महानगर प्रमुखलाई कारबाही गर्न प्राधिकरणलाई बाटो खुला 

महानगर प्रहरीले जेठ ३२ मा सिनामंगलस्थित प्राधिकरणको स्वामित्वमा भएको जग्गाको फेन्सिङ जाली भत्काएर नियन्त्रणमा लिएको थियो । उक्त कार्य नियमविपरीत भएको जनाउँदै प्राधिकरणका महानिर्देशक प्रदीप अधिकारीले असार १ गते महानगर प्रमुख शाहलाई ७ दिने स्पष्टीकरण सोधेका थिए । महानगर प्रमुख प्राधिकरणको निर्णयविरुद्ध उच्च अदालत पाटन पुगेका थिए ।

अदालतले असार ७ गते महानगर प्रमुखलाई मागदाबी बमोजिमको अन्तरिम आदेश दिन अस्वीकार गरी अल्पकालीन आदेशमात्रै जारी गरेको थियो । उक्त मुद्दामा बुधबार अन्तिम फैसला गर्दै अदालतले महानगर प्रमुखको रिट खारेज गरिदिएको छ । योसँगै प्राधिकरणलाई महानगर प्रमुख शाहमाथि कारबाही गर्न बाटो खुला भएको छ ।

प्राधिकरणका सहप्रवक्ता ज्ञानेन्द्र भुलका अनुसार, महानगर प्रमुख बालेन्द्रले अबको ७ दिनभित्र प्राधिकरणद्वारा ०८० असार १ गते सोधिएको लिखित स्पष्टीकरणको जवाफ पेस गर्नु पर्नेछ । अन्यथा उनलाई महानिर्देशक अधिकारीले नागरिक उड्डयन प्राधिकरण ऐन, २०५३ को दफा २५ (१) बमोजिम ५० हजारसम्मको जरिवाना तोक्न सक्ने छन् ।