मतदाता परिचयपत्र वितरण गर्न सुरु- भिडियो - कान्तिपुर समाचार

मतदाता परिचयपत्र वितरण गर्न सुरु

कान्तिपुर संवाददाता

काठमाडौँ — निर्वाचन आयोगले आगामी शुक्रबार हुन गइरहेको स्थानीय तह निर्वाचनका लागि मतदाताहरुलाई बुधबारबाट मतदाता परिचयपत्र वितरण गर्न सुरु गरेको छ । मतदाताहरू आफ्नो परिचयपत्र लिनका लागि मतदान स्थलमा लामबद्ध भएका बसिरहेका देखिन्थे । आसन्न निर्वाचनका लागि मतदान स्थलहरु धमाधम निर्माण गरिँदै छन् ।

मतदान स्थलमा ४० देखि ४५ को हाराहारीमा निर्वाचन आयोगका कर्मचारी , नेपाल प्रहरीसँगै म्यादी प्रहरी र नेपाल स्काउटका स्वयंसेवकहरु खटिएका छन् । निर्वाचनको समयमा वृद्ध र अशक्त व्यक्तिहरुका लागि चाँडै मतदान गर्ने व्यवस्था मिलाइएको छ । निर्वाचन आयोगले मतदाता परिचयपत्र लिन आउँदा मतदातालाई आफ्नो परिचय खुल्ने कागजपत्र अनिवार्य ल्याउन भनेको छ । मतदाताको विवरण निर्वाचन आयोगको वेबसाइटमा पनि हेर्न सकिने व्यवस्था निर्वाचन आयोगले गरेको छ । तर, मतदान स्थलमा खटिएका कर्मचारीहरू पुरानै शैलीमा अक्षर बाट मतदाताको नाम खोज्ने प्रक्रिया अलि झनझनटिलो भएको बताउँछन् । यसले समय लिने उनीहरुले बताए । निर्वाचनमा खर्च हुने थोरै बजेट डिजिटल प्रविधीको प्रयोगका लागि पनि खर्च गर्न सके सेवाग्राही र कर्मचारी दुवैलाई सहज हुने बुझाई नागरिक र कर्मचारीहरुको रहेको छ ।

प्रकाशित : वैशाख २८, २०७९ १८:००
प्रतिक्रिया
पठाउनुहोस्

काँकडभिट्टा नाका बन्दपछिका १३ तस्बिरहरु

शब्द/तस्बिर : पर्वत पोर्तेल

काँकडभिट्टा — शुक्रबार हुने स्थानीय तह निर्वाचनलाई लक्षित गरी मंगलबार मध्यरातिदेखि भारतसँगको खुला नाका ७२ घण्टाका लागि सिल गरिएको छ । नाका ठप्प हुँदा सर्वसाधारणले सास्ती व्यहोर्नु परेको छ । नेपाल–भारत सीमा सहर काँकडभिट्टा नाकामा बिहीबार अपराह्नसम्म भारतबाट आउने यात्रु र भारततिर जाने यात्रु तथा सर्वसाधारणको बाक्लो भीड लाग्यो ।

प्रहरीका अनुसार बिहीबार करिब ३ हजार प्रवासी नेपाली यो नाकाबाट प्रवेश गरेका छन् । करिब एक हजार जति भारतीय पारि गएका छन् । प्रहरीका अनुसार भारतबाट आउने अधिकांश नेपाली मतदाता छन् भने भारत जानेमा सेनाका जागिरे, विद्यार्थीलगाययत छन् । धेरैजसो भारतीयहरु घर फर्किएका छन् । खासगरी चुनावमा हुन सक्ने अवाञ्छित गतिविधि रोक्न नेपाल र भारत दुवै देशको प्रशासनले पश्चिम बंगाल र बिहारसँग सीमा जोडिएका नाका ७२ घन्टा बन्द गर्ने सहमति गरेका थिए ।

इलाका प्रहरी कार्यालय काँकडभिट्टाका डीएसपी ज्ञानकुमार महतोले नेपाली परिचयपत्र वाहक यात्रुहरुलाई मात्रै प्रवेश गर्न दिइएको बताए । ‘नेपाल आउनेलाई नेपाली नागरिकता तथा परिचय खुल्ने कागजातका आधारमा प्रवेश गर्न दिइएको छ’, उनले भने,‘भारततिर जानेलाई त्यतैको परिचय पत्रका आधारमा पठाइएको छ। ’प्रशासनले खासगरी भारतवाट आउने यात्रुलाई विशेष निगरानी गरेको छ । नाका बन्दका कारण मेची भन्सार र भद्रपुर भन्सार कार्यालयको आयात निर्यातसमेत ठप्प छ । नेपाली तथा भारतीय बजारसमेत निर्वाचनका कारण सुनसान छन् ।


प्रकाशित : वैशाख २८, २०७९ १७:५७
पूरा पढ्नुहोस्
प्रतिक्रिया
पठाउनुहोस्
×