नेपाल र बहराइनबीचको खेल दशरथ रंगशालामा नहुने

एन्फाले चैथ ८ मा हुनु पर्ने खेल तटस्थ भूमिका हुने र यसबारे चाँडै घोषणा हुने पनि जनाएको छ ।

नेपालले बहराइनविरुद्धको दोस्रो लेगको खेल भने चैत १३ मा खेल्नेछ र यो खेल बहराइनमा हुनेछ । एसियाली फुटबल महासंघ (एएफसी) ले दशरथ रंगशालाको मैदान अन्तर्राष्ट्रिय फुटबलका लागि उपयुक्त नहुने बताएपछि बहराइनविरुद्धको खेल अन्यत्र सार्न बाध्य हुनु परेको हो ।

एएफसी प्रतिनिधिले हालै मात्र रंगशालाको निरीक्षण गरेको थियो । गत साता मात्रै दशरथ रंगशालामा रग्बीको क्लब च्याम्पिनयसिप भएको थियो र त्यसले मैदानलाई अझ बिगार्न मदत पुर्‍याएको थियो ।

यस्तै नेपाल सुपर लिग (एनएसएल) को आयोजनापछि दशरथ रंगशालामा विभिन्न स्कुलले आफ्नो वार्षिक खेलकुद कार्यक्रम पनि आयोजना गरेका थिए ।