान संसदको कार्यकाल आउँदो अप्रिलसम्म भए पनि प्रधानमन्त्री लूङले त्यसअघि नै नयाँ चुनाव गराउन लागेका हुन् । सिंगापुरको कानुनअनुसार संसद् विघटन भएको ३ महिनाभित्र अर्को चुनाव सम्पन्न गरिसक्नुपर्छ ।

सिंगापुरको सत्तारुढ पिपल्स एक्सन पार्टी(पीएपी) सन् १९५९ देखि सरकारको नेतृत्वमा छ । उक्त पार्टीले सन् १९६५ मा सिंगापुर स्वतन्त्र हुनुपूर्वदेखि नै त्यहाँको सरकारको नेतृत्व गरिरहेको छ । यसअघि सन् २०१५ मा भएको आम चुनावमा पीएपीले ८९ मध्ये ८३ सिटमा जित हात पारेको थियो । यस पटक भने चुनावी क्षेत्र निर्धारण पुनरावलोकन समितिको सिफारिअनुसार संसदीय क्षेत्र बढाउने अपेक्षा गरिएको छ । यस पटक संसदीय चुनावी क्षेत्र ८९ बाट बढाएर ९३ पुऱ्याउने अपेक्षा गरिएको छ ।

सिंगापुरमा कोरोना भाइरसको संक्रमण बढिरहेका बेला नयाँ राजनीतिक घटनाक्रम विकास भएको हो । गत हप्ता मात्रै सिंगापुरले आंशिक रुपमा लकडाउन खुकुलो गरेको छ । कोरोना नियन्त्रण तथा रोकथामका लागि उचित कदम नचालेको भन्दै सिंगापुर सरकारको कडा आलोचना हुँदै आएको छ ।

मंगलबार दिउँसोसम्म सिंगापुरमा ४२ हजारभन्दा बढीमा कोरोना संक्रमण देखिएको छ । सिंगापुरमा संक्रमण पुष्टि भएकामध्ये करिब ३५ हजार ५ सय ९० जना निको भएका छन् भने २६ जनाको मृत्यु भएको छ ।

प्रकाशित : असार ९, २०७७ १४:४५
पूरा पढ्नुहोस्
प्रतिक्रिया
पठाउनुहोस्
×